WATANZANIA KWANZA

·Jaji Kiongozi awaambia Mawakili wa Kujitegemea

·Awataka kutokuwa vikwazo kwenye mchakato wa usuluhishi

· Ashauri TLS kufanya utafiti ushiriki wa wananchama kwenye usuluhishi

Na Faustine Kapama-Mahakama, Dodoma

Jaji Kiongozi wa Mahakama Kuu ya Tanzania, Mhe. Mustapher Siyani amewataka Mawakili wa Kujitegemea kuwatumikiwa Watanzania kwanza wanapotekeleza majukumu yao katika mnyororo mzima wa utoaji haki na kujiepusha kuwa vikwazo wakati wa utatuzi wa migogoro kwa njia ya usuluhishi.

Mhe. Siyani ametoa wito huo leo terehe 25 Januari, 2023 alipokuwa anaongea na Waandishi wa Habari baada ya kutembelea mabanda ya maonesho ya Wiki ya Sheria ya utoaji wa elimu na msaada wa kisheria ambayo yameandaliwa na Mahakama ya Tanzania na wadau mbalimbali katika Viwanja vya Nyerere Square jijini hapa.

“Nimezungumza mara kadhaa, ni sauti inayozungumzwa na watu wengi kuhusu ushiriki wa Mawakili kwenye usuluhishi. Mawakili wana nafasi kubwa, pengine kuliko Wasuluhishi wengine, wakiamua mashauri yafanikiwe kwenye usuluhishi, hivyo msiwe vikwazo (katika kufanikisha utaratibu huu),” Jaji Kiongozi amesema.

Mhe. Siyani amebainisha kuwa Mawakili wa Kujitegemea ni muhimu katika mnyororo wa haki kwa vile wanayo nafasi ya kusaidia upatikanaji wa haki kwa haraka, hivyo wanapaswa kutambua kuwa pamoja na haki yao ya kupata kipato wanao kwanza wajibu kwa Watanzania.

“Natambua kila kazi ina kipato lakini katika kazi hii ya sheria msingi wake wa kwanza siyo kipato, kipato ni kitu kinachofuata baadaye. Bado Mawakili wanaweza kutumia usuluhishi na kupata kipato kinachostahili kwa sababu sheria katika nchi yetu zipo zinazoonyesha Wakili anastahili kupata nini kwa shauri la aina gani litakaloshughulikiwa,” amesema.

Jaji Kiongozi ametoa wito kwa Chama cha Mawakili Tanganyika (TLS) kufanya tafiti kuangalia ushiriki wa Mawakili katika usuluhishi upo kwa kiwango gani na kupitia utafiti huo kuzungumza na wanachama wake ili kuwahamasisha kushiriki moja kwa moja na kufanikisha usuluhishi.

“Chama cha Mawakili ni nguzo ya haki katika nchi yetu kwa sababu kinarahisisha kazi ya Mahakama katika kutatua migogoro. TLS ifanye utafiti ili kujua mchango wa Mawakili kwenye usuluhishi, sisi tunaamini utatuzi wa haraka wa migogoro utachochea ukuaji wa uchumi na tungependa migogoro itatuliwe kwa usuluhishi,” amesema.

Kabla ya kuongea na Vyombo vya Habari, Jaji Kiongozi alipata fursa ya kutembelea na kukagua mabanda mbalimbali, ikiwemo lile la Jeshi la Polisi, Uhamiaji, Kituo cha Sheria na Haki za Binadamu, Mamlaka ya Kuthibiti na Kupambana na Dawa za Kulevya, Mkemia Mkuu wa Serikali, Magereza, Taasisi ya Usuluhishi na Kituo cha Huduma Bora kwa Mteja.

Ameelezea kufurahishwa jinsi taasisi nyingi za kiserikali na binafsi zilivyojitokeza katika viwanja hivyo kwa ajili ya kuwahudumia wananchi. Kadhalika, Mhe. Siyani amejionea wananchi ambao wamejitokeza kupata huduma ya elimu na ufahamu juu ya mambo mbalimbali yanayohusu sheria na haki.

