MTENDAJI MKUU WA MAHAKAMA AFANYA ZIARA YA KUSTUKIZA MWANZA

Na Stephen Kapiga-Mahakama Mwanza

Mtendaji Mkuu wa Mahakama ya Tanzania, Prof. Elisante Ole Grabriel jana tarehe 17 Aprili, 2023 amefanya ziara ya kustukiza kukagua majengo ya Mahakama za Mwanzo Ilemela, Mwanza Mjini na Mkuyuni yaliyopo katika jiji la Mwanza.

Katika ukaguzi huo, Mtendaji Mkuu aliambatana na Msajili Mkuu wa Mahakama ya Tanzania, Mhe. Wilbert Chuma pamoja na Hakimu Mkazi Mfawidhi wa Mahakama ya Hakimu Mkazi Mwanza, Mhe. Monica Ndyekobora.

Lengo la ukaguzi huo ni kujionea hali halisi ya majengo katika Mahakama hizo na nini Mahakama ya Tanzania inaweza kufanya ili kuwawezesha watumiaji kuyatumia katika hali ya usalama.

Katika Mahakama ya Mwanzo IIemela, Prof Ole Gabriel alijionea hali halisi ya uchakavu wa jengo hilo zikiwemo nyufa mbalimbali ambazo zimejitokeza.

“Kwa kuwa katika jengo hili bado hatujapata hati ya kiwanja nawashauri muifuatilie kisha mtupatie taarifa na ofisi yangu itatuma mshauri ujenzi ili kuja kufanya upembuzi yakinifu na kama akishauri jengo hili lote livunjwe na kujengwa lingine basi tutafanya hivo. Lakini kwanza tuwe na hati ya eneo hili ili tuwe huru zaidi kuweza kuliendeleza na kufanya ukarabati unaostahili,” alisema.

Katika viwanja vya eneo la Mahakama ya Mwanzo mjini, Mtendaji Mkuu aliweza kujionea hali halisi ya jengo la Mahakama hiyo ukiwemo ufinyu wa eneo ambao una majengo mengine ya taasisi za Serikali.

Akiongea katika tukio hilo, Hakimu Mkazi Mfawidhi wa Mahakama ya Wilaya Nyamagana, Mhe Veronica Mgendi aliomba kama itawezekana shughuli za Mahakama ya Mwanzo kuhamishwa kutoka katika jengo hilo.

“Mtendaji na Msajili Mkuu nashauri shughuli za Mahakama hii kuhamishiwa katika majengo ya Mahakama Kuu ya zamani, eneo la Kamanga kwani majengo yapo wazi na nafasi ya kutosha, pia itarahisisha hata kwa wadau kuwa karibu na Mahakama zote mbili, yaani Mahakama ya Mwanzo na Mahakama ya Wilaya,” alisema.

Naye Hakimu Mkazi Mfawidhi wa Mahakama ya Mwanzo Mkuyuni, Mhe Jenipher Nkwambi alimwelezea Mtendaji Mkuu hali halisi ya mazingira katika Mahakama hiyo ambayo imepakana na Bar pamoja nyumba ya kulala wageni na kwa upande mwingine ni Soko la Mkuyuni pamoja na makazi ya raia.

“Mtendaji Mkuu katika Mahakama yetu hii kuna nyakati huwa inatulazimu kufunga Mahakama kwa muda kutokana kukosa hali ya utulivu, kwa mfano inapotokea msiba katika nyumba za jirani basi wafiwa huwa wanalia wakiwa katika maeneo haya, hivyo tunakosa utulivu na kutulazimu kusimamisha Mahakama kwa muda mpaka hapo hali ya utulivu itakapokuwepo,” alisema.

Mtendaji Mkuu wa Mahakama ya Tanzania  Prof. Elisante Ole Gabriel(katikati) na Msajili Mkuu wa Mahaka ya Tanzania, Mhe. Wilbert Chuma(wa tatu kushoto) wakiwa katika picha ya pamoja na baadhi ya watumishi wa Mahakama ya Mwanzo Ilemela alipotembelea Mahakama hiyo jana tarehe 17 Aprili, 2023. Kushoto kwa Prof. Ole Gabriel Elisante ni Hakimu Mkazi Mfawidhi wa Mahakama ya Hakimu Mkazi Mwanza, Mhe. Monica Ndyekobora.

Mtendaji Mkuu wa Mahakama ya Tanzania, Prof Elisante Ole Gabriel (katikati) na Msajili Mkuu wa Mahakama ya Tanzania, Mhe. Wilbert Chuma (wa tatu kushoto) wakiwa katika picha ya pamoja na sehemu ya watumishi wa Mahakama ya Mwanzo Mjini.

Mtendaji Mkuu wa Mahakama ya Tanzania, Prof Elisante Ole Gabriel akiingia katika ofisi ya Hakimu Mkazi Mfawidhi Mahakama ya Mwanzo Mjini alipofika kwa ajili ya ukaguzi wa jengo hilo.

Mtendaji mkuu wa mahakama ya Tanzania, Prof Elisante Ole Gabriel (juu na chini) akiwa katika Masijala ya kuhifadhi Majalada yaliyofungwa katika Mahakama ya Mwanzo Mjini.

Mtendaji Mkuu wa Mahakama ya Tanzania Prof Elisante Ole Gabriel(katikati) akiwa na Msajili Mkuu wa Mahakama ya Tanzania, Mhe. Wilbert Chuma(wa tatu kushoto) na watumishi wengine wa Mahakama ya Mwanzo Mkuyuni.

Mtendaji Mkuu wa Mahakama ya Tanzania, Prof Elisante Ole Gabriel akiwa katika jengo la Mahakama ya Mwanzo Mjini pindi alipofanya ziara fupi ya kukagua miundombinu ya jengo hilo.

Msajili Mkuu wa Mahakama ya Tanzania, Mhe. Wilbert Chuma(Kushoto) akiongea jambo na Mtendaji Mkuu wa Mahakama ya Tanzania, Prof Elisante Ole Gabriel mara baada ya kumaliza kukagua miundombinu ya majengo katika Mahakama za Mwanzo zilizopo mjini Mwanza.

 (Habari hii imehaririwa na FAUSTINE KAPAMA-Mahakama, Mwanza)