JAJI MFAWIDHI MAHAKAMA KUU KAZI AKUTANA NA MKURUGENZI MKUU MFUKO WA FIDIA

·Mfuko wakubali kuboresha Maktaba wa Divisheni ya Kazi

Na Mwanaidi Msekwa-Mahakama Kuu, Kazi

Jaji Mfawidhi wa Mahakama Kuu ya Tanzania, Divisheni ya Kazi, Mhe. Dkt. Yose Mlyambina hivi karibuni alitembelea ofisi za Mfuko wa Fidia kwa Wafanyakazi (WCF) ikiwa miongoni mwa ziara zake kuwatambua wadau mbalimbali wanaohusika moja kwa moja na masuala ya kazi.

Jaji Mfawidhi alifanya ziara katika ofisi za Mfuko huo zilizopo Kijitonyama Mkoa wa Dar es Salaam kwa ajili ya kujitambulisha na kubadilishana uzoefu kwa kuwa shughuli zake zinauhusiano wa karibu na kazi zinazofanywa na Mahakama yake.

Baada ya kufika katika ofisi za WCF, Mhe. Dkt. Mlyambina alifanya mazungumzo na mwenyeji wake, Mkurugenzi Mkuu wa Mfuko wa Fidia kwa Wafanyakazi, Dkt. John Mduma. Katika mazungumzo yao, viongozi hao waligusia majukumu, mafanikio na changamoto zinazoikabili Mahakama Kuu, Divisheni ya Kazi.

Jaji Mfawidhi aliainisha baadhi ya changamoto, ikiwemo ukosefu wa vifaa vya Teknolojia ya Habari na Mawasiliano (TEHAMA) kwa ajili ya Maktaba, mahitaji ya Sheria za Mfuko na mafunzo kuhusu sheria hizo kwa Majaji, Naibu Wasajili, Wasaidizi wa Sheria wa Majaji na Wasuluhishi na Waamuzi wa migogoro katika Tume ya Usuluhishi na Uamuzi (CMA).

Naye Dkt. Mduma, akizungumza katika tukio hilo, alimshukuru Jaji Mfawidhi kwa kumtembelea ofisini kwake ambapo alionesha mwitikio chanya katika kufadhili ununuzi wa vifaa vya TEHAMA kwa ajili ya Maktaba kama vile kompyuta na vifaa vingine vya kieletroniki pamoja na kufadhili mafunzo yaliyoombwa.

Katika ziara hiyo, Mhe. Dkt. Mlyambina aliongozana na viongozi wengine wa kutoka Mahakama Kuu, Divisheni ya Kazi, akiwemo Naibu Msajili wa Mahakama Kuu ya Tanzania, Mhe. Enock Kassian.

Jaji Mfawidhi wa Mahakama Kuu ya Tanzania, Divisheni ya Kazi, Mhe. Dkt. Yose Mlyambina.

Mkurugenzi Mkuu wa Mfuko wa Fidia kwa Wafanyakazi, Dkt. John Mduma.

Naibu Msajili wa Mahakama Kuu ya Tanzania, Divisheni ya Kazi, Mhe. Enock Kassian.

Jaji Mfawidhi wa Mahakama Kuu ya Tanzania, Divisheni ya Kazi, Mhe. Dkt. Yose Mlyambina (kushoto) akiwa katika picha ya pamoja na Mkurugenzi Mkuu wa Mfuko wa Fidia kwa Wafanyakazi, Dkt. John Mduma (katikati). Kushoto ni Naibu Msajili wa Mahakama Kuu ya Tanzania, Divisheni ya Kazi, Mhe. Enock Kassian.

(Habari hii imehaririwa na FAUSTINE KAPAMA-Mahakama, Dar es Salaam)