JAJI MFAWIDHI MOROGORO ATOA WITO MAALUM KUELEKEA WIKI, SIKU YA SHERIA

Na Evelina Odemba – Mahakama, Morogoro.

Jaji Mfawidhi wa Mahakama Kuu ya Tanzania, Kanda ya Morogoro, Mhe. Paul Ngwembe ametoa wito maalum kwa wananchi wa Kanda hiyo kuitumia ipasavyo wiki ya sheria ili kutibu kiu yao ya kuelimishwa juu ya masuala mbalimbali yanayoilenga Mahakama na mifumo yake.

Jaji Ngwembe alitoa kauli hiyo hivi karibuni katika mkutano na Vyombo vya Habari na kuzungumzia namna Mahakama Kanda ya Morogoro ilivyojipanga kuadhimisha Wiki ya Sheria ambayo inatarajiwa kuzinduliwa hapo tarehe 22 Januari, 2023 kitaifa jijini Dodoma.

Alisema kuwa wamejipanga vizuri kuhakikisha elimu ya sheria inawafikia wananchi wengi zaidi. “Baada ya uzinduzi tutaanza kutoa elimu ya sheria kwa wananchi, tena elimu hii itatolewa bila mwananchi kuchangia gharama yeyote, garama pekee atakayoitumia Mwananchi huyu ni kutoka nyumbani mpaka vilipowekwa vituo vya utoaji elimu,” alisisitiza Mhe. Ngwembe.

Aidha, alieleza kuwa Kanda ya Morogoro itajikita zaidi kutoa elimu juu ya utatuzi wa migogoro kwa njia ya usuluhishi katika Mahakama, ulinzi wa mtoto tangu akiwa tumboni mpaka atakapofikisha umri wa kutambulika kama mtu mzima na utatuzi wa migogoro ya ndoa na miradhi.

Mhe.Ngwembe alisema kuwa wananchi wataelimishwa pia kuhusu makosa ya kijinai, ikiwemo kupatikana na nyara za Serikali, makuzi na walezi ya vijana wawapo shuleni, mfumo wa Mahakama kuanzia Mahakama ya Mwanzo mpaka Mahakama ya Rufaa ili mteja ajue shauri lake linapaswa kupelekwa Mahakama ipi, kazi ya Mabalaza ya Ardhi pamoja na mada nyinginezo.

Aliwaomba wananchi kufika kwenye vituo vya kutolea elimu kwani sambamba na kujifunza mambo mengine pia watapata kufahamu namna Mahakama ilivyojipanga na inavyotumia usuluhishi katika kutatua migogoro mbalimbali inayofikishwa mahakamani kama inavyosema kauli mbiu ya Wiki na Siku ya Sheria.

“Kupitia kauli mbiu hii napenda kusema kuwa Mahakama yetu ya Tanzania imelitazama hili kwa jicho la kipekee sana na sisi tutasisitiza zaidi usuluhushi na sio mashindano mahakamani kwakuwa njia ya usuluhishi ikitumika, kila mmoja hutoka akiwa mshindi na hivyo kuendeleza mahusiano bora yaliyokuwepo”, alisema.

Akielezea kuwa wameandaa bonanza litakalokuwa na michezo mbalimbali na linatarajiwa kufanyika tarehe 21 Januari, 2023 ili kuhamasisha wananchi kujitokeza siku ya uzinduzi wa Wiki ya Sheria na Bonanza hilo linatarajiwa kufanyika katika viwanja vya Jamuhuri kuanzia saa kumi na mbili asubuhi.

Wiki ya Sheria imekuwa ikiadhimishwa kila mwanzo wa mwaka kote nchini na kwa upande wa mwaka huu inategemewa kuzinduliwa tarehe 22 Januari, 2023 itaifa jijini Dodoma na kuhitimishwa tarehe 01 Februari, 2023 huku kauli mbiu ikiwa “Umuhimu wa Utatuzi wa Migogoro kwa njia ya Usuluhishi katika kukuza uchumi endelevu: Wajibu wa Mahakama na wadau.”

Kwa Upande wa Kanda ya Morogoro, uzinduzi utaanza kwa maandamano kuanzia lilipo jengo la Kituo Jumuishi cha Utoaji Haki kuelekea katika Kiwanja cha Ndege ambapo kutakuwa ndio kituo mama cha kutolea elimu, huku mgeni rasmi akitegemewa kuwa Mkuu wa Mkoa wa Morogoro. Mara baada ya uzinduzi elimu itaendelea kutolewa katika vituo vvya Stendi ya Msamvu, Stendi ya Mafiga, Soko la Chief Kingalu pamoja na kituo Jumuishi cha Utoaji Haki Morogoro.

Jaji Mfawidhi wa Mahakama Kuu ya Tanzania, Kanda ya Morogoro, Mhe. Paul Ngwembe (katikati) akiongea na Waandoshi wa Habari (hawapo kwenye picha). Wengine ni Jaji wa Mahakama Kuu ya Tanzania katika Kanda hiyo, Mhe. Gabriel Malata (kushoto) na Naibu Msajili wa Mahakama Kuu Kanda ya Morogoro, Mhe. Augustina Mbando (kulia).