MSAJILI MKUU AKAGUA ENEO LA UJENZI WA MAHAKAMA KUU GEITA

Na Charles Ngusa-Mahakama, Geita

Msajili Mkuu wa Mahakama ya Tanzania, Mhe. Wilbert Chuma hivi karibuni alifanya ziara katika Mahakama ya Hakimu Mkazi Geita kwa lengo la kukagua eneo linalopendekezwa kujengwa Mahakama Kuu katika Mkoa wa Geita.

Katika ziara hiyo, Mhe Chuma aliambatana na Naibu Msajili wa Mahakama Kuu ya Tanzania, Kanda ya Mwanza, Mhe. Chiganga Tengwa na kupokelewa na watumishi wa Mahakama ya Hakimu Mkazi Geita na Mahakimu ya Wilaya Geita.

Baada ya kupata taarifa za awali, Msajili Mkuu aliendelea na ziara yake ya kukagua eneo hilo ili kuona kama lina sifa zinazohitajika na miundombinu iliyopo.

Kadhalika, Mhe. Chuma alitembelea jengo la Mahakama ya Mwanzo Nyankumbu ambalo litatumiwa kwa muda na Mahakama ya Hakimu Mkazi. Pia alikagua eneo lililokuwa likitumiwa na Halmashauri ya Wilaya Geita, ambapo Mahakama ya Mwanzo na Mahakama ya Wilaya Geita zitahamia hapo katika zoezi zima la kupisha ujenzi wa Mahakama Kuu.

Akiongea na watumishi baada ya kutembelea maeneo hayo, Msajili Mkuu aliwahimiza viongozi walioshiriki mafunzo ya mfumo mpya wa usimamizi wa mashauri (advanced case management) kuwafundisha maafisa wa Mahakama kwa kuwa wao ndiyo watakuwa watumiaji wa mfumo huko kwa asilimia kubwa.

Mhe. Chuma pia alihimiza watumishi kuendelea kufanya kazi kwa weledi na bidii. Naye Naibu Msajili aliahidi kutoa elimu aliyoipata kwa walengwa wote.

(Habari hii imehaririwa na FAUSTINE KAPAMA-Mahakama, Dar es Salaam)

 

Msajili Mkuu wa Mahakama ya Tanzania akiteta jambo na viongozi katika ziara yake.

Msajili Mkuu wa Mahakama ya Tanzania, Mhe. Wilbert Chuma akikagua masijala ya Mahakama ya Mwanzo Nyankumbu katika jengo ambalo itahamia Mahakama ya Hakimu Mkazi Geita.

Msajili Mkuu wa Mahakama ya Tanzania, Mhe. Wilbert Chuma akiwa katika picha ya pamoja na viongozi wengine wa Mahakama, akiwemo Naibu Msajili wa Mahakama Kuu ya Tanzania, Kanda ya Mwanza, Mhe. Chinganga Tengwa (wa pili kushoto).