MAHAKAMA NCHINI YAZIDI KUTANUA WIGO; HUDUMA ZA RUFANI SASA KUPATIKANA MOROGORO

• Jaji Mkuu azindua kikao cha Mahakama hiyo kwa mara ya kwanza
• Wananchi wafurahishwa na ujio wa huduma hiyo

Na Evelina Odemba – Mahakama Morogoro

Jaji Mkuu wa Tanzania, Mhe. Prof. Ibrahim Hamis Juma leo tarehe 24 Aprili, 2023 amezindua rasmi kikao cha kwanza cha Mahakama ya Rufani sambamba na ufunguzi wa Masjala ndogo ya Rufani katika Mahakama Kanda ya Morogoro hatua ambayo inatanua wigo wa upatikanaji wa haki karibu na wananchi.

Akizungumza wakati wa uzinduzi huo wa kihistoria Jaji Mkuu, Mhe. Prof. Juma amesema kuwa, tukio hilo ni sehemu ya utekelezaji wa Mpango Mkakati wa Mahakama 2020/2021-2024/2025 katika kusogeza huduma ya utoaji haki karibu  zaidi na wananchi, hivyo Mahakama imejipanga kukabiliana na changamoto ya umbali unaowalazimu wananchi kutumia gharama na muda mwingi kuifuata huduma ya haki.

“Siku ya leo ni siku ya historia kuanzia tulipoanza huduma ya Mahakama mwaka 1920 ambako Mahakama ya Rufani ilipatikana Dar es Salaam pekee. ambako Majaji walilazimika kutumia usafiri wa Treni ili kupeleka huduma ya Mahakama ya Rufani kwa wananchi, lakini hivi leo huduma hii imefika hapa Morogoro,” ameeleza Jaji Mkuu.

Amesema kuwa, kuanzia sasa wananchi wa mkoa wa Morogoro hawatalazimika kuifuata huduma ya Mahakama ya Rufani Dar es Salaam bali huduma hiyo itapatikana ndani ya Kanda hiyo. 

Aidha, amesistiza wananchi kuyapokea maboresho yaliyofanywa na Mahakama kwa upande wa Matumizi ya TEHAMA kwani wameboresha na tayari mashauri yanasikilizwa kwa njia ya mkutano mtamdao ‘Video Conference’ ili kumrahisishia mwananchi aweze kupata huduma ya Mahakama akiwa mahali popote.

Aliongeza kuwa sehemu ambazo itapita reli ya mwendokasi Mahakama ipo katika mazungumzo ya kuona namna wanavyoweza kuwa na Mahakama ndani ya Mabehewa ya mwendo kasi ili kuwafikia wananchi wanaoishi mbali na maeneo iliko Mahakama.

“Hili ni tukio la Kihistoria kwani tukikumbuka historia iliyoandikwa na Jaji wa kwanza aliyefika Morogoro akitokea Dar es Salaam mwaka 1921 alileta huduma ya Mahakama Kuu, alitumia usafiri wa Treni na hali ya hapo kabla ilikuwa changamoto kuwafikia wananchi kutokana na uwepo wa simba wengi kipindi hiko na changamoto ya Jiografia ya Mkoa huu, hii ni ishara kuwa tumetoka mbali sana na tunapoenda ni mbali zaidi” ameeleza Mhe. Prof. Juma.

Aidha, Jaji Mkuu ametoa shukrani zake kwa Serikari ya Tanzania kwa kuiwezesha Mahakama kutekeleza Mpango Mkakati wake kwani Mahakama haikusanyi kodi ila inafanya kazi ya kuwawezesha wananchi kupata huduma ya utoaji Haki na kuomba uwezeshaji huo uendelee kutokana na maeneo mengi ya nchi ya Tanzania yanahitaji wa huduma ya Mahakama.

Ameongeza kuwa kutokana na ukubwa wa Mkoa wa Morogoro wenye Kilometa za mraba takribani 72,939 na umepakana na mikoa takribani nane (8) na wakati mwingine mwananchi anakuwa karibu na huduma ya Mahakama iliyoko Mkoa mwingine lakini hawezi kufika hivyo, kupitia tukio hilo inaonesha kuwa bado kuna safari ndefu kufikisha huduma ya Mahakama kwa wananchi.

Kadhalika Jaji Mkuu amesema kwamba, katika programu ya maboresho ya Mahakama wanajitahidi kukabiliana na changamoto ya umbali anayopata mwananchi kutoka nyumbani mpaka kuifuata Mahakama ilipo na miongoni mwa njia wanazozitumia ni maboresho ya mifumo ya TEHAMA ambapo mpaka kufikia sasa Mwananchi anaweza kusikiliza kesi akiwa nyumbani kwa njia ya mtandao.

Akizungumza awali wakati akimkaribisha Jaji Mkuu, naye Msajili wa Mahakama ya Rufani (T), Mhe. Sylivester Kainda ameeleza kuwa jumla ya mashauri ya aina mbalimbali 33 yatasikilizwa katika kikao cha Mahakama ya Rufani ambacho kimezinduliwa leo na kusema kuwa uzinduzi huo ni nafuu kwa wananchi wa Mkoa huu ambao wengi walikuwa wakipiga simu kuomba mashauri yao yahairishwe kutokana na kutokuwa na nauli ya kufika Dar es Salaam ambapo yalikuwa yakisikilizwa kabla.

