KAMATI YA TATHMINI YA MAHAKAMA YAINGIA KAZINI

Na Faustine Kapama-Mahakama, Arusha

Mafunzo ya siku tatu ya namna ya kufanya tathmini za zabuni za wataalam washauri wa usanifu majengo na usimamimizi wa miradi ya ujenzi yaliyokuwa yanatolewa kwa watumishi wa Mahakama 63 wenye kada mbalimbali katika Kituo Jumuishi cha Utoaji Haki jijini hapa yamehitimishwa leo tarehe 5 Januari, 2023, hatua inayoiwezesha Kamati ya Tathmini iliyoundwa kuchambua maombi ya Wazabuni 138 ya miradi mipya ya Mahakama kuingia kazini.

Akizungumza wakati wa kuhitimisha mafunzo hayo, Mkuu wa Kitengo cha Maboresho cha Mahakama ya Tanzania, Mhe. Dkt. Angelo Rumisha amesisitiza kuwa miradi yote inayoenda kutekelezwa kwa awamu ya pili ambayo ni ujenzi wa Vituo Jumusihi vya Utoaji Haki zaidi ya tisa na Mahakama za Mwanzo 60 lazima zikamilike mwezi Juni, 2024.

"Mvua inyeshe, jua liwake, lazima miradi hii ikamilike Juni, 2024 ili tuweze kubaki na mwaka mmoja wa matazamio. Haya tunayofanya tuyafanye wote, tushirikiane, tufanye kazi kwa pamoja kwa kuzingatia uwajibikaji na taaluma zetu," alisema.

Mhe. Dkt. Rumisha aliwaambia wahitimu hao wa mafunzo kuwa watakapokuwa wanatekeleza jukumu lililombele yao wanapaswa kujiuliza kama wale wataalamu watakaowapitisha watafanya kazi zao kwa weledi na kwa wakati.

Katika kipindi cha siku tatu watumishi hao walipitishwa katika maeneo kadhaa kuhusu ufanyaji wa tathmini za zabuni na wawezeshaji wabobezi kwenye mada hiyo, akiwemo Mtaalamu wa Manunuzi kutoka Benki ya Dunia, Mhandisi Raymond Mbishi, Mtaalamu wa Manunuzi kutoka Chuo cha Elimu ya Biashara (CBE), Bw. Jackson Musiba na Mhandisi kutoka Mahakama ya Tanzania, Bw. Fredrick Pondamali.

Kwa wakati fulani, wawezeshaji hao walijikuta katika mazingira ambayo hawakutegemea kufuatia mwitikio mkubwa, michango na maswali ya “moto” kutoka kwa washiriki hao ambao walidhihirisha wazi kuelewa mada zilizokuwa zinawasilishwa.

Akizungumza kabla ya kuhitimishwa mafunzo hayo, Bw. Musiba aliwaomba watumishi hao kuichukulia miradi inayoenda kutekelezwa kama mafanikio kwa Mahakama, hivyo hawana budi kujiepusha na ubinafsi. Amesisitiza usimamizi mzuri wa mikataba na uimarishaji wa mahusiano mema na watendaji ili kufikia mafanikio yanayotarajiwa.

Mahakama ya Tanzania, kupitia Kitengo cha Maboresho, iliandaa mafunzo maalumu kwa watumishi wa kada mbalimbali wakiwemo Wahandisi, Wasanifu majengo, Maafisa Ugavi, Mahakimu, Wasajili, Wahasibu, Wachumi na Watakwimu kuwajengea uwezo katika masuala yanayohusu ufanyaji wa tathmini za zabuni.

Hatua hiyo inafuata baada ya kupata maombi 138 kutoka kwenye makampuni ambayo yanataka kutoa ushauri kuhusu masuala ya usanifu majengo pamoja na usimamizi wa miradi ya ujenzi.

Baada ya mafunzo hayo, Kamati hiyo ya Tathmini inaenda kujichimbia kwa siku kadhaa kufanya zoezi la tathmini kujua wazabuni wapi wanafaa kufanya kazi hizo.

Mkuu wa Kitengo cha Maboresho cha Mahakama ya Tanzania, Mhe. Dkt. Angelo Rumisha akisisitiza jambo alipokuwa anahitimisha mafunzo ya namna ya kufanya tathmini za zabuni za wataalam washauri wa usanifu majengo na usimamimizi wa miradi ya ujenzi yaliyokuwa yanatolewa kwa watumishi 63 wa Mahakama.

Mtaalamu wa Manunuzi kutoka Chuo cha Elimu ya Biashara (CBE), Bw. Jackson Musiba akiwasilisha mada kabla ya kufungwa mafunzo hayo.

Mhandisi kutoka Mahakama ya Tanzania, Bw. Fredrick Pondamali akisisitiza jambo wakati wa mafunzo hayo.

Sehemu ya watumishi waliokuwa wanashiriki mafunzo hayo (juu na chini) wakimsikiliza Mkuu wa Kitengo cha Maboresho cha Mahakama ya Tanzania, Mhe. Dkt. Angelo Rumisha (hayupo kwenye picha).

Sehemu nyingine ya watumishi waliokuwa wanashiriki mafunzo hayo (juu na chini) wakimsikiliza Mkuu wa Kitengo cha Maboresho cha Mahakama ya Tanzania, Mhe. Dkt. Angelo Rumisha (hayupo kwenye picha) wakati anahitimisha mafunzo hayo.