WATUMISHI, WADAU MAHAKAMA MANYONI WAFANYA MATENDO YA HURUMA WAKIHITIMISHA WIKI YA SHERIA

Na Faustine Kapama-Mahakama, Manyoni

Watumishi na wadau mbalimbali wa Mahakama katika Wilaya ya Manyoni leo tarehe 29 Januari, 2023 wamehitimisha maadhimisho ya Wiki ya Sheria kwa kufanya matendo ya huruma katika Hospitali ya Wilaya ya Manyoni.

Katika kuonyesha upendo na jinsi wanavyoijali jamii ya Watanzania, watumishi na wadau hao, wakiwemo Maafisa Ustawi wa Jamii na Mawakili wa Kujitegemea wametoa msaada wa vitu mbalimbali katika wodi ya wazazi katika hospitali hiyo.

“Sisi ni watumishi wa Mahakama, tumeungana na wadau wetu kuja kuwaona na kuwapa zawadi kidogo,” Hakimu Mkazi wa Mahakama ya Mwanzo Manyoni Mjini, Mhe. Masatu Magesa, aliyeongoza msafara huo aliwaambia wazazi katika wodi hiyo.

Amesema kuwa kwa muda wa wiki nzima Mahakama ya Tanzania ilikuwa inaadhimisha Wiki ya Sheria kwa kutoa msaada na elimu ya kisheria bure kwa wananchi katika maeneo mbalimbali ndani ya Wilaya ya Manyoni.

“Tumeona tuje tuwasalimie tunapohitimisha maadhimisho haya. Tumeandaa zawadi kidogo kwa ajili yenu, tunaomba muipokee. Nyinyi ni watu muhimu sana kwetu, tunaowajibu wa kuwatumikia. Bila nyinyi Mahakama haiwezi kuwepo,” alisema.

Kwa upande wake, Wakili wa Kujitegemea, Msomi Keneth Nangawe, akizungumza baada ya kushiriki zoezi hilo alisema kuwa wao kama wadau wa Mahakama wameungana pamoja kuwatembelea ndugu zao katika hospitali hiyo.

“Hawa ni Watanzania wenzetu, kuja kwetu hapa ni ishara kuwa tupo kwa ajili ya kuihudumia jamii, hivyo tukaona siyo mbaya sisi kushiriki nao na kuwapa chochote ambacho tumebarikiwa na Mungu ili kuonyesha kuwa sisi hatupo mbali nao, bali tupo pamoja,” alisema.

Kwa upande wake, Afisa Ustawi wa Jamii katika Wilaya ya Manyoni, Bi. Ashura Jumbe, amesema kuwa jambo walilofanya watumishi na wadau wa Mahakama kutoa kitu chochote katika hospitali hiyo ni jambo kubwa na wameonyesha kwamba wao hawapo kwa ajili ya kuhukumu kesi pekee, bali pia kuihudumia jamii.

“Jambo ambalo wamelifanya kutoa zawadi kwenye wodi ya wazazi ni kubwa na linaleta faraja. Kama tulivyoona, wazazi wamefurahia, mimi kitu kikubwa cha kusema ni asante, nasema asanteni sana na tunashukuru kwa moyo ambao mmeuonyesha,” alisema.

Kwa muda wa wiki nzima kuanzia tarehe 22 Januari, 2023, Mahakama ya Tanzania imekuwa ikiadhimisha Wiki ya Sheria katika maeneo mbalimbali nchini kwa watumishi na wadau wake kutoa msaada na elimu ya kisheria bure kwa wananchi. Maadhimisho ya Siku ya Sheria yatafanyika kitaifa jijini Dodoma tarehe 1 Februari, 2023 na mgeni rasmi atakuwa Rais wa Jamhuri ya Muungano wa Tanzania, Mhe. Dkt. Samia Suluhu Hassan.

Watumishi na wadau mbalimbali wa Mahakama katika Wilaya ya Manyoni wakiwa katika picha ya pamoja kwenye maeneo ya Hospitali ya Wilaya ya Manyoni kabla ya kufanya matendo ya huruma.

Watumishi na wadau mbalimbali wa Mahakama katika Wilaya ya Manyoni wakielekea katika Wodi ya Wazazi kwenye hospitali hiyo.

Watumishi na wadau mbalimbali wa Mahakama katika Wilaya ya Manyoni wakijiandaa kuingia kwenye wodi hiyo.

Hakimu Mkazi wa Mahakama ya Mwanzo Manyoni Mjini, Mhe. Masatu Magesa (wa pili kulia) akitoa maelezo mafupi kwa wazazi kabla ya kufanya matendo ya huruma.

Maafisa Ustawi wa Jamii wa Wilaya ya Manyoni (juu na chini) wakitoa zawadi mbalimbali kwa wazazi.

Zoezi la utoaji zawadi (juu na chini) likiendelea.

Hakimu Mkazi wa Mahakama ya Mwanzo Manyoni Mjini, Mhe. Masatu Magesa (juu) akikabidhi zawadi, huku mtumishi mwingine wa Mahakama (chini) naye akifanya tendo la huruma.

Wakili wa Kujitegemea, Msomi Keneth Nangawe (juu na chini) akikabidhi zawadi kwa wazazi. 

Wakili wa Kujitegemea, Msomi Keneth Nangawe (kushoto) pamoja na mtumishi wa Mahakama wakimkabidhi mwangalizi wa wazazi (kushoto) zawadi zingine baada ya zoezi la matendo ya huruma kufanyika.