JUDICIARY OF TANZANIA: WANANCHI WAJITOKEZA KWA WINGI UZINDUZI WA WIKI YA SHERIA NCHINI

Na Waandhishi Wetu-Mahakama ya Tanzania

Wananchi nchini kote leo tarehe 22 Januari, 2023 wamejitokeza kwa wingi kushiriki kwenye matembezi maalum kuashiria uzinduzi wa Wiki ya Sheria huku Majaji Wafawidhi wa Mahakama Kuu ya Tanzania katika maeneo mbalimbali wakitoa ujumbe mahsusi kwa Watanzania kujitokeza na kupata elimu ya sheria itakayotolewa katika maonyesho yaliyoandaliwa na wadau wa Mahakama.

Kutoka Mahakama Kuu Musoma, Fransisca Swai anaripoti kuwa Jaji Mfawidhi wa Mahakama Kuu ya Tanzania, Kanda ya Musoma, Mhe. Fahamu Mtulya, amewaasa wananchi kutumia wiki hii kujipatia elimu mbalimbali ya kisheria na hasa juu ya haki za watoto, kwani watoto wengi wanatendewa mambo yasiyofaa.

“Kama jamii tunayohaki ya kuwasaidia wananchi na zaidi kutumia usuluhishi nje ya Mahakama katika kutatua migogoro katika jamii zetu,” alisema na kisha aliwaalika wananchi kufika maeneo yote yaliyoandaliwa katika Mkoa kwa ajili ya kupata elimu mbalimbali itakayotolewa na Mahakama na Wadau.

Akizungumza katika hafla hiyo, Mkuu wa Mkoa wa Mara, Meja Jenerali Selemani Mzee ameipongeza Mahakama kwa kauli mbiu ya mwaka huu na kuwaasa wananchi kutumia usuluhishi kama njia kuu ya kutatua matatizo yao na kusisitiza njia ya usuluhishi inaleta amani, maelewano na umoja katika jamii , hivyo kusaidia kuimarisha uchumi wa mtu mmoja mmoja na taifa kwa ujumla.

Naye Mkuu wa Wilaya ya Musoma, Mhe. Halfani Haule amewaasa wananchi kutumia usuluhishi kwa kuwa utapunguza migogoro na kuleta amani. Kadhalika, ameishukuru Mahakama kwa namna inavyoshirikiana na wadau katika kuhakikisha mashauri yanaamuliwa kwa wakati na haki inatendeka, jambo ambalo linaloleta amani hasa katika Wilaya ya Musoma.

Jaji Mfawidhi wa Mahakama Kuu ya Tanzania, Kanda ya Musoma, Mhe. Fahamu Mtulya (juu) na Mkuu wa Mkoa wa Mara, Meja Jenerali Selemani Mzee (chini) wakizungumza na wananchi katika siku ya ufunguzi wa maadhimisho ya Wiki ya Sheria ambayo yemeanza leo tarehe 22 Januari, 2023 nchini kote.

Jaji Mfawidhi wa Mahakama Kuu ya Tanzania, Kanda ya Musoma, Mhe. Fahamu Mtulya (wa pili kushoto) akipasha misuri na sehemu ya wananchi waliojitokeza kwenye maandamano kuashiria uzinduzi wa Wiki ya Sheria nchini.

Kutoka Mahakama Kuu Mbeya, Ibrahim Mgallah anaripoti kuwa Jaji Mfawidhi wa Mahakama Kuu ya Tanzania, Kanda ya Mbeya, Mhe. Rose Ebrahim ameongoza matembezi maalum kuashiria uzinduzi wa maadhimisho ya Wiki na Siku ya Sheria nchini kwa mwaka 2023. Katika uzinduzi huo yamefanyika matembezi kuanzia Mahakama Kuu Mbeya na kuishia katika kituo cha mabasi Kabwe mahali itakapotolewa elimu ya sheria kwa wananchi hadi tarehe 29 Januari, 2023.

Akizungumza katika baada ya matembezi hayo, Mhe. Ebrahim aliwaeleza wananchi kuwa elimu ya sheria itatolewa kupitia vyombo vya habari, maonesho, kutembelea shule mbalimbali na magereza.

Aidha, aliwashauri wananchi kutumia njia ya usuluhishi kutatua migogoro yao ili kuepuka kutumia muda mwingi mahakamani badala yake watumie muda huo katika shughuli za uzalishaji.

“Utatuzi wa migogoro ya wananchi unapaswa kuzingatia njia za usuluhishi ili kupunguza ufuatiliaji wa migogoro yao Mahakamani na badala yake muda huo wautumie kufanya shughuli za uzalishaji na kukuza kipato ili kukuza uchumi wa taifa letu na wananchi wenyewe kwa ujumla,” alisema Jaji Mfawidhi.

