MAKAMU WA RAIS AONGOZA WATANZANIA UZINDUZI WIKI YA SHERIA

Na Faustine Kapama-Mahakama, Dodoma

Makamu wa Rais wa Jamhuri ya Muungano wa Tanzania, Mhe. Dkt. Philip Mpango leo tarehe 22 Januari, 2023 ameongoza maelefu ya Watanzania kwenye matembezi maalum yaliyoandaliwa na Mahakama ya Tanzania kuashiria uzinduzi wa Wiki ya Sheria inayoambatana na utoaji wa elimu ya kisheria kwa wananchi.

Matembezi hayo yaliyoshirikisha viongozi mbalimbali wa Mahakama ya Tanzania, akiwemo Jaji Mkuu wa Tanzania, Mhe. Prof. Ibrahim Hamis Juma, Jaji Kiongozi wa Mahakama Kuu ya Tanzania, Mhe. Mustapher Siyani, Majaji wa Mahakama ya Rufani na Mahakama Kuu na watendaji wengine yalianzia katika Kituo Jumuishi cha Utoaji Haki Dodoma na kumalizikia katika Viwanja vya Nyerere Square.

Mongoni mwa viongozi wengine ambao wameshiriki kwenye matembezi hayo ni Jaji Mkuu wa Zanzibar, Mhe. Khamis Ramadhan Abdalla, Mwanasheria Mkuu wa Serikali, Mhe. Dkt. Eliezer Feleshi, Mkuu wa Mkoa wa Dodoma, Mhe. Rosemary Senyamule, Mkuu wa Wilaya ya Dodoma, Mhe. Jabiri Shekimweri na wajumbe wa Tume ya Utumishi wa Mahakama.

Wadau mbalimbali wa Mahakama, wakiwemo Ofisi ya Mwanasheria Mkuu wa Serikali, Ofisi ya Wakili Mkuu wa Serikali, Ofisi ya Taifa ya Mashtaka, Ofisi ya Mkemia Mkuu wa Serikali, Tume ya Haki za Binadamu, Chama cha Majaji na Mahakimu Wanawake (TAWJA), Polisi, Magereza na Chama cha Wanasheria Tanganyika (TLS) wameshiriki katika maandamano hayo kwa wingi.

Vikundi mbalimbali vya kukimbia (jogging) pamoja na bendi ya JKT Makutupora vimeshiriki katika kunogesha matembezi hayo. Wananchi walianza kujitokeza kwenye matembezi hayo majira ya saa 11 asubuhi ambayo yalianza majira ya saa 12 hivi baada ya viongozi mbalimbali kufika katika eneo ambalo yalianzia.

Ilichukua takribani saa moja na nusu hivi kwa viongozi na wanachi kuwasili katika Viwanja vya Nyerere Square ambapo Makamu wa Rais alianza kutembelea Banda la Kituo  cha Usuluhishi na kupatiwa maelezo namna kinavyofanya kazi na Naibu Msajili wa Mahakama Kuu ya Tanzania, Mhe. Wanjah Hamza.

Katika maelezo yake mafupi, Mhe. Wanjah amemweleza Makamu wa Rais kuwa Kituo hicho kimefanikiwa kusuluhisha mashauri mbalimbali yanayopokelewa katika Mahakama Kuu ya Tanzania, Kanda ya Dar es Salaam na kuokoa zaidi ya billioni 12 za Kitanzania, fedha ambazo zingelipwa na wadaawa kama wengeamua kumaliza migogoro yao kwa njia ya kawaida ya kusikiliza mashauri.

Mhe. Dkt. Mpango ameonyesha kufurahishwa na utendaji wa Kituo hicho, hivyo kuhimiza Mahakama ya Tanzania kuendelea kutoa elimu kwa wananchi kuhusu utaratibu wa kumaliza mashauri kwa njia ya usuluhishi, hatua ambayo ina manufaa makubwa, ikiwemo kumaliza mashauri kwa muda mfupi na kwa gharama nafuu.

