MOROGORO YAFANYA BONANZA KUHAMASISHA UZINDUZI WIKI YA SHERIA

Na Evelina Odemba – Mahakama Morogoro

Mahakama Kuu ya Tanzania, Kanda ya Morogoro leo tarehe 21 January, 2023 imefanya bonanza la michezo mbalimbali lililovuta hisia za wakazi wa mji ikiwa ni sehemu ya kuhamasisha wananchi kujitokeza kushiriki siku ya uzinduzi wa Wiki ya Sheria inayotarajiwa kuzinduliwa hapo kesho tarehe 22 January, 2023.

Bonanza hilo lilifanyika katika Uwanja wa Michezo wa Jamuhuri ulipo mkoani hapa huku mgeni rasmi akiwa ni Jaji Mfawidhi wa Mahakama Kuu ya Tanzania, Kanda ya Morogoro, Mhe. Paul Ngwembe aliyeongoza mamia ya wananchi wa Mkoa huo kushiriki katika michezo hiyo iliyoandaliwa.

Akizungumza wakati wa ufunguzi, Mhe. Ngwembe alisema kuwa ni wakati sasa wananchi kuwa karibu na Mahakama ndio maana michezo hiyo haikumbagua mtu yeyote ambapo wote aliruhusiwa kujiandikisha kushiriki. Aliongeza pia kuwa safari hii Mahakama itajikita zaidi katika kutatua migogoro kwa njia ya usuluhishi na sio kutumia hukumu katika kila jambo.

Aidha, Mhe. Ngwembe alitoa angalizo kwa wananchi kwamba Mahakama haitaacha kazi yake ya msingi ya kutoa hukumu bali itatoa hukumu kwa mashauri yatakayobidi kutolewa hukumu kwa mashauri yaliyoshindwa kufikia muafaka kwa njia ya usuluhishi.

Naye mshiriki toka klabu ya Moro Runners, Albert Nziolela alitoa shukrani zake kwa uongozi wa Mahakama kwa kuandaa michezo hiyo kwani imesaidia kuwaleta karibu na Mahakama na kuongeza kuwa wamegundua Mahakama sio adui bali ni Rafiki. Amesema wataitumia nafasi ya Wiki ya Sheria kufika katika mabanda ya Mahakama ili wajifunze zaidi.

Bonanza la michezo lilianza kwa mbio fupi za kilomita tano ambazo ilikuwa na washiriki toka klabu zote za kukimbia zilizoko Morogoro mjini, washiriki toka taasisi na mabenki, wananchi, wadau na watumishi wa Mahakama Kanda ya Morogoro ambapo walishiriki michezo mbalimbali, ikiwemo kuvuta kamba, mbio za mita mia nne, kukimbiza kuku, kukimbia ndani ya magunia, mpira wa kikapu na mpira wa miguu.

Aidha katika michezo hiyo, washindi walipata bahati ya kutunukiwa vyetu vya kutambua mchango wao na baada ya michezo wote walioshiriki walipata nafasi ya kupata chakula cha pamoja na mgeni rasmi.

 Jaji Mfawidhi wa Mahakama Kuu ya Tanzania, Kanda ya Morogoro, Mhe. Paul Ngwembe akizungumza na wananchi (hawapo kwenye picha) waliofurika katika Viwanja vya Jamhuri kushiriki bonaza la kuhamasisha Wiki ya Sheria inayoanza kesho tarehe 22 Januari, 2023.

Naibu Msajili wa Mahakama Kuu ya Tanzania, Kanda ya Morogoro, Mhe. Augustina Mbando akifuatilia matukio mbalimbali uwanjani hapo.

Jaji Mfawidhi wa Mahakama Kuu ya Tanzania, Kanda ya Morogoro, Mhe. Paul Ngwembe (kushoto) na Jaji wa Mahakama Kuu ya Tanzania katika Kanda hiyo, Mhe. Gabriel Malata (kulia) wakimalizia mbio za kilometa tano ikiwa ni sehamu ya bonanza hilo.

Sehemu ya wananchi waliojitokeza kushiriki bonaza hilo.

Sehemu ya wananchi wakimalizia mbio za kilometa tano katika uwanja wa Jamhuri.

Jaji Mfawidhi wa Mahakama Kuu ya Tanzania, Kanda ya Morogoro, Mhe. Paul Ngwembe pamoja na wananchi wakipasha ndani ya uwanja wa Jamhuri mara baada ya kushiriki mbio za kilometa tano.