Naye Mkuu wa Wilaya Mbeya, Mhe. Dkt. Rashid Chuachua ameishukuru Mahakama ya Tanzania kwa kuandaa maudhui ambayo yanalenga kuimarisha zaidi umoja, amani, udugu na mshikamano kwa Watanzania.

Jaji Mfawidhi wa Mahakama Kuu ya Tanzania, Kanda ya Mbeya, Mhe. Rose Ebrahim akisisitiza jambo alipokuwa anaongea na wananchi waliojitokeza kushiriki kwenye uzinduzi wa Wiki ya Sheria.

Bendi kutoka Jeshi la Magereza ikiongoza maandamano. Picha chini wananchi wakishiriki kwenye maandamano hayo.

Naye Stephen Kapiga-Mahakama Mwanza anaripoti kuwa maadhimisho ya Wiki ya Sheria yamefanyika kwa mara ya kwanza katika Wilaya ya Ilemela, hivyo kuwaacha na butwa wananchi wengi wa Kata ya Buswelu ambao hawakuwahi kuwaona Majaji wakitembea kwa miguu.

Maadhimisho haya yalitanguliwa na maandamamo ya watumishi wa mahakama, wadau pamoja na wananchi ambayo yaliongozwa na Jaji Mfawidhi wa Mahakama Kuu ya Tanania, Kanda ya Mwanza, Mhe. Dkt. Ntemi Kilekamajenga. Maandamano hayo yalipokelewa na Kaimu Mkuu wa Mkoa wa Mwanza ambaye pia ni Mkuu wa Wilaya ya Magu, Mhe. Salumu Kalli.

Akizungumza katika hafla hiyo, Jaji Mfawidhi aliwashukuru wote kwa kuitikia na kukubali kujumuika na Mahakama katika uzinduzi huo kwani ni fursa kwa wananchi kuweza kujifunza mengi na kupata msaada wa kisheria.

“Napenda kuwakaribisha wote muweze kufika na kupata huduma zetu na za wadau wetu. Umuhimu wa utatuzi wa migogoro kwa njia ya usuluhushi ndilo jambo tunalohitaji kwa sasa kwani hii inafanya wadaawa wote waondoke mahakamani wakiwa na amani na furaha,” alisema.

Nae Mhe. Kalli aliishukuru Mahakama ya Tanzania kwa kuona umuhimu wa kutanguliza usuluhishi kwani hii itasaidia kuokoa muda ambao wananchi walikuwa wakiuutmia kuja mahakamani.

Jaji Mfawidhi wa Mahakama Kuu ya Tanania, Kanda ya Mwanza, Mhe. Dkt. Ntemi Kilekamajenga akizungumza na wananchi katika uzinduzi wa Wiki ya Sheria.

Kaimu Mkuu wa Mkoa wa Mwanza ambaye pia ni Mkuu wa Wilaya ya Magu, Mhe. Salumu Kalli (katikati) akizumgumza na wananchi (hawapo katika picha).

Jaji Mfawidhi wa Mahakama Kuu ya Tanania, Kanda ya Mwanza, Mhe. Dkt. Ntemi Kilekamajenga (mbele) akijiandaa kuongoza maandamano.

Kutoka Manyara, Christopher Msagati anaripoti kuwa Jaji Mfawidhi wa Mahakama Kuu ya Tanania, Kanda ya Manyara, Mhe. John Kahyoza ameongoza maandamano ya watumishi wa Mahakama Kuu Kanda ya Manyara, Mahakama ya Hakimu Mkazi Manyara, Mahakama ya Wilaya ya Babati, Mahakama za Mwanzo Babati na wananchi kwa ujumla kushiriki katika maandamano maalum yaliyoandaliwa kuashiria uzinduzi wa Wiki ya Sheria nchini.

Katika maandamano hayo ambayo Mkuu wa Wilaya ya Babati, Mhe. Lazaro Twange ameshiriki, wadau wa haki jinai pamoja na wananchi wa Wilaya ya Babati wameshuhudia kufana kwa uzinduzi wa maadhimisho ya Wiki ya Sheria nchini kwa Mwaka huu 2023 yaliyofanyika kwa mara ya kwanza tangu kuanzishwa kwa Mahakama Kuu Kanda mpya ya Manyara mnamo Mwezi Novemba mwaka 2022.

Katika uhafla hiyo, Mhe. Kahyoza alimueleza Mkuu wa Wilaya lengo la kukutana ambalo ni kuelezea umuhimu wa Wiki ya Sheria pamoja na kuwafanya wananchi watambue kuwa Mahakama ipo kwa ajili yao, hususan kuwasaidia kupata haki zao za msingi.

