MAHAKAMA KANDA YA ARUSHA YAFANYA KIKAO CHA BARAZA LA WAFANYAKAZI

·Jaji Mfawidhi awahimiza watumishi kuzingatia maadili

·Baraza lapata viongozi wapya

Na Seth Kazimoto-Mahakama, Arusha

Mahakama Kanda ya Arusha hivi karibuni ilifanya kikao cha Baraza la Wafanyakazi kujadili mambo mbalimbali, ikiwemo maslahi ya watumishi, kutoa mapendekezo kadhaa na kuchagua viongozi wapya.

Kikao hicho kilichofanyika katika ukumbi wa mikutano wa Kituo Jumuishi cha Utoaji Haki Arusha kilihudhuriwa na Jaji Mfawidhi wa Mahakama Kuu ya Tanzania, Kanda ya Arusha, Mhe. Joachim Tiganga.

Akifungua kikao hicho, Mhe. Tiganga aliwahimiza wajumbe kushiriki kikamilifu bila hofu na kutumia fursa hiyo muhimu kujadili hoja zinazojitokeza ili kufanikisha shughuli za Baraza hilo.

 “Ni katika vikao hivi tunajadili na kupata ufumbuzi wa changamoto zinazowakabili watumishi, lakini pia watumishi wanapata morali ya kazi kama wanashikiri katika kuandaa na kutekeleza mipango ya Mahakama,” alisisitiza.

Alisema wajumbe wote wawe mabalozi wazuri katika maeneo yao ya kazi kwa kuhakikisha kuwa watumishi wote wanaepuka na kupiga vita vitendo vyovyote vya rushwa katika Mahakama na kila mmoja kuwa mlinzi wa mwenzake ili kuhakikisha Mahakama inakuwa chombo kinachoaminiwa na wananchi.

Katika kikao hicho, Baraza lilijadili kuhusu maslahi ya watumishi na kutoa mapendekezo mbalimbali, ikiwemo Mahakimu Wakazi Wafawidhi wa Mahakama za Mwanzo walipwe posho ya madaraka kama ilivyo kwa Mahakimu Wafawidhi wa Mahakama za Hakimu Mkazi na Mahakama za Wilaya.

Vilevile, wajumbe walipendekeza kuwa watumishi wa Mahakama walioko masomoni kwa ufadhili wa mwajiri walipiwe gharama zote za masomo, kama vile ada, malazi na vifaa wezeshi (stationary) kwani kwa sasa mwajiri analipa ada pekee huku watumishi wakilazimika kujilipia gharama zingine.

Baraza hilo pia lilifanya uchaguzi ili kuwapata viongozi wapya kwa nafasi za Katibu, Katibu Msaidizi na Mwakilishi wa Watumishi katika Baraza la Taifa la Wafanyakazi. Uchaguzi huo ulitokana na viongozi wa awali kuhamishiwa Mikoa mingine na wengine muda wao wa uongozi kuisha.

Viongozi waliochaguliwa na vyeo vyao katika mabano ni Hakimu Mkazi wa Mahakama ya Mwanzo Namanga, Mhe. Shila Dyumu (Katibu wa Baraza), Afisa Utumishi Mahakama Kuu Kanda ya Arusha, Bi. Grace Kapama (Katibu Msaidizi) na Afisa Tawala Mahakama ya Wilaya Arusha, Bw. Seth Kazimoto (Mwakilishi wa Watumishi katika Baraza la Wafanyakazi Taifa). Uongozi huo mpya utahudumu kwa kipindi cha miaka miwili, yaani 2023 na 2024.

Mabaraza ya Wafanyakazi yapo kwa mujibu wa Agizo la Rais Na. 1 la mwaka 1970 ambalo lina lengo la kuwashirikisha wafanyakazi wa ngazi zote katika utekelezaji wa shughuli za taasisi kwa kushirikiana na uongozi. Mabaraza ya Wafanyakazi huwashirikisha wafanyakazi wa Serikali katika utekelezaji wa shughuli zake kwa ushirikiano na uongozi mahali pakazi.

Maagizo hayo pia yanayataka Mabaraza kuishauri Serikali juu ya ufanisi wa kazi na hatua zinazofaa kuchukuliwa ili kuhakikisha kuwa huduma zitolewazo na wafanyakazi wa Serikali kwa Taifa ni za kuridhisha pamoja na kuishauri Serikali juu ya mambo muhimu yanayohusu maslahi ya wafanyakazi.

Jaji Mfawidhi wa Mahakama Kuu ya Tanzania, Kanda ya Arusha, Mhe. Joachim Tiganga (katikati) akiwa katika kikao cha Baraza ka Wafanyakazi. Wengine ni Kaimu Naibu Msajili wa Mahakama Kuu ya Tanzania, Kanda ya Arusha, Mhe. Mushumbusi Simon ambaye ni Hakimu Mkazi Mfawidhi wa Mahakama ya Wilaya Karatu (kulia) na Katibu wa Baraza la Wafanyakazi Arusha, Mhe. Shila Dyumu (kushoto).

Wajumbe wa Baraza la Wafanyakazi wa Mahakama Kanda ya Arusha wakishiriki kwenye kikao cha Baraza hilo.

Jaji Mfawidhi wa Mahakama Kuu ya Tanzania, Kanda ya Arusha, Mhe. Joachim Tiganga akizungumza wakati anafungua kikao cha Baraza hilo.

Afisa Masjala wa Mahakama Kuu Kanda ya Arusha, Bi. Theresia Shetui akichangia mada wakati wa Kikao cha Baraza la Wafanyakazi.

Afisa Tawala wa Mahakama ya Wilaya Monduli akichangia mada wakati wa kikao cha Baraza la Wafanyakazi.

Afisa Utumishi wa Mahakama Kuu Arusha, Bi. Grace Kapama akitoa ufafanuzi wa jambo fulani wakati wa kikao hicho.

 Wajumbe wakishiriki kikamilifu kikao cha Baraza la Wafanyakazi.

(Habari hii imehaririwa na FAUSTINE KAPAMA-Mahakama, Dar es Salaam)