JUDICIARY OF TANZANIA: KAZI INAENDELEA DODOMA

Na Faustine Kapama-Mahakama, Dodoma

Kamati maalumu iliyoundwa na Mtendaji Mkuu wa Mahakama ya Tanzania, Prof Elisante Ole Gabriel kuratibu shughuli za Wiki na Siku ya Sheria kwa mwaka 2023 imeshawasili tayari jijini hapa kutekeleza jukumu hilo.

Akizungumza katika Viwanja vya Nyerere Square mahali kutakapofanyikia maonyesho wa Wiki ya Sheria, Katibu wa Kamati hiyo, Mhe. Charles Magesa amesema maandalizi ya shughuli hiyo yanaendelea vizuri na wajumbe wote wapo tayari kutekeleza jukumu walilopoewa.

"Wajumbe wote wa Kamati wapo Dodoma na kazi inaendelea. Maadalizi kama unavyoona yanaendelea vizuri na ninaamini hadi kufikia kesho tarehe 21 Januari, 2023 kila kitu kitakuwa kipo tayari," alisema Mhe. Magesa.

Wiki ya sheria inatarajiwa kuanza siku ya Jumapili tarehe 22 Januari, 2023 kwa mate matembezi maalumu yatakayoanzia katika Kituo Jumuishi cha Utoaji Haki Dodoma majira ya saa 12.00 asubuhi. Mgeni rasmi atakayeongoza matembezi hayo na kufungua Wiki ya Sheria ni Makamu wa Rais wa Jamhuri ya Muungano wa Tanzania, Mhe. Dkt. Philip Mpango.

Akiongea na waandishi wa habari mkoani Dar-es-Salaam hivi karibuni, Jaji Mkuu wa Tanzania, Mhe. Prof Ibrahim Hamis Juma aliwaomba wananchi wote katika mkoa wa Dodoma na maeneo ya jirani kujitokeza kwa wingi kushiriki katika maonesho hayo.

Alisema kuwa wananchi watakaofika kwenye viwanja hivyo watapata nafasi ya kutoa malalamiko, maoni na mapendekezo ya uboreshaji wa huduma za Mahakama, hivyo ni matumaini yake na ya Mahakama ya Tanzania kwa ujumla kuwa taasisi zote zinazosimamia Sheria zinazotoa nafasi ya usuluhishi zitumie Wiki ya Sheria kutangaza hizo fursa za usuluhishi.

“Sambamba na Elimu ya Sheria na maonesho yatakayofanyika Kitaifa katika Mji Mkuu wa Tanzania, Dodoma, utoaji wa elimu ya sheria kwa umma na maonesho utaendelea pia katika Kanda za Mahakama Kuu, Mikoa na Wilaya nchi nzima kama ilivyofanyika kwa miaka mingine,” alisema.

Aidha, Jaji Mkuu alisema kuwa wakati wa Wiki ya Sheria elimu itatolewa kuhusu taratibu za ufunguaji wa mashauri hasa kwa njia ya mtandao, sheria na taratibu zinazotumika katika kuendesha mashauri mbalimbali kama yale ya Ndoa na Talaka, Ardhi, migogoro ya Kazi pamoja na utekelezaji wa hukumu, Sheria za Watoto na taratibu za mashauri ya mirathi.

“Vilevile wanananchi watapata fursa ya kujifunza huduma zitolewazo na Mahakama inayotembea “Mobile Court” na Mahakama za Vituo Jumuishi. Wananchi watakaotembelea mabanda ya Mahakama watapata fursa ya kujifunza kwa kiasi gani Mahakama ya Tanzania imejipanga kutoa haki katika Karne ya 21 kwa kutumia matumizi ya Teknolojia ya Habari na Mawasiliano (TEHAMA),” alisema.

Alisema katika maonesho hayo, elimu hiyo itatolewa na Majaji, Wasajili, Naibu Wasajili, Mahakimu pamoja na wadau wa Mahakama, wakiwemo Ofisi ya Mwanasheria Mkuu wa Serikali, Ofisi ya Wakili Mkuu wa Serikali, Ofisi ya Taifa ya Mashtaka, Ofisi ya Mkemia Mkuu wa Serikali, Tume ya Haki za Binadamu, Chama cha Majaji na Mahakimu Wanawake (TAWJA), Polisi, Magereza na Chama cha Wanasheria Tanganyika (TLS).

Kwa mwaka huu, katika maadhimisho haya ya Wiki ya Sheria na Siku ya Sheria, kauli mbiu itakuwa Umuhimu wa Utatuzi wa Migogoro kwa Njia ya Usuluhishi Katika Kukuza Uchumi Endelevu: Wajibu wa Mahakama na Wadau.

Kilele cha Siku ya Sheria kitafanyika tarehe 1 Februari, 2023 katika viwanja vya China Chinangali jijini hapa na mgeni rasmi atakuwa Rais wa Jamhuri ya Muungano wa Tanzania, Mhe. Samia Suluhu Hassan.

Watumishi wa Mahakama ya Rufani ya Tanzania wakishusha baadhi ya vitendea kazi vitakavyotumika kwenye maonyesho ya Wiki ya Sheria yanayoanza tarehe 22 Januari, 2023 yatakayofanyika kitaifa kwenye Viwanja vya Nyerere Square jijini Dodoma. Picha chini ni sehemu ya watumishi wengine wakiwa katika viwanja hivyo.

Sehemu ya vijana wakipakua vifaa kwenye malori katika viwanja hivyo. Picha chini ni sehemu ya watumishi wa Mahakama wakijadiliana mambo mbalimbali.