JAJI MFAWIDHI DIVISHENI YA KAZI ATEMBELEA OFISI ZA OSHA

• Divisheni ya kazi na OSHA zaahidi kushirikiana

Na Mwanaidi Msekwa, Mahakama Kuu-Divisheni ya Kazi

Jaji Mfawidhi Mahakama Kuu ya Tanzania Divisheni ya Kazi, Mhe. Dkt. Yose Joseph Mlyambina hivi karibuni alitembelea Ofisi za Wakala wa Usalama na Afya Mahali pa Kazi (OSHA) na kufanya mazungumzo na Mtendaji Mkuu wa Ofisi, Bi. Khadija Mwenda ambapo kwa pamoja wameahidi kushirikiana katika kazi.

Katika ziara yake fupi aliyofanya hivi karibuni katika Ofisi hiyo iliyopo Kinondoni jijini Dar es Salaam, Jaji Mlyambina alisema moja ya madhumuni ya kutembelea Ofisi za OSHA zilizopo Kinondoni Dar es Salaam ni pamoja na kufahamiana kwa viongozi wa Divisheni na viongozi wa OSHA.

“Lengo la kuja hapa ni pamoja na kuipongeza OSHA kwa kazi nzuri inayofanya ambayo ni pamoja na kutoa elimu juu ya usalama mahala pa kazi katika ofisi pamoja na Taasisi mbalimbali,” alisema Jaji Mlyambina.

Kadhalika, Divisheni hiyo ililenga kuitambulisha Kamati yake ya Elimu ya ambayo Mwenyekiti wake ni Jaji wa Mahakama Kuu Divisheni ya Kazi, Mhe. Katarina Revokati Mteule na Katibu wa Kamati hiyo, Mhe. Jane Julius Masua

Katika mazungumzo baina yake na Mtendaji Mkuu wa OSHA, Jaji Mfawidhi alipata fursa ya kuelezea kwa kifupi kazi zinazofanywa na Kamati ya elimu ikiwa ni pamoja na kutoa mafunzo mbalimbali kwa watumishi na wadau.

Aidha; Jaji Mfawidhi huyo aliongeza kuwa, pamoja na Kamati hiyo ya ndani ana mpango wa kuanzisha pia Kamati ya elimu itakayohusisha wadau mbalimbali wa Mahakama Kuu ya Tanzania Divisheni ya Kazi ikiwa ni pamoja na Osha huku akimuomba Mtendaji Mkuu OSHA kuwa tayari kushirikiana na Mahakama pale ambapo uundwaji wa kamati hiyo utakuwa umekamilika.

Jaji Mfawidhi huyo aliiomba ofisi ya OSHA kudhamini na kuandaa mafunzo juu ya elimu ya usalama mahala pa kazi kwa watumishi wa Mahakama Kuu ya Tanzania Divisheni ya Kazi ambao wapo 52 pamoja na watumishi wa Tume ya Usuluhishi na Uamuzi.

Katika mazungumzo hayo ya pamoja viongozi hao walikubaliana kushirikiana katika kazi ambapo Mtendaji Mkuu wa OSHA, Bi. Mwenda aliahidi kutoa elimu na hata kutoa msaada wa vifaa mbalimbali vya kazi kwa Divisheni hiyo ikiwemo (‘laptop support’, ‘ergonomics chairs’ na ‘ergonomics mouse pads’).

Mtendaji Mkuu wa OSHA alimshukuru Jaji Mfawidhi kwa kutembelea ofisi yake na kumpongeza kwa kuchukua hatua hiyo ya kufahamiana kwa kuwa ofisi zote mbili hujihusisha moja kwa moja katika kushughulikia haki za watumishi mahala pa kazi.

“Taasisi ya OSHA lengo lake kubwa ni kutoa elimu kwa wadau wake wote juu ya usalama mahala pa kazi,” alieleza Bi. Mwenda.

Aligusia pia kuwa baadhi ya watumishi wa Tume ya Usuluhishi na Uamuzi wameshapatiwa elimu juu ya usalama mahala pa kazi na kuahidi kwamba atatoa mafunzo ya Sheria mbalimbali za OSHA kwa watoa maamuzi ikiwa ni pamoja na Majaji ili mafunzo hayo yasaidie katika utatuzi wa migogoro ya kazi.

Aidha, Mtendaji Mkuu huyo alikubali ombi la mafunzo na vilevile kukutana na Kamati ya Elimu ya Mahakama Kuu Divisheni ya Kazi ili kuweka mikakati ya namna ya kufanya mafunzo hayo.

Jaji Mfawidhi wa Mahakama Kuu ya Tanzania-Divisheni ya Kazi, Mhe. Dkt. Yose Mlyambina (kulia) akiwa katika picha ya pamoja na Mtendaji Mkuu wa Wakala wa Usalama na Afya Mahali pa Kazi (OSHA), Bi. Khadija Mwenda. Mhe. Dkt. Mlyambina alitembelea Ofisi za OSHA hivi karibuni.

Jaji Mfawidhi wa Mahakama Kuu ya Tanzania-Divisheni ya Kazi, Mhe. Dkt. Yose Mlyambina (katikati) akiwa katika picha ya pamoja na Mtendaji Mkuu wa Wakala wa Usalama na Afya Mahali pa Kazi (OSHA), Bi. Khadija Mwenda. Kulia ni Katibu wa Jaji Mfawidhi,  Mhe. Suzan Mwigulu.

(Imehaririwa na Mary Gwera, Mahakama)