MFUMO USIMAMIZI WA MASHAURI SULUHISHO UPATIKANAJI HAKI KWA WAKATI

Na. Emmanuel Oguda - Shinyanga

Watumishi wa Mahakama Kanda ya Shinyanga wameanza kupatiwa mafunzo ya mfumo wa usimamizi wa mashauri ulioboreshwa ‘’Advanced Case Management System’’ (e-CMS) wenye kusudi la kuharakisha upatikanaji wa haki kwa wananchi na kwa wakati.

Mafunzo hayo yaliyoanza tarehe 11 Aprili, 2023 kwa watumishi wa ngazi zote katika Kanda hiyo yanatarajia kukamilika kesho tarehe 14 Aprili, 2023.

Naibu Msajili wa Mahakama Kuu ya Tanzania, Kanda ya Shinyanga, Mhe. Warsha Ng’humbu, ambaye alikuwa ni mtoa mada katika mafunzo hayo, alieleza jinsi gani Mahakama ya Tanzania imepambana kuimarisha mifumo ya kielektroniki, hasa mfumo wa usimamizi wa mashauri kwa lengo la kupunguza muda wa shauri kukaa mahakamani kama ambavyo imeainishwa katika Mpango Mkakati wa Mahakama ya Tanzania wa miaka mitano (2020/2021 – 2024/2025).

Aidha, Mhe. Ng’humu alieleza kuwa, Mfumo wa Usimamizi wa Mashauri ulioboreshwa unatajwa kuwa kati ya mifumo bora zaidi utakaorahisisha utendaji kazi wa Mahakama kuanzia kusajili shauri hadi kumalizika kwake.

“Mfumo unazo faida nyingi ambazo ikiwemo kuondoa matumizi ya karatasi na ubebaji wa majalada ya mashauri (file movements) kwa kuwa kila kitu sasa kitafanyika kielektroniki,” alisema.

Naye Afisa TEHAMA wa Mahakama Kuu ya Tanzania, Kanda ya Shinyanga, Bi. Nashilaa Mollel aliongeza kuwa kila kitu kimerahisishwa katika mfumo huo, ni mfumo rafiki na unakwenda kuondoa kabisa matumizi ya karatasi mahakamani kama ambavyo imekuwa ikielezwa na viongozi wa Mahakama ya Tanzania. ‘’Kwetu sisi Mahakama haya ni maboresho makubwa kuelekea Mahakama Mtandao na mfumo huu ni suluhisho la upatikanaji wa haki kwa wakati,’’ alisema na kuongeza kuwa mfumo huo pia umeunganishwa na mifumo mingine ya Mahakama kama Mfumo ukusanyaji maduhuli ya Mahakama.

Hivi karibuni, Jaji Mfawidhi wa Mahakama Kuu ya Tanzania, Kanda ya Shinyanga, Mhe. Athumani Matuma alifungua mafunzo hayo na kuwataka watumishi wa Mahakama kuwa tayari kuupokea mfumo mpya wa usimamizi wa mashauri (e-CMS).

Jaji Matuma aliwataka watumishi wa Mahakama kuzijua faida za mfumo huo na namna ulivyorahisisha na kuleta ufanisi katika utendaji kazi wa Mahakama. Aidha, aliwasisitiza kuutumia mfumo ipasavyo ili kusaidia juhudi za Mahakama ya Tanzania kuelekea Mahakama Mtandao (e-judiciary).  

Mafunzo ya mfumo huo yanahusisha Majaji wa Mahakama Kuu ya Tanzania, Kanda ya Shinyanga, Naibu Msajili, Mtendaji wa Mahakama, Mahakimu na Watumishi wa Mahakama. Mafunzo hayo pia yatawafikia wadau wote wa Mahakama ili wawe tayari kwenda na kasi ya Mahakama ya Tanzania katika kuelekea Mahakama Mtandao.

Ikumbukwe kuwa Mahakama ya Tanzania ipo katika hatua za maboresho ya mifumo yake ya kiutendaji katika kuboresha huduma kwa wananchi kama ilivyoainishwa katika Nguzo ya Pili ya Mpango Mkakati wa Mahakama ya Tanzania wa mwaka 2020/2021 – 2024/2025 ambayo iinakusudia kutoa huduma za kimahakama zenye ufanisi.

Afisa TEHAMA wa Mahakama Kuu ya Tanzania, Kanda ya Shinyanga, Bi. Nashilaa Mollel akitoa mada wakati wa mafunzo ya mfumo wa usimamizi wa mashauri ulioboreshwa (Advanced Case Management System) kwa watumishi wa Mahakama Kanda ya Shinyanga.

Naibu Msajili wa Mahakama Kuu ya Tanzania, Kanda ya Shinyanga, Mhe. Warsha Ng’humbu akisikiliza kwa makini mada kuhusu mfumo wa usimamizi wa mashauri ulioboreshwa (e- CMS) wakati wa mafunzo hayo.

Watumishi wa Mahakama Kuu Kanda ya Shinyanga wakiwa katika makundi wakati wa mafunzo ya mfumo wa usimamizi wa mashauri ulioboreshwa (e CMS) yanayoendelea Kanda ya Shinyanga.

(Habari hii imehaririwa na FAUSTINE KAPAMA-Mahakama, Mwanza).