MWILI WA JAJI UTAMWA WAAGWA DAR; AMWAGIWA SIFA LUKUKI

Na Mary Gwera, Mahakama

Jaji Mkuu wa Tanzania, Mhe. Prof. Ibrahim Hamis Juma leo tarehe 05 Januari, 2023 ameshiriki pamoja na Majaji wengine wa Mahakama ya Tanzania, Waziri wa Katiba na Sheria ndugu jamaa na marafiki katika ibada ya kumuaga aliyekuwa Jaji Mfawidhi wa Mahakama Kuu Kanda ya Iringa, marehemu Jaji Dkt. John Utamwa aliyefariki dunia tarehe 02 Januari, 2023.

Akitoa neno mara baada ya ibada hiyo iliyofanyika katika kanisa ya Mtakatifu Albano Posta jijini Dar es Salaam, Mhe. Prof. Juma amemtaja marehemu Jaji Utamwa kama Jaji msomi ‘Intellectual Judge’ ambaye alifanya kazi yake ya ujaji kwa umakini na alitumiwa muda kufanya tafiti za masuala mbalimbali.

“Kifo cha Jaji Utamwa kilitushtua Mahakama na kimeacha simanzi kubwa, kwangu mimi Jaji Utamwa nilimchukulia kama Jaji msomi ‘Intellectual Judge’ ambaye alifanya kazi yake kwa weledi mkubwa na vilevile alipenda kufanya utafiti,” amesema Jaji Mkuu.

Jaji Mkuu amemtaja pia marehemu kama mtu mwenye utani na vilevile alikuwa na  mchango mkubwa ndani ya Mahakama kutokana na uzoefu wake wa kufanya kazi mrefu katika Mhimili huo, ambapo alikuwa mjumbe wa Kamati mbalimbali ikiwemo ya Kamati ya Jaji Mkuu ya Kanuni ‘Chief Justice Rules Committee’.

Mhe. Prof. Juma alichukua nafasi hiyo pia kutoa shukrani kwa Madaktari, wauguzi wa Hospitali ya Taifa Muhimbili (MNH), Mahakama familia kwa kutoa msaada wa karibu wakati marehemu Jaji Utamwa akiwa amelazwa katika hospitali hiyo. Ameongeza kwa kuahidi kuwa, Mahakama itaendelea kushirikiana kwa karibu na familia ya marehemu Jaji Utamwa.

Akitoa salaam za Serikali kwa niaba ya Rais wa Jamhuri ya Muungano wa Tanzania, Mhe. Dkt. Samia Suluhu Hassan naye Waziri wa Katiba na Sheria, Mhe. Dkt. Damas Ndumbaro amesema kuwa, wamesikitishwa na kifo cha Jaji Utamwa na kueleza kuwa, Taifa limempoteza mtu muhimu kwenye tasnia ya sheria nchini.

Kwa upande wake Mwenyekiti wa Kamati ya Jaji Mkuu ya Kanuni ‘CJ’s Rules Committee’, Mhe. Rehema Mkuye amekiri kuwa Kamati hiyo imestushwa na kifo cha mjumbe wake, huku akitaja kuwa marehemu alikuwa mjumbe makini ambaye alikuwa akitoa hoja zenye kujenga na hivyo pengo lake halitazibika.

Kadhalika, Mwakilishi wa ‘Summit’ Chama ambacho marehemu alikuwa moja ya waanzilishi, Mhe. Jacobs Mwambegele amesema kuwa marehemu alikuwa mwanachama hai wa umoja huo ambapo aliweza kuchangia mawazo na hata michango licha ya kuwa mbali na Dar es Salaam. Mhe. Mwambegele ameongeza kuwa kabla ya umauti, takribani siku 12 nyuma marehemu alimpa ujumbe awafikishie wanachama wa chama hicho ambapo kati ya ujumbe aliowatumia ni kupendana na kushiriki.

Naye Mwakilishi wa familia ameishukuru Mahakama ya Tanzania, MNH, majirani, ndugu, jamaa na marafiki kwa kushirikiana nao kwa karibu tangu ugonjwa hadi kufariki kwa Jaji Utamwa.

