MAHAKAMA YAENDELEA KUTEMBEZA KICHAPO MASHINDANO YA MEI MOSI

·Haishikiki kwenye mpira wa miguu

·RAS Dodoma yaingia mitini kuogopa kukabiliana na Mahakama

Na Eunice Lugiana na Evelina Odemba – Mahakama, Morogoro

Timu ya Mpira wa Miguu toka Mahakama Sports Klabu jana tarehe 24 Aprili, 2023 imetinga hatua ya robo fainali baada ya kuichapa bila huruma timu ya Wakala wa Barabara (TANROAD) magoli matatu katika mashindano ya kuwania kombe la mei mosi.

Mchezo huo uliochezwa katika Viwanja vya Jamuhuri mkoani Morogoro yameibua hisia za furaha kwa wanamichezo kutoka Mahakama ambao tangu kuanza kwa mashindano hayo waliadhimia kupeleka vikombe vya ushindi kwa viongozi wa Mahakama ikiwa ni shukurani yao kwa kuaminiwa kuuwakilisha Muhimili wa Mahakama katika michezo.

Aidha, timu ya Mahakama ilijipatia bao la kwanza ndani ya dakika ya 12 ambalo lilifungwa na Ramadhan Seif wakati gori la pili likifungwa na Frank Obadia, maarufu kwa jina la Kisinda ndani ya dakika ya 22 na kupelekea TANROAD kwenda mapumziko wakiwa na nyuso za huzuni huku upande wa Mahakama ikiwa ni shangwe tupu.

Katika kipindi cha pili Mahakama iliwasindikiza wabobezi hao wa barabara kwa bao moja matata lililofungwa na Martin Mpanduzi ndani ya dakika ya 47, hali iliyowapelekea TANROAD kuchanganya miguu na kuambulia goli moja la kufutia machozi ndani ya dakika ya 52.

Kwa upande wa mchezo wa Kamba, Mahakama imeendelea kupeperusha bendera yake vyema baada ya timu ya Kamba wanawake kutoka Mahakama kuibuka kidedea dhidi ya timu ya Waziri Mkuu, huku Kamba wanaume wakijitwalia ushindi baada ya timu pinzani ambayo ni Ras Dodoma kuingia mitini wakiogopa kukabiliana na miamba hao wa mchezo wa Kamba. Mashindano hayo yalifanyikia katika viwanja vya Jamuhuri.

Tangu kuanza kwa mashindano hayo, Timu ya Mpira wa Miguu toka Mahakama Sports Klabu haijawahi kupoteza mchezo wake katika timu iliyoshuka nayo dimbani, hii inadhihirisha kuwa Mahakama inafanya vizuri katika mashindano ya kuwania Kombe la Mei Mosi huku kauli mbiu ikiwa ni moja tu, ‘kupeleka vikombe vya ushindi nyumbani.’

Kikosi cha mpira wa miguu toka Mahakama Sports Klabu kinachocheza ligi ya kombe la mei mosi 2023 wakiwa katika picha kabla ya kuanza mechi.

Sehemu ya kikosi cha mpira wa miguu toka timu ya Mahakama sports Klabu wakiwa katika gwaride la ukaguzi kabla ya kuanza kwa mechi.

Kapteni wa timu ya mpira wa miguu toka Mahakama Sports Klabu Selemani Magawa akikagua timu yake kabla haijashuka dimbani kuwania kombe la mei mosi.

Benchi la ufundi toka Mahakama sports klabu wakifuatilia mashindano yanayoendelea.

(Habari hii imehaririwa na FAUSTINE KAPAMA-Mahakama, Dar es Salaam)