MAPINDUZI YA KIHISTORIA JAJI KIONGOZI AKIZINDUA MAHAKAMA ZA WILAYA MPYA TANO

Na Faustine Kapama, Mahakama-Manyoni

Jaji Kiongozi wa Mahakama Kuu ya Tanzania, Mhe. Mustapher Siyani leo tarehe 30 Januari, 2023 amezindua Mahakama za Wilaya tano mpya kwa awamu moja, hivyo kuandika historia nyingine kwenye utekelezaji wa Mpango Mkakati wa Mahakama katika kusogeza huduma za utoaji haki karibu na wananchi.

Akizungunza katika tukio hilo la uzinduzi wa Mahakama za Wilaya Manyoni, Kilindi, Bunda, Rungwe na Sikonge lililorushwa mubashara kupitia Vituo vya Channel 10 na ITV kutoka katika Mahakama ya Wilaya Manyoni, Mhe. Siyani amewasihi watumishi wote nchini kuijengea heshima Mahakama kwa kuchapa kazi na kuepuka viashiria vyote na harufu za rushwa.

“Ni vyema watumishi wa Mahakama mfahamu kuwa huduma mbaya au zilizo chini ya kiwango ndizo zilizotufikisha mahali ambapo watu wanatutuhumu bila ushahidi. Matendo na kauli zetu zimewafanya tunaopaswa kuwahudumia kuwa na hisia mbaya dhidi yetu. Sasa ni wakati wa mabadiliko,” amesema.

Jaji Kiongozi ameeleza kuwa wakati serikali na Mahakama zinaboresha miundombinu na maslahi hatua kwa hatua, watumishi wanaowajibu wa kuwa mfano mzuri kwa umma na wanaoaminika, wanaochapa kazi, wazalendo kwa nchi yao na wanaojua nini wanapaswa kufanya.

“Tunao uwezo wa kuibadili hali yetu kutoka kwenye kutoaminiwa hadi kuaminiwa sana. Niwaombe viongozi wa Mahakama kwenye kila ngazi ya Mahakama, kusimamia mabadiliko haya yanayoanzia kwenye fikra na mitazamo yetu maana haya ndiyo mabadiliko ya kweli,” amesema.

Mhe. Siyani amebainisha kuwa uzinduzi wa majengo hayo matano ya Mahakama za Wilaya umetanguliwa na uzinduzi mwingine wa majengo 24 ya Mahakama za Wilaya na matatu ya Mahakama za Hakimu Mkazi katika kipindi cha miezi miwili iliyopita.

“Haya ni mapinduzi makubwa ya kihistoria kwa Mahakama ya Tanzania na nchi yetu kwa ujumla. Kwa hiyo uzinduzi wa majengo haya matano na mengine takribani 27 ni wazi umesogeza huduma karibu zaidi na wananchi na hili ndilo lengo la Mahakama,” amesema.  

Jaji Kiongozi amesema kuwa ujenzi wa majengo hayo ni sehemu ya utekelezaji wa Mpango Mkakati wa Mahakama kuimarisha upatikanaji haki kwa kuboresha miundo mbinu na katika kutekeleza mkakati huo, Mpango Mkakati wa Miaka Mitano wa Maendeleo ya Miundombinu ya Mahakama (2016-2021) uliandaliwa ili kuboresha mazingira ya utoaji haki na kusogeza huduma karibu zaidi na wananchi.

Kwa mujibu wa Mhe. Siyani, Mpango uliainisha Wilaya 104 ambazo mwaka 2016, zilikuwa zinahitaji ujenzi wa majengo mapya ya Mahakama za Wilaya zikiwemo hizo ambazo amezizindua. Amesema katika utekelezaji wa Mpango huo, uboreshaji wa miundombinu ya majengo ya Mahakama umeendelea kutekelezwa.

“Hadi tarehe ya leo, tuna jumla ya majengo mapya 84 ambayo yamejengwa nchi nzima na majengo matatu yaliyokarabatiwa. Majengo mapya 84 yaliyojengwa ni pamoja na Mahakama Kuu saba, Mahakama za Hakimu Mkazi nane, Mahakama za Wilaya 46 na Mahakama za Mwanzo 23, wakati majengo yaliyokarabatiwa ni Mahakama Kuu mbili na Mahakama ya Hakimu Mkazi moja,” amesema.

Hafla hiyo ya uzinduzi imehudhuriwa na viongozi mbalimbali wa Mahakama, Serikali na Bunge. Baadhi ya viongozi wa Mahakama waliohudhuria hafla hiyo ni Jaji Mfawidhi wa Mahakama Kuu ya Tanzania, Kanda ya Dodoma, Mhe. Gerson Mdemu, Jaji wa Mahakama Kuu kutoka Kanda hiyo, Mhe. Dkt. Adam Mambi, Mtendaji Mkuu wa Mahakama ya Tanzania, Prof. Elisante Ole Gabriel na Msajili Mkuu wa Mahakama ya Tanzania, Mhe. Wilbert Chuma.

