·Yaanzisha Sema na Mahakama mpya
·Ni mfumo wa kielekroniki wa kutoa, kupokea maoni, mrejesho
Na
Faustine Kapama`– Mahakama, Morogoro
Mahakama ya Tanzania
imeanzisha mfumo mpya wa kielekroniki (e-complaint) uitwao
“Sema na Mahakama” utakaotumika katika kutoa na kupokea maoni, maulizo
na malalamiko (mrejesho) kutoka kwa wananchi.
Mfumo huu unatarajiwa
kurahisisha njia za uwasilishaji wa maoni na kuongeza uwazi katika
kushughulikia maoni, malalamiko na kuweza kukusanya taarifa sahihi kutoka kwa wananchi
na wadau wa Mahakama kwa ujumla.
Akizungumza kwenye mahojiano maalumu pembeni mwa mafunzo
yanayofanyika mjini Morogoro ambayo yameandaliwa na Mahakama ya Tanzania kwa
Naibu Wasajili na Watendaji kutoka Kanda zote za Mahakama hapa nchini, Naibu
Msajili kutoka Idara ya Usimamizi na Ukaguzi wa Shughuli za Kimahakama na
Maadili, Mhe. Kinabo Minja amesema kuwa mfumo huo umeletwa ili kuimarisha mawasiliano
kati ya Mahakama na mwananchi kuhusu huduma zinazotolewa katika mchakato mzima
wa utoaji haki.
“Kwa kupitia mfumo huu,
mwananchi anaweza kuwasilisha maoni, malalamiko au pongezi kwa Mahakama aidha kwa
kutumia simu yake mwenyewe, kwa kuandika ujumbe mfupi au kwa kupiga. Lakini pia
anaweza kwenda kwenye mfumo wenyewe kwa kupitia kompyuta yake au njia ya e-mail
na kuliwasilisha,” alisema.
Amesema hapo awali
hapakuwepo na mfumo wa kielektroniki uliokuwa unatumika kuwaunganisha wananchi
na Mahakama katika kujua huduma zinazotolewa, hivyo ujio wake utaleta mapinduzi
makubwa na kurahisisha mawasiliano ambayo yatawezesha kupatikana kwa taarifa
sahihi na uwepo wa usimamizi mzuri wa kushughulikia malalamiko.
“Mfumo huu mpya wa Sema
na Mahakama ni mpana zaidi, unajumuisha mrejesho unaopokelewa kupitia kituo cha Huduma kwa Mteja na kupitia njia nyingine
za uwasilishaji wa mrejesho wanazotumia wananchi, ikiwemo ujumbe mfupi wa
maneno, email na nyingine,” Mhe. Minja alifafanua.
Alieleza kuwa ili kuboresha
huduma na kupata taarifa nzuri na sahihi imewalazimu kuja na mfumo huo wa
kielektroniki ambao pia utasaidia kuwa na usimamizi makini wa ushughulikiaji wa
malalamiko.
Mhe. Minja alieleza kuwa
ushughulikiaji wa malalamiko kwa njia ambazo siyo za kielektroniki wakati
mwingine unachangamoto kwenye usimamizi. Amesema kuna Mahakama nyingi nchi
nzima kuweza kufuatilia kila moja namna wanavyoshughulikia malalamiko na utoaji
wa mrejesho kwa wananchi, hivyo itakuwa rahisi zaidi kama mfumo huo mpya
utatumika.
“Mfumo wa kielekroniki unatusaidia
mambo mengi, ikiwemo usimamizi mzuri na kurahisisha uwasilishaji wa malalamiko
kuliko ile ya mwananchi kulazimika kuja mahakamani kwa ajili ya kuandikisha
lalamiko lake. Mfumo huu pia unasadia katika kupata taarifa sahihi. Taarifa
ikiwa katika hali ya kielekroniki haibadiliki badiliki. Pamoja na kurahisisha,
mfumo huu vilevile unasaidia kuona kile kinachoendelea,” alisema.
Akifungua mafunzo kuhusu
mfumo huo kwa Naibu Wasajili na Watendaji wa Mahakama yanayofanyika katika
Ukumbi wa Magadu mjini hapa, Jaji Mfawidhi wa Mahakama Kuu ya Tanzania, Kanda
ya Morogoro, Mhe. Paul Ngwembe alisema kuwa hatua mbalimbali zilizochukuliwa na zinazoendelea
kuchukuliwa na Mahakama katika kushughulikia changamoto mbalimbali zitaongeza kiwango
cha imani ya wananchi kwa huduma zinazotolewa.
Amesema anaamini kupitia mafunzo hayo watapata ujuzi wa usimamizi wa
mfumo huo ili uwawezeshe kushughulikia maoni, maulizo na malalamiko ya wananchi
kielektroniki. “Tunatarajia kuwa baada ya mafunzo haya mtakwenda kuwafundisha
maafisa malalamiko walio katika Kanda zenu na kwa ujuzi mtakaoupata, mtasimamia
na kuhakikisha kuwa maoni, maulizo na malalamiko yanawasilishwa na
kushughulikiwa kwa wakati kupitia mfumo huu,” alisema.
Mhe. Ngwembe alisisitiza kwamba lengo la kufikia asilimia
80% ya kuridhika kwa wananchi na huduma zinazozitolewa na Mahakama kwa mwaka
2025 haliwezi kufikiwa kwakuwa na mfumo mzuri wa kutoa na kupokea mrejesho pekee,
bali kuwa na maafisa wenye weledi na kujituma katika kutekeleza wajibu wao.
Hakuna maoni:
Chapisha Maoni