DR MPANGO MGENI RASMI MKUTANO WA MAJAJI MWANZA

Na Stephen Kapiga-Mahakama, Mwanza

Makamu wa Rais wa Jamhuri ya Muungano wa Tanzania, Mhe. Dkt. Philipo Isdory Mpango anatarajiwa kesho tarehe 12 Aprili, 2023 kuwa mgeni rasmi katika ufunguzi wa Kikao cha Mpango Kazi wa Mahakama ya Tanzania.

Akizungumza na Waandishi wa Habari leo tarehe 11 Aprili, 2023 jijini hapa katika Mahakama ya Wilaya Nyamagana, Msajili Mkuu wa Mahakama ya Tanzania, Mhe. Wilbard Chuma alisema Kikao Kazi hicho kitafanyika katika ukumbi wa Malaika Beach na kitahudhuliwa na Majaji wote wa Mahakama ya Tanzania.

“Kikao hiki ni muhimu kwani ndio nguzo kuu ya kupima utendaji kazi wetu kwa kuzingatia Mpango Mkakati wa Mahakama wa 2020/2021 - 2024/2025 ambao unalenga maboresho mengi, ikiwemo majengo, mifumo ya TEHAMA na watumishi kwa ujumla, lengo likiwa kuongeza imani kwa wananchi,” alisema.

Mhe. Chuma aliwaeleza Waandishi hao kuhusu mfumo mpya wa usajili wa mashauri ujulikanao kama “e-Case Management” ambao utarahisisha utunzaji wa kumbukumbu za mashauri mahakamani.

Naye Mtendaji Mkuu wa Mahakama ya Tanzania, Prof. Elisante Ole Grabiel alielezea juu ya maboresho kwa watumishi wa Mahakama.

“Tunarajia kupitia maboresho kwa ujumla juu ya rasilimali watu ndani ya Mahakama na hasa stahiki zao ili kuwawezesha kufanya kazi kwa weledi na kwa kuzingatia Mpango Mkakati wa Mahakama ya Tanzania,” alisema.

Kwa upande wake, Mkuu wa Kitengo cha Maboresho cha Mahakama ya Tanzania, Mhe. Dkt. Anjelo Rumisha aliwaeleza Waandishi hao kuhusu maboresho ya maundombinu ya majengo ya Mahakama, ikiwemo ujenzi wa Vituo Jumuishi vya Utoaji Haki sita katika mikoa minne mpaka sasa.

“Vituo hivi vipo katika Mikoa ya Mwanza, Morogoro, Dodoma, Arusha na Dar es Saalam ambapo kuna Vituo viwili. Ndani ya Vituo hivi kuna huduma zote za wadau ikiwemo Mawakili wa Serikali, Mawakili binafsi, dawati la jinsia na nyingine nyingi. Mkakati ulipo sasa ni kujenga majengo haya kwenye kila Mkoa ambao una Mahakama Kuu ili kuweza kusogeza huduma za kimahakama karibu na jamii,” alisema.

Katika mkutano huo, Majaji watapata fursa ya kupitia vigezo mbalimbali vya utendaji kazi vilivyowekwa mwaka 2014 walipokaa katika kikao kama hicho kwa mara ya kwanza.

Pia mada mbalimbali zimeandaliwa kutoka kwa wataalamu na wabobezi wa masuala ya upimaji na utendaji wa Mahakama. Katika Mkutano huo, Mahakama kupitia Majaji hao itapata nafasi ya kujitafakari ilipo kikanda, kibara na kimataifa ili kuendelea kutoa huduma bora kwa wananchi.

 Msajili Mkuu wa Mahakama ya Tanzania, Mhe. Wilbert Chuma akisisitiza jambo wakati akiongea na wanahabari katika ukumbi wa Mahakama ya Wilaya Nyamagana leo tarehe 11 Aprili, 2023 juu ya kikao cha Majaji wa Tanzania.

Mtendaji Mkuu wa Mahakama ya Tanzania, Prof. Elisante Ole Gabriel akiongea na Waandishi wa Habari (hawapo pichani) kuhusu makakati wa uboreshaji rasilimali watu ikiwa ni moja ya agenda itakayozungumziwa katika kikao cha Majaji wa Tanzania kesho ya tarehe 12 Aprili 2024.

Mkuu wa Kitengo cha Maboresho cha Mahakama ya Tanzania, Mhe. Dkt. Anjelo Rumisha akiongea na Waandishi wa Habari (hawapo pichani) wakati akielezea juu ya maboresho ya miundombinu ya Mahakama.

Msajili mkuu wa Mahakama ya Tanzania, Mhe. Wilbert Chuma (katikati) akiwa pamoja na Mtendaji Mkuu wa Mahakama ya Tanzania, Prof. Elisante Ole Gabriel (kushoto) na Mkuu wa Kitengo cha Maboresho cha Mahakama ya Tanzania, Mhe. Dkt. Anjelo Rumisha (kushoto) alipokuwa anazungumza na Waandishi wa Habari (hawapo pichani).

(Habari hii imehaririwa na FAUSTINE KAPAMA-Mahakama, Mwanza)