MAHAKIMU MKOA WA KAGERA WANOLEWA MFUMO WA KURATIBU MASHAURI ULIOBORESHWA

Na Ahmed Mbilinyi – Mahakama, Bukoba

Mahakama Kanda ya Bukoba jana tarehe 27 Aprili, 2023 iliendesha mafunzo kuhusu mfumo wa kuratibu mashauri ulioboreshwa wa kielektroniki unaojulikana kama Advanced Case Management System (e-CMS) ili kuwajengea uelewa wa pamoja Mahakimu ili waweze kutekeleza vyema jukumu la utoaji haki kwa wananchi.

Mafunzo hayo ambayo yalihusisha Mahakimu wa Mahakama za Wilaya zote za Mkoa wa Kagera yalihudhuriwa pia na Jaji Mfawidhi wa Mahakama Kuu ya Tanzania, Kanda ya Bukoba, Mhe. Imakulata Banzi.

Akizungumza wakati wa ufunguzi wa mafunzo hayo, Mhe. Banzi aliwaasa washiriki wote kuuelewa mfumo huo ambao utasaidia katika utendaji kazi na kurahisisha mwenendo wa usikilizaji wa mashauri.

“Mafunzo haya yanahitaji uelewa wa pamoja ili kuendelea kutimiza jukumu la utoaji haki kwa wote na kwa wakati. Hivyo, nawaasa msikilize kwa makini kwani mfumo huu utawasaidia sana wakati mnapotekeleza jukumu la kutoa haki kwa wananchi,” Jaji Mfawidhi alisema.

Wito kama huo ulitolewa pia na Naibu Msajili wa Mahakama Kuu ya Tanzania, Kanda ya Bukoba, Mhe Odira Amworo ambaye aliwahimiza washiriki hao wa mafunzo kusikiliza kwa makini ili kuelewa vizuri namna mfumo huo unavyofanya kazi kufuatia maboresho makubwa yaliyofanyika.

Akitoa mafunzo hayo, Afisa Teknolojia Habari na Mawasiliano (TEHAMA) wa Mahakama Kuu ya Tanzania, Kanda ya Bukoba, Bw. Ahmed Mbilinyi alisema mfumo huo umeboreshwa kufuatia changamoto zilizokuwa zinajitokeza wakati wa matumizi ya mfumo wa awali unaojulikana kama Judicial Statistics Dashboard (JSDS II).

Alisema kwa sasa mfumo huo ulioboreshwa utakuwa na ufanisi zaidi. Alielezea mfumo huo wa e-CMS wa upokeaji na uratibu wa mashauri umeboreshwa kuanzia shauri linapofunguliwa mpaka shauri linapofikia hatua ya kutolewa maamuzi.

Jaji Mfawidhi wa Mahakama Kuu ya Tanzania, Kanda ya Bukoba, Mhe Immaculata Banzi akitoa neno la ufunguzi katika mafunzo ya mfumo ulioboreshwa wa kuratibu mashauri.

Naibu Msajili wa Mahakama Kuu ya Tanzania, Kanda ya Bukoba, Mhe Odira Amworo (aliyesimama) akimkaribisha Jaji Mfawidhi Banzi (katikati) kutoa neno la ufunguzi.  

Mahakimu wa Mkoa wa Kagera (juu na picha mbili chini) wakisikiliza neno la ufunguzi kutoka kwa Jaji Mfawidhi wa Mahakama Kuu ya Tanzania, Kanda ya Bukoba, Mhe Immaculata Banzi.

(Habari hii imehaririwa na FAUSTINE KAPAMA-Mahakama, Dar es Salaam)