“Yapo maeneo ya mbali takribani Kilometa 400 na kuna matukio ya wananchi waliokuwa wakipiga simu kuomba mashauri yao yahairishwe kwani hawana nauli ya kufika Dar es Salaam” ameeleza na kusema huu ni ukombozi.

Jumla ya mashauri 33 yatasikilizwa kuanzia leo tarehe 24 Aprili, 2023 hadi tarehe 12 Mai, 2023 na yatasikilizwa na Majaji wa Mahakama ya Rufani wakiongozwa na Jaji Mkuu wa Mahakama ya Tanzania, Mhe. Prof. Ibrahim Juma ambaye ameambatana na Majaji wengine wa Mahakama ya Rufani ambao ni pamoja na  Mhe. Augustine Mwarija, Mhe. Lilian Mashaka, Mhe. Omar Makungu.

Katika hafla ya uzinduzi Mahakama ilifanyiwa dua na viongozi mbalimbali kutoka dini ya Kikristo nay a Kiislamu ambao walikabidhi Mahakama na viongozi wake kwa Mwenyezi Mungu ili aweze kuwasimamia wanapotekeleza majukumu yao ya utoaji haki.

Sherehe hii ilishuhudiwa na wadau wa Mahakama pamoja na wananchi wa Mkoa wa Morogoro ambao walitoa maoni yao jinsi walivyopata tumaini katika sekta ya kutafuta haki, “tokea nimezaliwa sijawahi kumuona Jaji Mkuu ila leo nimemshuhudia kwa macho na nimemsikia jinsi alivyoelezea, nimevutiwa na sehemu aliyosema kuwa sasa tunaweza kusikiliza mashauri tukiwa sehemu yeyote na sio lazima kufika Mahakamani kwakweli naishukuru Mahakama” amesema mwananchi huyo ajulikanaye kwa jina la Sadi Salum.

Tukio hilo pia lilishuhudiwa na viongozi wa Mahakama ya Tanzania pamoja na Kanda ya Morogoro akiwemo Msajili Mkuu Mahakama Kanda ya Morogoro wakiongozwa na Jaji Mfawidhi wa Kanda hiyo, Mhe. Paul Ngwembe, Mhe. Messe Chaba, Mhe. Gabriel Malata, Msajili Mkuu Mahakama ya Tanzania, Mhe. Wilbert Chuma, Naibu Msajili, Mhe. Augustina Mbando, Mtendaji wa Kanda hiyo, Bw.Ahmed Ng’eni pamoja na baadhi ya Mahakimu na watumishi wa Mahakama wa Kanda hiyo.

Jaji Mkuu wa Tanzania, Mhe. Prof. Ibrahim Hamis Juma (aliyesimama kwenye

jukwaa) akiwa tayari kukagua gwaride maalum la heshima lililoandaliwa kwa

ajili ya sherehe za uzinduzi wa vikao vya Mahakama ya Rufani mkoani

Morogoro.

 Jaji Mkuu wa Mahakama ya Tanzania, Mhe. Prof. Ibrahim Hamis Juma

 akizungumza wakati wa hafla uzinduzi wa vikao vya Mahakama ya Rufani kwa

 Kanda ya Morogoro leo tarehe 24 Aprili, 2023.

Wananchi, Wadau na Watumishi wa Mahakama wakifuatilia sherehe za

uzinduzi wa kikao cha Mahakama ya Rufani iliyofanyika katika Viwanja vya 

Mahakama Kuu Kanda ya Morogoro leo tarehe 24 Aprili, 2023.

Kwaya ya Mahakama Kanda ya Morogoro ikitumbuiza wakati wa uzinduzi wa

vikao vya Mahakama ya Rufani.

 Msajili wa Mahakama ya Rufani (T), Mhe. Sylivester Kainda akizungumza kabla

ya kumkaribisha Jaji Mkuu wa Tanzania, Mhe. Prof. Ibrahim Hamis Juma

 kuzungumza wakati wa sherehe za uzinduzi wa vikao vya Mahakama ya Rufani

 mapema leo tarehe 24 Aprili, 2023.

 Meza kuu ikiongozwa na Jaji Mkuu wa  Tanzania, Mhe. Prof.

Ibrahim Juma (katikati) wakifuatilia matukio mbalimbali yaliyojiri katika hafla ya

 uzinduzi wa vikao vya Mahakama ya Rufani. Wa pili kushoto ni Jaji wa Mahakama

 ya Rufani, Mhe.  Augustine Mwarija, wa pili kulia ni Jaji wa Mahakama ya Rufani,

 Mhe. Lilian  Mashaka, wa kwanza kushoto ni Jaji wa Mahakama ya Rufani (T),

 Mhe. Omar  Makungu na wa kwanza kulia ni Jaji Mfawidhi Mahakama Kuu-Kanda

 ya  Morogoro, Mhe. Paul Ngwembe.

Meza kuu ikiongozwa na Jaji Mkuu wa  Tanzania, Mhe. Prof.

Ibrahim Hamis Juma (katikati) wakiwa katika picha ya pamoja na baadhi ya

 watumishi wa Mahakama.

 Jaji Mkuu wa Tanzania, Mhe. Prof. Ibrahim Juma (aliyetangulia mbele)

 akiwaongoza Majaji wenzake kuondoka eneo la uzinduzi kuelekea mahakamani kwa

 ajili ya kuanza rasmi vikao vya Mahakama ya Rufani.

(Imehaririwa na MARY GWERA, Mahakama)