“Hii ni fursa ya wiki nzima ambayo kwa upande wa Mahakama hupatikana mara moja kwa ajili ya wananchi kutoa kero zao, kuuliza maswali na kupata majibu ambayo yatawasaidia wanapotafuta haki zao kupitia vyombo vya sheria ambavyo vipo katika nchi yetu,” amesema.

Jaji Kiongozi amebainisha pia kuwa ameridhika, baada ya kukagua mabanda na kuona jinsi washiriki walivyojiandaa na kujipanga, kuwa wananchi watakaofika katika viwanja hivyo watapata elimu ya kutosha itakayowasaidia wanapoendelea na utatuzi wa migogoro.

“Naamini mwananchi mwenye ufahamu juu ya jambo lolote lile anayo nafasi nzuri zaidi ya kulielezea jambo hilo kuliko yule ambaye halifahamu. Tunapozungumza kuhusu haki ni vema mwananchi aelewe anachokidai, asikimbilie mahakamani bila kujua angalau viashiria au vyanzo muhimu vya kile anachokidai na wiki hii ya sheria ni fursa ya kujifahamisha na kuuliza maswali,” Mhe. Siyani amesema.

Jaji Kiongozi ametumia fursa hiyo kuwaalika wananchi wote kwa mara nyingine kufika katika viwanja hivyo. Amewaomba Waandishi wa Habari kuwafikia wananchi kadri inavyowezekana ili wafahamu uwepo wa maonesho hayo na watembelee viwanja hivyo au wafuatilie vipindi katika vituo mbalimbali ili waweze kufahamu kinachoendelea.

Jaji Kiongozi wa Mahakama Kuu ya Tanzania, Mhe. Mustapher Siyani akizungumza na Vyombo vya Habari kwenye Viwanja vya Nyerere Square jijini Dar es Salaam leo tarehe 25 Januari, 2023 baada ya kutembelea mabanda ya maonesho ya Wiki ya Sheria.

Mwakilishi wa Chama cha Mawakili Tanganyika Dodoma, Mhe. Deusdedith Nyabiri (katikati mwenye kipaza sauti) akitoa maelezo kwa Jaji Kiongozi wa Mahakama Kuu ya Tanzania, Mhe. Mustapher Siyani(wa kwanza kulia).

Jaji Kiongozi wa Mahakama Kuu ya Tanzania, Mhe. Mustapher Siyani (katikati) akipokea maelezo alipotembelea banda la Mahakama la Huduma Bora kwa Mteja.

Mtumishi kutoka Taasisi ya Usuluhishi akitoa maelezo kwa Jaji Kiongozi wa Mahakama Kuu ya Tanzania, Mhe. Mustapher Siyani (mwenye miwani) alipotembelea banda lao.

Jaji Kiongozi wa Mahakama Kuu ya Tanzania, Mhe. Mustapher Siyani akieleza jambo alipotembelea banda la Jeshi la Magereza.

Jaji Kiongozi wa Mahakama Kuu ya Tanzania, Mhe. Mustapher Siyani akiuliza swali alipokuwa kwenye banda la Ofisi ya Mkemia Mkuu wa Serikali.

Mtumishi kutoka Mamlaka ya Kuthibiti na Kupambana na Dawa za Kulevya akitoa maelezo kwa Jaji Kiongozi wa Mahakama Kuu ya Tanzania, Mhe. Mustapher Siyani alipotembelea banda lao.

Jaji Kiongozi wa Mahakama Kuu ya Tanzania, Mhe. Mustapher Siyani akieleza jambo alipokuwa kwenye banda la Kituo cha Sheria na Haki za Binadamu.

Jaji Kiongozi wa Mahakama Kuu ya Tanzania, Mhe. Mustapher Siyani akipata maelezo alipotembelea banda la Idara ya Uhamiaji.

Askali Polisi akitoa maelezo ya shughuli wanazofanya kwa Jaji Kiongozi wa Mahakama Kuu ya Tanzania, Mhe. Mustapher Siyani (wa tatu kushoto) alipotembelea banda la Jeshi la Polisi.