Kwa upande wa Serikali alikuwepo Naibu Waziri wa Katiba na Sheria, Mhe. Geofrey Pinda, Mkuu wa Mkoa wa Singida, Mhe. Peter Serukamba na Wakuu wa Wilaya, huku Bunge likiwakilishwa na Mbunge wa Manyoni Mashariki, Mhe. Dkt Pius Chaya, Mbunge wa Manyoni Magharibi, Mhe. Yahana Masale na Mbunge wa Singida Mashariki, Mhe. Miraji Mtaturu.

Akizunguza wakati anamkaribisha Jaji Kiongozi kuzungumza na Watanzania, Mhe. Mdemu alieleza kuwa kabla ya ujenzi huo wananchi wa Manyoni walikuwa wanapata huduma za kimahakama sehemu finyu na isiyoridhisha, hivyo wamefarijika na kujivunia uwepo wa jengo hilo.

“Jengo hili litahudumia wananchi takribani 495,016 kwa mujibu wa sensa ya watu na makazi ya mwaka 2022 waliotawanyika katika Kata 32 na Vijiji 126 kwa Halmashauri za Manyoni na Itigi. Jengo hili litatumiwa na Mahakama mbili, Mahakama ya Wilaya Manyoni na Mahakama ya Mwanzo Manyoni Mjini,” alisema.

Jaji Mfawidhi huyo alisema kuwa Mahakama itakuwa inafanya kazi katika mazingira yanayolinda hadhi kama Mhimili. Alitumia nafasi hiyo kuwahimiza wananchi kulitumia jengo hilo katika kutatua migogoro iliyoshindikana.

Kwa kufanya hivyo, alisema, wataendeleza kauli mbiu ya maadhimishio ya Wiki na Siku ya Sheria mwaka 2023 ambayo inahusu umuhimu wa utatuzi wa migogoro kwa njia ya usuluhishi katika kukuza uchumi endelevu; wajibu wa Mahakama na wadau.

“Hivyo, siyo lazima kila mgogoro uletwe mahakamani kwa vile kuna jengo zuri, iletwe migogoro pale tu njia za usuluhishi zinaposhindikana,” alisema na kuahidi kulitunza jengo hilo ili lidumu kuweza kuhudumia vizazi na vizazi katika Wilaya hiyo.

Kwa upande wake, Mhe. Pinda aliwaeleza wananchi kuwa Serikali imeelekeza ifikapo mwaka 2026 kujengwa Mahakama za Mwanzo katika makao makuu yote ya Tarafa na Wilaya zote  zitakuwa na majengo mapya ya Mahakama za Wilaya kwa zile zenye uhitaji, huku kila Mkoa ukiwa na Mahakama ya Hakimu Mkazi.

Naibu Waziri huyo aliwasihi wananchi wa Manyoni kulitumia jengo hilo kutafuta haki na siyo vinginevyo, huku akiwahimiza watumishi wa Mahakama watakaohudumu mahakamani hapo kulipenda na kulitunza.

Naye Mkuu wa Mkoa wa Singida aliwasihi watumishi katika Mahakama hiyo kutoa huduma bora kwa wananchi inayolingana na uzuri wa jengo hilo. “Tunapofanya kazi hii kubwa ya kuboresha Mahakama na miundombinu iendanane na kutoa huduma bora kwa wananchi wetu, wananchi wetu wapate haki kwa wakati,” alisema.

Jaji Kiongozi aliwasili katika viwanja vya Mahakama ya Wilaya Manyoni majira ya saa 3.30 asubuhi hivi na kupokelewa na viongozi mbalimbali wa Mahakama na baadae kuelekea katika sehemu maalumu iliyokuwa imeandaliwa kwa ajili ya kupata taarifa ya ujenzi wa majengo hayo matano.

Baada ya kupokea taarifa hiyo kutoka kwa Mhandisi Fabiani Kwegilwa, Mtendaji wa Mahakama Kuu ya Tanzania, Bw. Leonard Magacha alimwongoza Jaji Kiongozi kwenda kukagua jengo la Mahakama ya Wilaya Manyoni kabla ya kukata utepe maalumu na kufungua pazia kuashiria uzinduzi wa Mahakama hizo tano za Wilaya.

Mhe. Siyani baada ya uzinduzi huo alielekea jukwaa kuu pamoja na viongozi wengine na baadaye Wimbo wa Taifa ulipigwa kabla ya mshereheshaji Mkuu wa shughuli hiyo, Msajili wa Mahakama Kuu ya Tanzania, Mhe. Sharmillar Sarwatt kuruhusu vikundi mbalimbali vya burudani, ikiwemo kwaya ya Mahakama ya Tanzania, maarufu Ng’aring’ari, kuwatumbuiza wananchi.

