JAJI KOMBA AWAPONGEZA WATUMISHI KWA KUCHAPA KAZI, KUTUNZA MAZINGIRA

Na Francisca Swai-Mahakama, Musoma

Jaji wa Mahakama Kuu ya Tanzania, Kanda ya Musoma, Mhe. Marline Komba amewapongeza watumishi wa Mahakama ya Wilaya Rorya kwa utendaji kazi mzuri na utunzaji wa mazingira.

Mhe. Komba alitoa pongezi hizo tarehe 27 Machi, 2023 alipofanya ziara ya kuzitembelea Mahakama za Mwanzo na Mahakama ya Wilaya Rorya ili kukagua shughuli mbalimbali za kimahakama na kujionea mazingira ya utendaji kazi.

Jaji huyo alimpongeza Hakimu Mkazi Mfawidhi wa Mahakama ya Wilaya Rorya, Mhe. Tumaini Marwa kwa jitihada kubwa za kutunza mazingira na kuwahimiza watumishi wote kuendelea kuchapa kazi licha ya uchache wao.

Ilibainika kuwa katika kipindi hiki cha mvua wamefanikiwa kupanda jumla ya miti 1,200 kwenye Mahakama zote za Mwanzo na Wilaya Rorya ikiwa ni sehemu ya kulinda mipaka ya maeneo ya Mahakama.

Aidha, Jaji Komba pamoja na msafara wake walifanikiwa kutembelea mradi wa ujenzi wa Mahakama ya Mwanzo Kinesi uliotakiwa kukamilika mwezi Oktoba 2022 na kumsisitiza Mkandarasi PEK Brothers kukamilisha mradi huo mapema ili jengo hilo la kisasa lianze kutumika katika kuwahudumia wananchi.

Naye Naibu Msajili wa Mahakama Kuu ya Tanzania, Kanda ya Musoma, Mhe. Frank Moshi aliwapongeza Mahakimu kwa namna wanavyosikiliza mashauri na kuyamaliza kwa wakati. Aliwaasa kuendelea kufanya kazi kwa upendo na umoja.

Kwa upande wake, Mtendaji wa Mahakama katika Kanda hiyo, Bw. Festo Chonya aliwapongeza watumishi kwa uadilifu, hasa katika makusanyo ya maduhuli na kuwaasa waendelee kuwa makini kwa kujiridhisha iwapo malipo yamepokelewa kabla ya kukata stakabadhi.

 

 Jengo linalotumika kwa sasa kwa ajili ya shughuli za Mahakama ya Mwanzo Kinesi.

 

Mwonekano wa jengo jipya la Mahakama ya Mwanzo Kinesi.

Jaji wa Mahakama Kuu ya Tanzania, Kanda ya Musoma, Mhe. Marline Komba (katikati) akiwa katika picha ya pamoja na watumishi wengine mbele ya jengo jipya la Mahakama ya Mwanzo Kinesi. Wengine ni Naibu Msajili, Mhe. Frank Moshi (wa tatu kushoto), Hakimu Mkazi Mfawidhi wa Mahakama ya Wilaya Rorya, Mhe. Tumaini Marwa (wa pili kushoto), Mtendaji wa Mahakama Kanda, Bw. Festo Chonya (wa tatu kulia) na wengine.

Jaji wa Mahakama Kuu ya Tanzania, Kanda ya Musoma, Mhe. Marline Komba pamoja na msafara wake wakikagua maeneo ya Mahakama ya Mwanzo Riagoro.

Jaji wa Mahakama Kuu ya Tanzania, Kanda ya Musoma, Mhe. Marline Komba, akiwa katika picha ya pamoja na viongozi mbalimbali wa Kanda ya Musoma pamoja na watumishi wa Mahakama ya Mwanzo Riagoro.

(Habari hii imehaririwa na FAUSTINE KAPAMA-Mahakama, Dar es Salaam)