KAMATI ULINZI NA USALAMA RUKWA YAFANYA ZIARA MAHAKAMA KUU SUMBAWANGA

Na. Mayanga Someke – Mahakama Kuu Sumbawanga

Kamati ya Ulinzi na Usalama Mkoa wa Rukwa hivi karibuni ilifanya ziara katika Mahakama Kuu Sumbawanga kujadili changamoto za ukatili wa kijinsia, hasa zile zinazowakumba watoto katika Mkoa huo.

 Katika ziara yake, Kamati hiyo ikiongozwa na Mkuu wa Mkoa, Mhe. Queen Sendiga ilikutana na uongozi wa Mahakama chini ya Jaji Mfawidhi wa Mahakama Kuu ya Tanzania, Kanda ya Sumbawanga, Mhe. Amiri Mruma ambapo mkutano kujadili changamoto hizo ulifanyika ofisini kwake.

“Mkoa wa Rukwa una changamoto za ukatili wa kijinsia na watoto wa mitaani wamekuwa wengi, hii inachangiwa na kukosekana kwa elimu kwa wananchi. Ukatili huu unawakumba sana watoto na wananchi hawataki kupeleka masuala haya Polisi kuhofia urasimu,” alisema Mkuu wa Mkoa huyo.

Alibainisha kuwa kama Mkoa lazima kuwe na mikakati ya kukomesha hali hiyo, ikiwemo ustawi wa jamii kuandaa walimu rafiki kwa ajili ya kutoa elimu kwa wananchi, kupata askari wapelelezi watakaoshughulikia aina hiyo ya makosa, dhamana kutotolewa kwa watuhumiwa wa makosa hayo na kuruhusu Waandishi wa Habari kutoa taarifa za matokeo ya kesi hizo.

Akizungumza katika kikao hicho, Jaji Mfawidhi alisema kuwa makosa hayo yanawagusa pia Mahakama kama sehemu ya jamii na Mahakimu na Majaji wanaongozwa na sheria wanapaswa kuzifuata kwa kutenda haki kwa wote.

“Kuna tatizo pia katika upelelezi wa mashauri haya, wengi wao hawawezeshwi kifedha kufanya upelelezi wa kina.Vipimo vya vina saba (DNA) havifanyiki ili kusaidia kuthibitisha makosa haya. Sheria yetu ya Makosa ya Jinai inautaka upande wa mashitaka kuthibitisha shitaka bila kuacha shaka yoyote, hivyo ni muhimu Waendesha Mashtaka na Wapelelezi kutekeleza majukumu yao kwa weledi mkubwa. Madaktari nao watekeleze majukumu yao kwa weledi wakati wanafanya uchunguzi wa makosa haya,” alisema.

Hata hivyo, Mhe. Mruma aliiambia Kamati hiyo kuwa dhamana ni haki ya kikatiba kwa mshitakiwa kwa mujibu wa Ibara ya 13 ya Katiba. Alisema suala la Waandishi wa Habari kutoa taarifa za hukumu kwa umma halina tatizo na inaruhusiwa kisheria.

Jaji Mfawidhi alizungumzia suala la utoaji elimu kwa umma kuhusu makosa ya ukatili wa kijinsia na kwamba Mahakama ipo tayari kutoa maafisa wake ili kushiriki zoezi hilo. Aliahidi kuwa Mahakama Kanda ya Sumbawanga ipo tayari kutoa ushirikiano katika uendeshaji wa kesi za makosa ya ukatili wa kijinsia.

Mkuu wa Mkoa wa Rukwa, Mhe. Queen Sendiga akiwa katika ofisi ya Jaji Mfawidhi wa Mahakama Kuu, Kanda ya Sumbawanga, Mhe. Amir Mruma.

Mkuu wa Mkoa wa Rukwa na wajumbe wa kamati ya ulinzi na wakimsikiliza Jaji Mfawidhi.

Jaji Mfawidhi wa Mahakama Kuu, Kanda ya Sumbawanga, Mhe. Amir Mruma akifafanua hoja zilizoibuliwa na Mkuu wa Mkoa wa Rukwa wakati wa kikao cha kujadili changamoto za ukatili wa kijinsia kwa watoto.

(Habari hii imehaririwa na FAUSTINE KAPAMA-Mahakama, Bagamoyo)