MAKAMU WA RAIS AFUNGUA KIKAO KAZI KUTATHMINI UTENDAJI MAHAKAMANI

• Asifu mageuzi makubwa ya kiutendaji yaliyofanyika

Na Faustine Kapama-Mahakama, Mwanza

Makamu wa Rais wa Jamhuri ya Muungano wa Tanzania, Mhe. Dkt. Philip Isdor Mpango leo tarehe 12 Aprili, 2023 amefungua Kikao cha Tathmini ya Utendaji na Mapitio ya Nusu ya Kwanza ya Mpango Mkakati wa Mahakama (2020/2021-2024/2025) na kuipongeza Mahakama ya Tanzania kwa kufanya mageuzi makubwa ya kiutendaji.

Amesema mageuzi hayo yamefanyika chini ya Mpango Mkakati wa Kwanza (2014/2015-2019/2020) na Mpango Mkakati wa Pili utakaoishia mwaka 2025. Makamu wa Rais amesema kuna mageuzi na maboresho yaliyofanyika ambayo kwa kiasi kikubwa yameongeza ufanisi katika kuwahudumia wananchi.

Amezipongeza Kamati zinazomshauri Jaji Mkuu kwa kazi kubwa wanayofanya ya kuanisha changamoto, kushauri, kupendekeza maboresho na kufuatilia utekelezaji wake. “Ni imani yangu kuwa Kamati hizi zitaendelea kutumika ipasavyo ili kuleta mabadiliko yaliyokusudiwa. Napenda kutoa rai kwenu kuwa muhakikishe mageuzi yanayofanyika yanakuwa endelevu,” alisisitiza Makamu wa Rais.

Mhe. Dkt. Mpango alisema kuwa kwa kutambua umuhimu wa Mhimili wa Mahakama katika kuwapatia haki wananchi, Serikali imeendelea kuongeza bajeti ya Mahakama ili kuiwezesha kutekeleza majukumu yake kwa ufanisi.

Kadhalika, alisema Rais wa Jamhuri ya Muungano wa Tanzania, Mhe. Dkt. Samia Suluhu Hassan amewezesha kupatikana kwa mkopo wa Dunia ili kufanya maboresho katika utendaji wa Mahakama nchini.

Vile vile Rais Samia ameendelea kuteua Majaji ili kupunguza uhaba wa utumishi katika kada hiyo na pia kuteua tume ya kuangalia jinsi ya kuboresha taasisi za haki jinai nchini ikiwemo Mahakama ili kupitia mfumo na kutoa mapendekezo ya kuboresha utendaji wa taasisi zote husika.

“Nipende kuwahakikishia Serikali itaendelea kuunga mkono Mahakama ili kuhakikisha mnyororo mzima wa utoaji haki kwa wananchi unaimarika na unaleta tija zaidi,” amesema.

Mhe. Dkt. Mpango aliwasili katika viwanja vya Hoteli ya Malaika kinapofanyikia Kikao hicho majira ya saa mbili na nusu asubuhi na kupokelewa na mwenyeji wake, Jaji Mkuu wa Tanzania, Mhe. Prof. Ibrahim Hamis Juma na viongozi wengine wa Mahakama na Serikali.

Baada ya hapo, Makamu wa Rais alielekea katika eneo maalumu lililokuwa limeandaliwa kwa mapumziko mafupi kabla ya kuingia ukumbini ambapo Wimbo wa Taifa na Wimbo wa Jumuiya ya Afrika Mashariki ulipigwa.

Kukamilika kwa tukio hilo kuliruhusu Mwongozaji Mkuu wa Ufunguzi wa Kikao hicho, Msajili Mkuu wa Mahakama ya Tanzania, Mhe. Wilbert Chuma kuendelea na ratiba, ikiwemo kuwakaribisha viongozi wa dini kwa sala na dua.

Baada ya sala na dua hizo, Mkuu wa Mkoa wa Mwanza, Mhe. Adam Malima alikaribishwa wa kwanza kuwasilisha salamu kama mwenyeji. Katika salamu zake, Mkuu wa Mkoa alisema Kikao hicho ni muhimu katika kuhakikisha utawala wa sheria unaimarishwa.

Amesema kuwa ni matarajio yake kwa kupitia kikao hicho washiriki watapata fursa ya kujadili kwa kina utendaji wa Mahakama ili kubainisha mafanikio na changamoto zilizopo na namna ya kuzipatia ufumbuzi.

Naye Naibu Waziri wa Katiba na Sheria, Mhe. Pauline Gekul alimpongeza Rais Samia kwa kuendelea kuunga mkono juhudi za Mahakama katika masuala ya utendaji haki nchini, hususani kuiwezesha kifedha ili kutekeleza majukumu yake.

Kadhalika, alimpongeza Jaji Mkuu wa Tanzania kwa kutumia weledi na ufanisi katika kutimiza azma ya Mahakama kuhakikisha uwepo wa usawa wa sheria kwa watu wote.

Amesema Mhimili wa Mahakama ni moja ya nguzo ya kudumisha amani na utamaduni nchini, hivyo Kikao kazi hicho kitasaidia katika kuongeza ufanisi wakati wa utekelezaji wa shughuli za kimahakama.

