JAJI KOMBA AWAASA WATUMISHI BUNDA KUCHAPA KAZI

Na Francisca Swai - Mahakama, Musoma.

Jaji wa Mahakama Kuu ya Tanzania, Kanda ya Musoma, Mhe. Marlin Komba wamewaasa watumishi wa Mahakama Wilaya ya Bunda kufanya kazi kwa bidii licha ya changamoto mbalimbali wanazokutana nazo.

Mhe. Komba alitoa rai hiyo hivi karibuni katika ziara aliyoifanya akiwa ameambatana na Naibu Msajili wa Kanda hiyo, Mhe. Frank Moshi na Mtendaji wa Mahakama Musoma, Bw. Festo Chonya kukagua shughuli mbalimbali za kimahakama ndani ya Wilaya hiyo.

Viongozi hao walibaini baadhi ya Mahakama kama Mahakama ya Mwanzo Mcharo na Mahakama ya Mwanzo Mugeta zipo katika majengo ya ofisi za Kata, jambo ambalo huleta mwingiliano wa shughuli za kimahakama na Serikali.

Wakiwa katika Mahakama ya Mwanzo Nansimo, viongozi hao walipongeza jitihada na ubunifu wa kuboresha mazingira ya kazi inayofanywa na Hakimu Mkazi, Mhe. Chana Chana na kumshukuru kwa kuziona changamoto na kuzifanya fursa, hatua ambayo itaacha alama ya utendaji kazi wake mzuri.

Aidha, viongozi hao wamesisitiza kufanya kazi kwa umoja na upendo, kuhakikisha mapato ya Serikali hayapotei, kusikiliza mashauri na kutolea maamuzi kwa wakati. Waliwaasa Mahakimu kuhakikisha hawazalishi mahabusu isipokuwa kwa sababu zisizozuilika.

Akiwa katika Mahakama hiyo, Jaji Komba na msafara wake alipokea pongezi kutoka kwa watumishi kwa ukarabati mkubwa uliofanyika katika jengo la Mahakama, jambo ambalo limewawezesha kutoa huduma katika jengo zuri. Pongezi kama hizo pia zilitolewa na watumishi baada ya viongozi hao kutembelea na kukagua Mahakama ya Mwanzo Kenkombyo.

Katika ziara yake, Jaji Komba pia alitembelea Mahakama za Ikizu, Kabasa, Bunda Mjini na kumalizia katika Mahakama ya Wilaya Bunda.

 

Jaji wa Mahakama Kuu ya Tanzania, Kanda ya Musoma, Mhe. Marlin Komba akiwa katika picha ya pamoja na viongozi na watumishi wa Mahakama ya Wilaya Bunda.

Jaji wa Mahakama Kuu ya Tanzania, Kanda ya Musoma, Mhe. Marlin Komba (wa tatu kushoto) akikagua mazingira nago la Mahakama ya Wilaya Bunda. 

Hakimu Mkazi Mfawidhi wa Mahakama ya Wilaya Bunda, Mhe. Mulokozi Kamuntu (aliyesimama) akisoma taarifa ya utendaji kazi wa Mahakama hiyo.

Jaji wa Mahakama Kuu ya Tanzania, Kanda ya Musoma, Mhe. Marlin Komba akikabidhi vifaa vya ujenzi kwa Mlinzi wa Mahakama ya Mwanzo Nansimo, Bw. Lameck Salah.

Jaji wa Mahakama Kuu ya Tanzania, Kanda ya Musoma, Mhe. Marlin Komba akikagua mazingira na jengo la Mahakama ya Mwanzo Kenkombyo.

Hakimu Mkazi Mfawidhi wa Mahakama ya Mwanzo Kenkombyo, Mhe, Victoria Gambamala (aliyesimama) akisoma taarifa ya utendaji kazi.

Hakimu Mkazi Mfawidhi wa Mahakama ya Mwanzo Bunda Mjini, Mhe, Stella Shayo (aliyesimama) akisoma taarifa ya utendaji kazi.

Jaji wa Mahakama Kuu ya Tanzania, Kanda ya Musoma, Mhe. Marlin Komba akikagua mazingira ya jengo la Mahakama ya Mwanzo Kabasa.

Hakimu Mkazi Mfawidhi wa Mahakama ya Mwanzo Mcharo, Mhe. Tomick Simbeye (mwenye sweta rangi nyekundu) akimuonesha Jaji wa Mahakama Kuu ya Tanzania, Kanda ya Musoma, Mhe. Marlin Komba mipaka ya eneo la Mahakama hiyo.

Hakimu Mkazi Mfawidhi wa Mahakama ya Mwanzo Ikizu Mhe, Oscar Lyimo (aliyenyoosha mkono) akimuonesha Jaji wa Mahakama Kuu ya Tanzania, Kanda ya Musoma, Mhe. Marlin Komba mipaka ya eneo la Mahakama hiyo.

(Habari hii imehaririwa na FAUSTINE KAPAMA-Mahakama, Dar es Salaam).