MKUU WA MKOA RUVUMA ATOA KONGOLE KWA MAHAKIMU KWA KUIMARISHA UADILIFU

Na Tiganya Vincent-Mahakama, Namtumbo

Mkuu wa Mkoa wa Ruvuma, Kanali Laban Thomas amewapongeza Mahakimu mkoani kwake kwa kuwatumikia wananchi kwa uadilifu, jambo ambalo limesaidia kutokuwepo kwa malalamiko dhidi yao.

Ametoa kauli hiyo tarehe 5 Januari, 2023 wakati wa hafla fupi ya ufunguzi wa majengo manne ya Mahakama za Wilaya ya Namtumbo, Nanyumbu, Tandahimba na Ngara iliyofanyika katika viwanja vya Mahakama ya Wilaya Namtumbo mkoani Ruvuma.

Kanali Thomas alisema katika vikao vya Kamati ya Maadili ya Mahakimu walivyokaa hakuna lalamiko lolote lililotolewa na wananchi dhidi ya Mahakimu hao.

Aliwataka kuendelea kuwatumikia wananchi kwa kufuata haki na maelekezo ya sheria ili waendelee kuwa kioo kwa jamii katika kuzingatia maadili ya kazi zao.

Aidha Mkuu wa Mkoa huyo alisema kwa kuzingatia kuwa Mahakama ndio chombo pekee cha utoaji haki hapa nchini, Serikali ya Mkoa wa Ruvuma itaendeleza ushirikiano uliopo, ikiwemo kuwapatia maeneo ya ujenzi wa miundombinu ili kuwawezesha wananchi kupata haki katika mazingira ya karibu.

Kanali Thomas alisema Serikali ya Mkoa kwa kushirikiana na Mamlaka za Serikali za Mitaa wanaendelea kushughulikia eneo la ujenzi wa Kituo Jumuishi cha Utoaji Haki katika Manispaa ya Songea.

Alisema zoezi hilo linaendelea vizuri na baada ya muda mfupi Mahakama ya Tanzania itapatiwa eneo kwa ajili ya ujenzi wa jengo hilo, hivyo kusogeza huduma ya utoaji haki karibu na wananchi. 

Jaji Mfawidhi wa Mahakama Kuu ya Tanzania Kanda ya Songea, Mhe. Dkt. Yose Mlyambina alisema kumekuwepo na ushirikiano mzuri kati ya Serikali na Mahakama, jambo ambalo limesaidia uboreshaji wa utoaji wa huduma kwa wananchi.

Mkuu wa Mkoa wa Ruvuma Kanali Laban Thomas akitoa salamu za Serikali wakati wa hafla ya uzinduzi wa majengo ya Mahakama ya Wilaya ya Namtumbo, Tandahimba, Nanyumbu na Ngara uliofanyika tarehe 5 Januari, 2023.

Mwenyekiti wa Kamati ya Bunge ya Katiba na Sheria, Mhe. Dkt. Joseph Mhagama akitoa salamu za Bunge wakati wa hafla hiyo.

Sehemu ya viongozi wa Mahakama wakifuatilia matukio mbalimbali katika hafla hiyo.

Kikundi cha Mganda kikitumbuiza wakati wa hafla ya uzinduzi wa majengo ya Mahakama ya Wilaya ya Namtumbo, Tandahimba, Nanyumbu na Ngara.

Jaji Kiongozi wa Mahakama Kuu ya Tanzania, Mhe. Mustapher Siyani akipanda mti ikiwa ni kumbukumbu ya uzinduzi wa Mahakama za Wilaya ya Namtumbo, Nanyumbu, Tandahimba na Ngara.

Jaji Kiongozi wa Mahakama Kuu ya Tanzania, Mhe. Mustapher Siyani akitoa hotuba ya uzindizi wa majengo ya Mahakama za Wilaya ya Namtumbo , Nanyumbu, Ngara na Tandahimba.

Jaji Mfawidhi wa Mahakama Kuu ya Tanzania Kanda ya Songea, Mhe. Dkt. Yose Mlyambina akitoa salamu za Kanda wakati wa hafla ya uzinduzi wa majengo ya Mahakama hizo za Wilaya.