Watu wote waliohudhuria walipata nafasi ya kushuhudia maonesho mbalimbali yaliyoandaliwa na watumishi wa Mahakama, Ofisi ya Mwendesha Mashtaka wa Serikali, TAKUKURU pamoja na TAWJA. Aidha, umati ulikoshwa na namna ambavyo Mahakama ya Tanzania inavyojiboresha katika miundombinu ya majengo na matumizi ya TEHAMA.

Kwa upande wake, Mhe. Twange ambaye alimuwakilisha Mkuu wa Mkoa wa Manyara. Mhe. Charles Makongoro alisema kuwa katika taasisi ambazo zinakuwa katika matumizi makubwa ya TEHAMA ni pamoja na Mahakama ambayo imekuwa mfano mzuri wa kuigwa na Taasisi zingine.

Jaji Mfawidhi wa Mahakama Kuu ya Tanania, Kanda ya Manyara, Mhe. John Kahyoza akizungumza na wananchi.

Sehemu ya watumishi wa Mahakama, Kanda ya Manyara wakimsikiliza Mhe. Kahyoza (hayupo kwenye picha).

Sehemu ya watumishi wa Mahakama, Kanda ya Manyara wakijiandaa kushiriki kwenye maandamano.

Naye Advela Kalunde kutoka Mahakama Njombe ameripoti kuwa Hakimu Mkazi Mkuu wa Mahakama ya Hakimu Mkazi Njombe, Mhe. Liad Chamshama amewakaribisha wananchi wote kufika katika viwanja vya Bakita kuanzia kesho kwa ajili ya kupata elimu mbalimbali itakayotolewa na wadau mbalimbali katika viwanja hivyo mpaka tarehe 29 Januari, 2023.

Katibu tawala ambaye alikua kiongozi wa maandamano hayo amewasii wananchi kufika katika viwanja hivyo ili waweze kupata elimu ya sheria, huku akisisitiza kuwa kauli mbiu ya mwaka huu inalenga kuondoa migogoro katika jamii.

Matembezi hayo yalianzia katika viwanja vya Bank ya NBC Tawi la Njombe yakijumuisha wadau mbalimbali wa Mkoa wa Njombe, wakiwemo Ofisi ya Mwendesha Mashtaka wa serikali, TAKUKURU, CMA, Huduma kwa jamii, Mawakili, Watumishi wa Mahakama, Polisi, Magereza, vikundi mabilimbali vya michezo pamoja na wanachi. Maandamano hayo yaliishia katika viwanja vya shule ya Msingi Bakita.

Wananchi kutoka Mkoa wa Njombe wakishiriki kwenye maandamano.

Wananchi wakiwa kwenye viwanja baada ya kushiriki maandamano.

Kwa upande wake Eunice kutoka Mahakama ya Hakimu Mkazi Kibaha anaripoti kuwa Mkuu wa Wilaya ya Kibaha, Mhe. Sarah Msafiri amewataka wananchi kutenga muda wa kutembelea mabanda yanayotoa elimu ya sheria. Amesema kuwa katika Wilaya ya Kibaha migogoro mingi ni ya ardhi ambapo kumekua na uadui mwingi, hivyo amewaomba wananchi wapate elimu ili waweze kutatua migogoro hiyo nje ya Mahakama.

Aidha, Mkuu huyo wa Wilaya amempongeza Rais wa Jamhuri ya Muungano wa Tanzania, Mhe. Dkt. Samia Suluhu Hasasn kwa kutenga kiasi cha bilioni 96 za Kitanzania kwa ajili ya ujenzi wa Mahakama mbalimbali nchini, ikiwemo Kituo Jumuishi cha Utoaji Haki Mkoa wa Pwani ambacho kitajengwa katika Wilaya ya Kibaha. Amesema Kituo hicho kitachukua vitengo vyote vinavyojihusisha na utoaji haki pamoja na Mahakama zote kuanzia Mahakama ya Mwanzo mpaka Mahakama Kuu.

Awali, akimkaribisha mgeni rasmi kuzungumza na wananchi, Hakimu Mkazi Mfawidhi wa Mahakama ya Hakimu Mkazi Kibaha, Mhe. Joyce Mkhoi amesema usuluhishi wa migogoro nje ya Mahakama unaleta uchumi mzuri na hivyo kupunguza umaskini kwa kutumia muda mrefu kuhudhuria mahakamani kusikiliza kesi badala ya kufanya kazi nyingine za uchumi ili kuongeza kipato.

Mhe. Mkhoi amesema Mahakama pamoja na wadau wataweza kukumbusha wajibu wao katika kuhakikisha kesi ambayo inaweza kuisha kupitia usuluhishi basi ikaisha katika njia hiyo badala ya kupoteza muda mwingi mahakamani.