JAJI MKUU ASISITIZA WATUMISHI KUJIENDELEZA KIELIMU

Na Evelina Odemba Mahakama Morogoro

Jaji Mkuu wa Tanzania, Mhe. Prof. Ibrahim Hamis Juma jana tarehe 27 Aprili, 2023 alizungumza na watumishi wa Mahakama ya Tanzania, Kanda ya

Morogoro na kuwahimiza kujiendeleza kielimu ili kukabiliana na mabadiliko ya Sayansi na Teknolojia ambayo inakuwa kwa kasi kote duniani.

Mhe. Prof. Juma alisisitiza watumishi kuwa na jitihada binafsi za kujisomea na wanaweza kufanya hivyo hata kwa kutumia vifaa vyao vya mawasiliano, ikiwemo simu janja ambazo asilimia kubwa ya watumishi wanazimiliki.

“Nafikilia Mahakama tutawatumia walioko karibu kuwapa elimu na mafunzo ya mara kwa mara watumishi wetu, nadhani TAWJA ni miongoni mwa tutakaowatumia kwani wapo karibu sana,” alieleza Jaji Mkuu. TAWJA ni Chama cha Majaji na Mahakimu Wanawake Tanzania.

Naye Mtendaji Mkuu wa Mahakama ya Tanzania, Prof. Elisante Ole Gabriel akizungumza katika tukio hilo alisisitiza watumishi wa Mahakama kuwa watulivu wakati masuala mbalimbali ya kiutumishi yakishugulikiwa. Aliwaasa kuepuka kutoa taarifa wasizokuwa na uhakika nazo.

Kadhalika, Prof. Ole Gabriel alipongeza jitihada zilizofanywa na Kituo Jumuishi cha Utoaji Haki Morogoro kwa kuchimba kisima cha maji safi ambacho kitaenda kuwa msaada mkubwa kwakuwa na maji ya uhakika, hatua itakayopunguza gharama. Aliahidi kununua pampu kubwa itakayowezesha kusukuma maji.

Awali, wakati akisoma taarifa ya utendaji kazi, Jaji Mfawidhi wa Mahakama Kuu ya Tanzania, Kanda ya Morogoro, Mhe. Paul Ngwembe alieleza kuwa watumishi wa Mahakama katika eneo lake wanafanya kazi kwa bidii na hutumia muda wa ziada kufanya kazi.

Alisema uwepo wa Kituo Jumuishi cha Utoaji Haki umepunguza gharama na wamekuwa wakipokea pongezi mbalimbali toka kwa wananchi ambao wananufaika na uwepo wa huduma ya Mahakama Kuu kwenye Kanda ya Morogoro.

Kwa upande wake, Msajili Mkuu wa Mahakama ya Tanzania, Mhe. Wilbard Chuma alisema kuwa wataendelea kutoa mafunzo ya Teknolojia ya Habari na Mawasiliano (TEHAMA) kwa watumishi wa Mahakama ili kuwajengea uwezo katika kazi. Alisema mafunzo hayo yatatolewa kwa njia ya moja kwa moja na kwa njia ya Mtandao.

Katika kikao hicho, Jaji Mkuu aliambatana na Majaji wa Mahakama ya Rufani, akiwemo Mhe. Lilian Mashaka na Mhe. Omar Makungu, Majaji wa Mahakama Kuu ya Tanzania, Kanda ya Morogoro, Mhe. Messe Chaba na Mhe. Gabriel Malata, Msajili wa Mahakama ya Rufani, Mhe. Sylivester Kahinda na viongozi wengine kutoka Kanda ya Morogoro.

Jaji Mkuu wa Tanzania, Mhe. Prof. Ibrahimu Juma akizungumza na watumishi wa Mahakama ya Tanzania Kanda ya Morogoro (hawapo pichani) katika kikao kilichofanyika jana tarehe 27 Aprili, 2023.

Meza Kuu ikiongozwa na Jaji Mkuu wa Tanzania, Mhe. Prof. Ibrahim Juma (katikati). Wengine ni Jaji wa Mahakama ya Rufani, Mhe. Augustine Mwarija na kulia ni Jaji Mfawidhi wa Mahakama Kuu ya Tanzania, Kanda ya Morogoro, Mhe. Paul Ngwembe.

Sehemu ya viongozi wa Mahakama wakiwa kwenye kikao. Kushoto ni Jaji wa Mahakama Kuu ya Tanzania, Kanda ya Morogoro, Mhe. Messe Chaba akifuatiwa na Jaji wa Mahakama Kuu kutoka Kanda hiyo, Mhe. Gabriel Malata, Mtendaji Mkuu wa Mahakama ya Tanzania, Prof. Elisante Ole Gabriel na Msajili Mkuu wa Mahakama ya Tanzania, Mhe. Wilbard Chuma.

Msajili wa Mahakama ya Rufani, Mhe. Sylivester Kahinda akizungumza wakati wa kikao hicho.

Sehemu ya watumishi wa Mahakama (juu na picha mbili chini) wakiwa katika kikao.

Jaji Mkuu wa Tanzania, Mhe. Prof. Ibrahim Hamis Juma (aliyepiga goti) akichota mchanga kuweka kwenye mti aliyoupanda. Mwenye chepeo ni Jaji Mfawidhi wa Mahakama Kuu ya Tanzania, Kanda ya Morogoro, Mhe. Paul Ngwembe.

Jaji wa Mahakama ya Rufani, Mhe. Augustine Mwarija akipanda mti ikiwa ni sehemu ya kuacha kumbukumbu katika Kituo Jumuishi cha Utoaji Haki Morogoro.

Jaji Mkuu wa Tanzania, Mhe. Prof.Ibrahim Hamis Juma (aliyevaa suti ya blue) akizungumza na viongozi mbalimbali wa Mahakama, akiwemo Mtendaji Mkuu wa Mahakama ya Tanzania (aliyeonesha mgongo), Jaji Mfawidhi wa Mahakama Kuu ya Tanzania, Kanda ya Morogoro, Mhe. Paul Ngwembe (kulia), Jaji Mahakama ya Rufani, Mhe. Augustine Mwarija (wa pili kushoto), Jaji Mahakama ya Rufani, Mhe. Lilian Leonard (kushoto) na anayefuatia ni Jaji Mahakama Kuu Kanda ya Morogoro, Mhe. Messe Chaba (aliyesimama nyuma).

 (Habari hii imehaririwa na FAUSTINE KAPAMA-Mahakama, Morogoro).