ELIMU KUHUSU MFUMO ULIOBORESHWA WA KURATIBU MASHAURI YABISHA HODI ARUSHA

Na Angel Meela-Mahakama, Arusha

Kaimu Jaji Mfawidhi wa Mahakama Kuu ya Tanzania, Kanda ya Arusha, Mhe. Mohamed Gwae jana tarehe 5 Aprili, 2023 alifungua mafunzo ya siku mbili kuhusu mfumo ulioboreshwa wa kuratibu mashauri (e-case management system) yanayotolewa kwa watumishi wa Mahakama katika Kanda hiyo.

 Akizungumza katika hafla hiyo, Mhe. Gwae aliwakumbusha watumishi waliotoka katika Mahakama ndani ya Kanda hiyo kuhusu Mpango Mkakati wa Mahakama ya Tanzania, nguzo namba tatu, yenye lengo la kuongeza ufanisi katika shughuli za kimahakama na kuongeza Matumizi ya Teknolojia ya Habari na Mawasiliano (TEHAMA).

Alisema nguzo hiyo inaitaka Mahakama kuanzisha Mahakama mtandao(e-judiciary) ili huduma na kazi zote za kimahakama na utawala zitolewe kidijitali. Alieleza kuwa katika kutekeleza lengo hilo muhimu, Mahakama kwa kutumia wataalam wake wa ndani imeunda mfumo wa kuratibu shughuli zote kielectroniki.

“Mfumo huu unatarajia kurahisisha na kuboresha shughuli za utoaji huduma kwa wateja watu, aidha mfumo huu utarahisisha sana upatikanaji wa taarifa mbalimbali za utendaji wa Mahakama kwa usahihi na kwa wakati,” Kaimu Jaji Mfawidhi aliwaambia Mahakimu, Makatibu Mahsusi na Maafisa Utumishi, miongoni mwa washiriki.

Mhe Gwae alitoa rai kwa washiriki wa mafunzo hayo kuwa makini ili wanapoanza kutumia mfumo huo kusiwe na yeyote wa kuachwa nyuma. Kadhalika, alisisitiza Mahakimu ndio walengwa kwa asilimia kubwa, hivyo wanapaswa kuuelewa ili waweze kuwafikishia watumishi waliowaacha vituoni ujuzi watakaoupata.

Kaimu Jaji Mfawidhi wa Mahakama Kuu ya Tanzania, Kanda ya Arusha, Mhe. Mohamed Gwae  akizungumza wakati anafungua mafunzo kuhusu mfumo ulioboreshwa wa kuratibu mashauri.

Sehemu ya watumishi wakifuatilia hotuba ya ufunguzi wa mafunzo hayo kutoka kwa Kaimu Jaji Mfawidhi wa Mahakama Kuu ya Tanzania, Kanda ya Arusha, Mhe. Mohamed Gwae (hayupo katika picha).

Kaimu Jaji Mfawidhi wa Mahakama Kuu ya Tanzania, Kanda ya Arusha, Mhe. Mohamed Gwae (katikati) akiwa katika picha ya pamoja na washiriki wa mafunzo hayo. Wengine waliokaa ni Naibu Msajili wa Mahakama Kuu ya Tanzania, Kanda ya Arusha, Mhe. Judith Kamala (kulia) na Mtendaji wa Mahakama, Kanda hiyo, Bw. Leonard Maufi (kushoto).

(Habari hii imehaririwa na FAUSTINE KAPAMA-Mahakama, Morogoro)