Baada ya salamu hizo, Jaji Mkuu wa Tanzania alikaribishwa na kuwasilisha hotuba yake na baadaye kumkaribisha Makamu wa Rais kuongea na Watanzania waliokuwa wanafuatilia kupitia Kituo cha Televisheni cha Channel 10 kilichokuwa kinarusha matukio mbalimbali ya Kikao hicho mubashara.

Uzinduzi wa Kikao hicho ulihudhuriwa pia na Majaji wote wa Mahakama ya Tanzania, Mwanasheria Mkuu wa Serikali, Mhe. Dkt. Jaji Eliezer Mbuki Feleshi, viongozi waandamizi wa Mahakama,Wakuu wa Mikoa ya Geita na Kagera, Wakuu wa Wilaya wa Mkoa wa Mwanza pamoja na viongozi wa Kamati ya Ulinzi na Usalama ya Mkoa.

 Jaji Mkuu wa Tanzania, Mhe. Prof. Ibrahim Hamis Juma akimpokea Makamu wa Rais wa Jamhuri ya Muungano wa Tanzania, Mhe. Dkt. Philip Isdor Mpango (wa pili kushoto) mara baada ya kuwasili katika ukumbi wa Hoteli ya Malaika kufungua Kikao cha Tathmini ya Utendaji na Mapitio ya Nusu ya Kwanza ya Mpango Mkakati wa Mahakama (2020/2021-2024/2025) leo tarehe 12 Aprili, 2023.

Makamu wa Rais wa Jamhuri ya Muungano wa Tanzania, Mhe. Dkt. Philip Isdor Mpango akisalimiana na Jaji Kiongozi wa Mahakama Kuu ya Tanzania, Mhe. Mustapher Siyani.

Makamu wa Rais wa Jamhuri ya Muungano wa Tanzania, Mhe. Dkt. Philip Isdor Mpango (wa pili kulia) akiwasili katika ukumbi akiwa ameongozana na Jaji Mkuu wa Tanzania, Mhe. Prof. Ibrahim Hamis Juma (wa pili kushoto) pamoja na viongozi wengine.

Meza Kuu ikiongozwa na Makamu wa Rais wa Jamhuri ya Muungano wa Tanzania, Mhe. Dkt. Philip Isdor Mpango (katikati) ikishiriki kuimba Wimbo wa Taifa na Wimbo wa Jumuiya ya Afrika Mashariki.

Mwongozaji Mkuu wa Uzinduzi wa Kikao hicho, Msajili Mkuu wa Mahakama ya Tanzania, Mhe. Wilbert Chuma kitambulisha wageni waliohudhuria Kikao hicho.

 

Mkuu wa Mkoa wa Mwanza, Mhe. Adam Malima akiwasilisha salamu katika Kikao.

Naibu Waziri wa Katiba na Sheria, Mhe. Pauline Gekul akizungumza wakati anawasilisha salamu za Wizara yake.

Meza Kuu ikiongozwa na Makamu wa Rais wa Jamhuri ya Muungano wa Tanzania, Mhe. Dkt. Philip Isdor Mpango (katikati) ikiwa katika picha ya pamoja na wajumbe wengine wa Meza Kuu.

Meza Kuu ikiongozwa na Makamu wa Rais wa Jamhuri ya Muungano wa Tanzania, Mhe. Dkt. Philip Isdor Mpango (katikati) ikiwa katika picha ya pamoja na Majaji wa Mahakama ya Rufani(juu na chini).

Meza Kuu ikiongozwa na Makamu wa Rais wa Jamhuri ya Muungano wa Tanzania, Mhe. Dkt. Philip Isdor Mpango (katikati) ikiwa katika picha ya pamoja na sehemu ya Majaji wa Mahakama Kuu ya Tanzania(juu na chini).

Meza Kuu ikiongozwa na Makamu wa Rais wa Jamhuri ya Muungano wa Tanzania, Mhe. Dkt. Philip Isdor Mpango (katikati) ikiwa katika picha ya pamoja na sehemu nyingine ya Majaji wa Mahakama Kuu ya Tanzania(juu na chini).

Meza Kuu ikiongozwa na Makamu wa Rais wa Jamhuri ya Muungano wa Tanzania, Mhe. Dkt. Philip Isdor Mpango (katikati) ikiwa katika picha ya pamoja na sehemu nyingine ya tatu ya Majaji wa Mahakama Kuu ya Tanzania(juu na chini).

Meza Kuu ikiongozwa na Makamu wa Rais wa Jamhuri ya Muungano wa Tanzania, Mhe. Dkt. Philip Isdor Mpango (katikati) ikiwa katika picha ya pamoja na sehemu nyingine ya nne ya Majaji wa Mahakama Kuu ya Tanzania(juu na chini).

Meza Kuu ikiongozwa na Makamu wa Rais wa Jamhuri ya Muungano wa Tanzania, Mhe. Dkt. Philip Isdor Mpango (katikati) ikiwa katika picha ya pamoja na sehemu nyingine ya tano ya Majaji wa Mahakama Kuu ya Tanzania(juu na chini).

Meza Kuu ikiongozwa na Makamu wa Rais wa Jamhuri ya Muungano wa Tanzania, Mhe. Dkt. Philip Isdor Mpango (katikati) ikiwa katika picha ya pamoja na wajumbe wa menejimenti ya Mahakama ya Tanzania.

Makamu wa Rais wa Jamhuri ya Muungano wa Tanzania, Mhe. Dkt. Philip Isdor Mpango (katikati) akiondoka katika ukumbi wa Mkutano.