Ibada hiyo iliyoanza mida ya saa 7 mchana imehudhuriwa na Baadhi ya Viongozi na Watumishi wastaafu wa Mahakama akiwemo, Jaji Mkuu Mstaafu, Mhe. Barnabas Samatta, baadhi ya Majaji wa Mahakama ya Rufani (T), Majaji wa Mahakama Kuu ya Tanzania, Waziri wa Katiba na Sheria, Naibu Wasajili wa Mahakama, Watendaji, Mawakili, wake wa Majaji, ndugu jamaa na Marafiki.

Marehemu amekuwa akisumbuliwa na tatizo la shinikizo la Damu ambapo tarehe 17 Desemba, 2022 alilazwa katika Hospitali ya Mkoa wa Iringa. Mnamo tarehe 18 Desemba, 2022 alihamishiwa katika Hospitali ya Taifa Muhimbili kuendelea kupatiwa matibabu hadi mauti yalipomfika.  

Marehemu Jaji Dkt. Utamwa alijiunga na Mahakama ya Tanzania tarehe 17 Februari, 1992 akianzia ngazi Hakimu Mkazi. Alipanda ngazi mbali mbali ndani ya Mahakama na hatimaye aliteuliwa na Mhe. Rais wa Jamhuri ya Muungano wa Tanzania kuwa Jaji wa Mahakama Kuu ya Tanzania tarehe 24 Juni, 2010. Akiwa Jaji wa Mahakama Kuu ya Tanzania, Marehemu Jaji Dkt. Utamwa alifanya kazi katika kanda za Dar es Salaam, Tabora, Mbeya na Iringa.

Mwili wa Jaji Dkt. Utamwa unatarajiwa kuzikwa siku ya Jumamosi, tarehe 07 Januari, 2023 katika Kijiji cha Msemembo kilichopo Wilaya ya Manyoni mkoani Singida.

Jaji Mkuu wa Tanzania, Mhe. Prof. Ibrahim Hamis Juma (aliyeketi benchi la mbele kulia) akiwa katika ibada maalum ya kumuaga aliyekuwa Jaji Mfawidhi wa Mahakama Kuu ya Tanzania, Kanda ya Iringa, Mhe. Dkt. John Utamwa. Ibada hiyo imefanyika leo tarehe 05 Januari, 2023 katika Kanisa yla Mtakatifu Albano Posta jijini Dar es Salaam.

Sehemu ya Majaji wa Mahakama Kuu ya Tanzania wakiingiza kanisani jeneza lenye mwili wa aliyekuwa Jaji Mfawidhi wa Mahakama Kuu ya Tanzania-Kanda ya Iringa, Mhe. Dkt. John Utamwa.

Familia ya marehemu Jaji Utamwa i.e  watoto wakiongozwa na mjane wa marehemu (katikati) wakiwa kwenye ibada ya kuaga mwili wa mpendwa wao.

Jaji Mkuu Mstaafu wa Tanzania, Mhe. Barnabas Samatta (wa kwanza kushoto) akiwa katika ibada ya kuaga mwili wa marehemu Jaji Dkt. Utamwa. Ibada hiyo ilifanyika katika kanisa Mt. Albano Posta jijini Dar es Salaam. wa kwanza kushoto kwa Jaji Samatta ni Waziri wa Katiba na Sheria, Mhe. Dkt. Damas Ndumbaro. Aliyesimama wa kwanza kulia ni Jaji Mkuu wa Tanzania, Mhe. Prof. Ibrahim Hamis Juma.

Jaji Mkuu wa Tanzania, Mhe. Prof. Ibrahim Hamis Juma akitoa neno mara baada ya ibada ya kuaga mwili wa marehemu Jaji Utamwa.

Waziri wa Katiba na Sheria, Mhe. Dkt. Damas Ndumbaro akitoa neno mara baada ya ibada hiyo.

SEHEMU YA PICHA ZA VIONGOZI NA WANAFAMILIA WAKITOA NENO LA SHUKRANI KATIKA IBADA YA KUAGA MWILI WA MAREHEMU JAJI UTAMWA

Jaji Mkuu wa Tanzania, Mhe. Prof. Ibrahim Hamis Juma akiaga mwili wa marehemu Jaji Utamwa leo tarehe 05 Januari, 2023.

Zoezi la kuaga mwili wa marehemu Jaji Utamwa likiendelea.

Watumishi wa Mungu wakiongoza ibada ya kuaga mwili  wa marehemu Jaji Utamwa iliyofanyika leo tarehe 05 January, 2023 katika kanisa la Mtakatifu Albano Posta jijini Dar es Salaam.