KAZI IMEKAMILIKA

·Wananchi waalikwa kushiriki Wiki ya Sheria kote nchini

Na Faustine Kapama-Mahakama, Dodoma

Maandalizi kuelekea maadhimisho ya Wiki ya Sheria kwa mwaka 2023 ambayo yatahusisha maonesho na utoaji wa elimu ya kisheria bure kutoka kwa wadau mbalimbali wa Mahakama ya Tanzania yemekamilika.

Akizungumza katika Viwanja vya Nyerere Square kutakapofanyikia maadhimisho hayo, Katibu wa Kamati maalumu iliyoundwa kuratibu shughuli hizo, Mhe. Charles Magesa amesema wameshakamilisha maandalizi yote.

“Kazi imekamilika. Tupo tayari kwa maonesho na tupo tayari kutoa elimu ya kisheria kwa wananchi wetu. Wadau wote wanaoshiriki kwenye maonesho kama unavyoona mabanda yao wameshafika kwa ajili ya shughuli hii,” amesema.

Mhe. Magesa amewaalika wananchi wote kufika katika Viwanja vya Nyerere Square na kutembelea mabanda ambayo yameandaliwa na wadau wa Mahakama ili kujionea shughuli wanazofanya na kupata elimu kwenye maeneo mbalimbali ya kisheria.

Elimu itakayotolewa inahusu taratibu za ufunguaji wa mashauri hasa kwa njia ya mtandao, sheria na taratibu zinazotumika katika kuendesha mashauri mbalimbali kama yale ya Ndoa na Talaka, Ardhi, migogoro ya Kazi pamoja na utekelezaji wa hukumu, Sheria za Watoto na taratibu za mashauri ya mirathi.

Vilevile wanananchi watapata fursa ya kujifunza huduma zitolewazo na Mahakama inayotembea “Mobile Court” na Mahakama za Vituo Jumuishi, watajifunza jinsi Mahakama ya Tanzania imejipanga kutoa haki katika Karne ya 21 kwa kutumia matumizi ya Teknolojia ya Habari na Mawasiliano (TEHAMA).

Katika maonesho hayo, elimu hiyo itatolewa na Majaji, Wasajili, Naibu Wasajili, Mahakimu pamoja na wadau wa Mahakama, wakiwemo Ofisi ya Mwanasheria Mkuu wa Serikali, Ofisi ya Wakili Mkuu wa Serikali, Ofisi ya Taifa ya Mashtaka, Ofisi ya Mkemia Mkuu wa Serikali, Tume ya Haki za Binadamu, Chama cha Majaji na Mahakimu Wanawake (TAWJA), Polisi, Magereza na Chama cha Wanasheria Tanganyika (TLS).

Hivi karibuni, Mtendaji Mkuu wa Mahakama ya Tanzania, Prof Elisante Ole Gabriel aliteua Kamati maalum kuratibu shughuli mbalimbali, ikiwemo kufanikisha matembezi ya ufunguzi wa Wiki ya Sheria tarehe 22 Januari, 2023.

Kadhalika, Prof. Ole Gabriel aliitaka Kamati hiyo kuratibu utoaji wa elimu ya kisheria kwa wananchi kwenye Viwanja vya Nyerere Square kuanzia Januari 22 hadi 29, 2023 na kufanikisha Siku ya Sheria itakayofanyika kitaifa tarehe 1 Februari, 2023 ambapo mgeni rasmi atakuwa Rais wa Jamhuri ya Muungano wa Tanzania, Mhe. Samia Suluhu Hassan.

Wiki ya Sheria itakayofanyika kitaifa siku ya Jumapili tarehe 22 Januari, 2023 itaanza kwa matembezi maalumu yatakayoanzia katika Kituo Jumuishi cha Utoaji Haki Dodoma majira ya saa 12.00 asubuhi na kuongozwa na Makamu wa Rais wa Jamhuri ya Muungano wa Tanzania, Mhe. Dkt. Philip Mpango.

Sambamba na Elimu ya Sheria na maonesho yatakayofanyika Kitaifa katika Mji Mkuu wa Tanzania, Dodoma, utoaji wa elimu ya sheria kwa umma na maonesho utaendelea pia katika Kanda za Mahakama Kuu, Mikoa na Wilaya nchi nzima kama ilivyofanyika kwa miaka mingine.

Kwa mwaka huu, katika maadhimisho haya ya Wiki ya Sheria na Siku ya Sheria, kauli mbiu itakuwa Umuhimu wa Utatuzi wa Migogoro kwa Njia ya Usuluhishi Katika Kukuza Uchumi Endelevu: Wajibu wa Mahakama na Wadau.

Banda la Huduma Bora kwa mteja lipo tayari. 

Bango Kuu linalomwonyesha mgeni rasmi wa maazimisho ya Wiki ya Sheria, Makamu wa Rais wa Jamhuri ya Muungano wa Tanzania, Mhe. Dkt. Philip Mpango. 

Kazi inaendelea. 

Sekretarieti Kuu ya maadhimisho ipo kazini tayari. 

Wananchi wote mnakaribishwa.