Baada ya shughuli ya uzinduzi huo, Jaji Kiongozi pamoja na viongozi wengine wa Meza Kuu walipata nafasi ya kupanda miti katika maeneo ya Mahakama.

Mwonekano wa mbele wa jengo la Mahakama ya Wilaya Manyoni ambalo pia linajumuisha Mahakama ya Mwanzo Manyoni Mjini.

Jaji Kiongozi wa Mahakama Kuu ya Tanzania, Mhe. Mustapher Siyani (katikati) akikata utepe kuashiria uzinduzi wa Mahakama za Wilaya Manyoni, Kilindi, Bunda, Rungwe na Sikonge katika hafla iliyofanyika leo tarehe 30 Januari, 2023 katika viwanja vya Mahakama ya Wilaya Manyoni. Picha chini, Jaji Kiongozi (wa pili kushoto) pamoja na viongozi wengine wakipiga makofi baada ya kufunua pazia maalumu kwa ajili ya uzinduzi huo.

 

Jaji Kiongozi wa Mahakama Kuu ya Tanzania, Mhe. Mustapher Siyani akiongea na wananchi baada ya kufanya uzinduzi wa Mahakama hizo.

Jaji Mfawidhi wa Mahakama Kuu ya Tanzania, Kanda ya Dodoma, Mhe. Gerson Mdemu akizungumza katika hafla hiyo.

Naibu Waziri wa Katiba na Sheria, Mhe. Geofrey Pinda akiwasilisha salamu za Serikali katika hafla ya ufunguzi wa Mahakama hizo.

Mkuu wa Mkoa wa Singida, Mhe. Peter Serukamba akisisitiza jambo alipokuwa anawasilisha salamu za Mkoa katika  hafla hiyo.

Mshereheshaji Mkuu wa shughuli hiyo, Msajili wa Mahakama Kuu ya Tanzania, Mhe. Sharmillar Sarwatt akiwa kazini.

Naibu Msajili Mwandamizi wa Mahakama Kuu ya Tanzania, Mhe. Anold Kirekiano akitambulisha viongozi mbalimbali waliohudhuria hafla hiyo.

Viongozi mbalimbali wa Mahakama wakifuatilia matukio katika hafla ya uzinduzi wa Mahakama hizo.

Sehemu ya watumishi wa Mahakama (juu) na wananchi (chini) wakifuatilia matukio mbalimbali katika hafla hiyo.

Jaji Kiongozi wa Mahakama Kuu ya Tanzania, Mhe. Mustapher Siyani akiwasili katika viwanja vya Mahakama ya Wilaya Manyoni kwa ajili ya uzinduzi. Picha chini akisalimiana na Mtendaji Mkuu wa Mahakama ya Tanzania, Prof. Elisante Ole Gabriel (kulia).

Jaji Kiongozi wa Mahakama ya Tanzania, Mhe. Mustapher Siyani (kulia) akipokea maelezo kutoka kwa Mhandisi Fabiani Kwegilwa (aliyeshika kipaza sauti) kuhusu ujenzi wa Mahakama hizo. Picha chini Mtendaji wa Mahakama Kuu ya Tanzania, Bw. Leonard Magacha (kulia) akimwongoza Jaji Kiongozi kwenda kukagua moja ya majengo ya Mahakama hizo.

Jaji Kiongozi wa Mahakama ya Tanzania, Mhe. Mustapher Siyani (aliyekaa) akiwa katika ukumbi wa wazi ndani ya Mahakama ya Wilaya Manyoni.

Kwaya ya Mahakama ya Tanzania (juu) ikitumbuiza katika hafla hiyo. Picha chini ni kwaya kutoka Wilaya ya Manyoni ikizawadiwa na Jaji Kiongozi wakati inatumbuiza.

Kikundi cha Ngoma kikitumbuiza katika hafla hiyo.

Jaji Kiongozi wa Mahakama ya Tanzania, Mhe. Mustapher Siyani akipanda mti baada ya kukabidhiwa na Hakimu Mkazi Mwandamizi wa Mahakama ya Wilaya Manyoni, Mhe. George Kapama.

Jaji Mfawidhi wa Mahakama Kuu ya Tanzania, Kanda ya Dodoma, Mhe. Gerson Mdemu akipanda mti baada ya hafla hiyo.

 Naibu Waziri wa Katiba na Sheria, Mhe. Geofrey Pinda (juu) na Mkuu wa Mkoa wa Singida, Mhe. Peter Serukamba (chini) wakipanda miti katika maeneo ya Mahakama ya Wilaya Manyoni.