MAHAKAMA MKOANI PWANI KUANZA WIKI YA SHERIA KIAINA

Na Eunice Lugiana-Mahakama, Pwani

Katika kuelekea uzinduzi wa Wiki ya Sheria nchini, Mahakama ya Hakimu Mkazi Kibaha mkoani hapa imeandaa maandamano makubwa yatakayowashirikisha wananchi na wadau mbalimbali wa Mahakama ili kuazimisha shughuli hiyo muhimu.

Akiongea na Waandishi wa Habari ofisini kwake leo tarehe 20 Januari, 2023, Hakimu Mkazi Mfawidhi wa Mahakama hiyo, Mhe. Joyce Mkhoi amesema maandamano hayo yataanzia kwenye viwanja vya Mahakama ya Hakimu Mkazi Kibaha nakuishia kwenye viwanja vya Mailimoja stendi ya zamani.

“Katika kuelekea Wiki ya Sheria na kilele ya Siku ya Sheria, elimu za kisheria zitatolewa katika maeneo mbalimbali ya Wilaya ya Kibaha na eneo la Magindu ambalo lipo mbali kutoka Mahakama ya Hakimu Mkazi,” alisema.

Akifafanua kauli mbiu ya mwaka huu “Umuhimu wa utatuzi wa migogoro kwa njia ya usuluhishi katika kukuza uchumi endelevu; Wajibu wa Mahakama na wadau,” Mhe. Mkhoi amesema kauli mbiu hiyo imejikita zaidi kupunguza msongamano wa mashauri mahakamani na pia kuweka amani baina ya wadaawa.

Hakimu huyo amebainisha kuwa mashauri yanamalizika kwa njia ya usuluhishi huleta amani tofauti na kusikiliza kesi  mpaka mwisho ambako kunaweza kunaleta uadui. Kadhalika, alisema usuluhishi unaoka muda na fedha pia kwa wadaawa.

Mhe. Mkhoi ameeleza kuwa jamii imekua na mwitikio mdogo kujua au kufanya usuluhishi licha ya kwamba kuna Mabaraza ya Kata ya usuluhishi, Mabaraza ya Wilaya ya usuluhishi pamoja na Baraza la Usuluhishi la masuala ya kazi.

Akijibu swali kuhusu mashauri yanayofunguliwa na kumalizika kwa mwaka, Mhe. Mkhoi amesema kwa Mkoa wa Pwani mashauri ya jinai ni mengi zaidi kuliko yale ya madai.

Amesema kwa mwaka uliopita mashauri yaliyofunguliwa yalikua 153 na yaliyosikilizwa yalikuwa 244. Takwimu hizi zinajumuisha na mashauri yaliyobaki mwaka juzi ambayo ni 139, hivyo mwaka huu umeanza na mashauri ya zamani 48.

Hakimu Mkazi Mfawidhi wa Mahakama hiyo, Mhe. Joyce Mkhoi akizungumza na Waandishi wa Habari (hawapo kwenye picha) kuhusu Wiki na Siku ya Sheria nchini kwa mwaka 2023.

Mwonekano wa mbele wa Mahakama ya Hakimu Mkazi Kibaha.