Makamu wa Rais pia alitembelea mabanda mengine ikiwemo lile Usimamizi Mashauri, Tume ya Haki za Binadamu na Utawala Bora pamoja na Wizara ya Ardhi. Akiwa katika banda la Wizara hiyo, Mhe. Dkt. Mpango alieleza jinsi migogoro ya ardhi inavyosumbua wananchi na kuagiza Mabaraza ya Ardhi kujitazama upya kwa vile utendaji kazi wake hauridhishi.

Baada ya kutembelea mabanda ya maoenyesho yaliyoandaliwa na wadau mbalimbali, Makamu wa Rais aliongozana na viongozi wengine kuelekea kwenye jukwa kuu ambapo wimbo wa Taifa ulipigwa kabla ya shughuli zingine kwenye ufunguzi huo wa Wiki ya Sheria kuendelea.

Sambamba na Elimu ya Sheria na maonesho yatakayofanyika Kitaifa katika Mji Mkuu wa Tanzania, Dodoma, utoaji wa elimu ya sheria kwa umma na maonesho utaendelea pia katika Kanda za Mahakama Kuu, Mikoa na Wilaya nchi nzima kama ilivyofanyika kwa miaka mingine.

Kwa mwaka huu, katika maadhimisho haya ya Wiki ya Sheria na Siku ya Sheria, kauli mbiu itakuwa Umuhimu wa Utatuzi wa Migogoro kwa Njia ya Usuluhishi Katika Kukuza Uchumi Endelevu: Wajibu wa Mahakama na Wadau.

Makamu wa Rais wa Jamhuri ya Muungano wa Tanzania, Mhe. Dkt. Philip Mpango (katikati) akiongoza wananchi kushiriki kwenye matembezi maalum yaliyofanyika leo tarehe 22 Januari, 2023 jijini Dodoma kuashiria uzinduzi wa Wiki ya Sheria nchini.

Makamu wa Rais wa Jamhuri ya Muungano wa Tanzania, Mhe. Dkt. Philip Mpango (mwenye track suit nyeusi) pamoja na viongozi wengine, akiwemo Jaji Mkuu wa Mahakama ya Tanzania wa Tanzania, Mhe. Prof. Ibrahim Hamis Juma (mwenye t-shirt nyeupe) wakiwa katika Viwanja vya Nyerere Square wakipasha baada ya kushiriki kwenye matembezi hayo.

Pasha pasha ikiendelea (picha ya juu na chini).

Makamu wa Rais wa Jamhuri ya Muungano wa Tanzania, Mhe. Dkt. Philip Mpango (wa kwanza kushoto) akipokea maelezo kutoka kwa Naibu Msajili wa Mahakama Kuu ya Tanzania, Mhe. Wanjah Hamza alipokuwa katika banda la Kituo cha Usuluhishi.

Makamu wa Rais wa Jamhuri ya Muungano wa Tanzania, Mhe. Dkt. Philip Mpango akiuliza swali alipokuwa kwenye banda hilo.

Makamu wa Rais wa Jamhuri ya Muungano wa Tanzania, Mhe. Dkt. Philip Mpango akiwa katika banda la Usimamizi wa Mashauri. Picha chini, Makamu wa Rais akiwa katika banda la Tume ya Usuluhishi na Uamuzi.

Bendi ya Jeshi la Magereza ikiongoza maandamano hayo.

Wananchi kutoka maeneo mbalimbali (juu na chini) wakishiriki maandamano yaliyoandaliwa na Mahakama ya Tanzania kuashiria uzinduzi wa Wiki ya Sheria.

Sehemu nyingine ya wananchi (juu na chini) waliojitokeza kwenye maandamano hayo.

Sehemu nyingine ya tatu ya wananchi (juu na chini) kutoka maeneo mbalimbali  wakishiriki maandamano yaliyoandaliwa na Mahakama ya Tanzania kuashiria uzinduzi wa Wiki ya Sheria.