PROF. OLE GABRIEL AIPONGEZA KANDA YA MUSOMA KWA KUTUNZA MIUNDOMBINU YA UTOAJI HAKI

 

Na. Francisca Swai – Mahakama, Musoma.

Mtendaji Mkuu wa Mahakama ya Tanzania Prof. Elisante Ole Gabriel amewapongeza watumishi na uongozi wa Mahakama Kuu ya Tanzania, Kanda ya Musoma kwa jitihada zao kubwa za kutunza na kuhifadhi mazingira ya jengo la Mahakama hiyo na kuwaasa kuendelea kulitunza jengo hilo.

Akizugumza na watumishi mara baada ya kuhitimisha ziara yake ya ukaguzi wa maendeleo ya ujenzi wa Mahakama ya mwanzo Tarime mjini, jana tarehe 15 April, 2023 Prof. Ole Gabriel alisema, Serikali inatumia fedha nyingi katika kuboresha miundombinu ya Mahakama ni wajibu wakila mtumishi kuilinda na kuitunza kwa manufaa ya wananchi.

“Kutokana na uboreshaji wa miundombinu hii ya kisasa ya kutolea haki nchini, nawapongeza watumishi na uongozi wa Mahakama Kuu ya Tanzania, Kanda ya Musoma kwa jitihada zao za dhati za kuendelea kuhifadhi mazingira na jengo kwa ujumla, ujenzi ni hatua moja na utunzaji wa miundombinu ni jambo lingine la msingi”, alisema Prof. Ole Gabriel.

Pia, Prof. Ole Gabriel alipata wasaa wa kukutana na watumishi wa Kanda hiyo waliokuwa wakiendelea na mafunzo ya Mfumo mpya wa Usimamizi wa Mashauri kielektroniki (e-Case Management) Mahakamani hapo na  kuwapongeza kwa jitihada kubwa za kuendeleza matumizi ya Teknolojia ya Habari na Mawasiliano (TEHAMA), “endeleeni na moyo wa kujituma katika kazi hata katika siku za mapumziko bado mmejitoa kufika kazini kwa ajili ya kujifunza”, aliwapongeza Prof. Ole Gabriel.

Aidha, Mtendaji Mkuu huyo, amewaasa watumishi kujiendeleza katika masomo mbalimbali kwani mambo yanabadilika kwa kasi sana ambapo alisema “Mahakama ya Tanzania inawekeza zaidi kwa watumishi hasa wa kada za chini kwa kuwapa vibali vya kuhudhuria mafunzo mbalimbali na kuwadhamini kadri uwezo wa kimahakama unavyoruhusu”, alisema Mtendaji Mkuu.

Prof. Ole Gabriel amewasihi watumishi kufanya kazi kwa moyo na kujibidiisha kuielewa na kuitumia mifumo mbalimbali ya TEHAMA inayotumika kuratibu shughuli mbalimbali za utoaji haki kwa wananchi mahakamani, kwani Mahakama ya Tanzania haitarudi nyuma katika matumizi ya TEHAMA na mambo mazuri zaidi yanaendelea kuja ndani ya Mahakama.

Naye, Naibu Msajili wa Mahakama Kuu, Kanda ya Musoma Mhe. Frank Moshi, ameeleza kuwa, watumishi wa Mahakama Kuu, Kanda ya Musoma na Wadau wake wamepokea kwa furaha kubwa mfumo huu mpya wa Usimamizi wa Mashauri kielektroniki (e-Case Management)  ambao wamejifunza namna unavyofanya kazi na kwamba kupitia mfumo huu utamfanya mwananchi apate haki yake ndani ya muda mfupi na kwa wakati hivyo wako tayari kushirikiana kwa pamoja kufanikisha hilo.

Kwa upande wake Mtendaji wa Mahakama Kuu ya Tanzania, Kanda ya Musoma Bw. Festo Chonya ameshukuru kwa ushirikiano uliopo kati ya Makao Makuu na Mahakama za chini na kuahidi watumishi wa Mahakama Kanda ya Musoma kuendelea kufanya kazi kwa bidii ili kuendana na kasi ya Mahakama katika matumizi ya TEHAMA kurahisisha utoaji haki kwa wananchi kwa wananchi.

Mtendaji Mkuu wa Mahakama ya Tanzania Prof. Elisante Ole Gabriel (mwenye suti nyeusi) akisalimiana na viongozi wa Mahakama Kuu ya Tanzania Kanda ya Musoma huku akifurahia mazingira ya Mahakama hiyo.

Mtendaji wa Mahakama Kuu, Kanda ya Musoma Bw. Festo Chonya (aliyesimama) akimkaribisha Mtendaji Mkuu wa Mahakama ya Tanzania Prof. Elisante Ole Gabriel (katikati) kuongea na watumishi wa Mahakama Kuu ya Tanzania, Kanda ya Musoma, kulia ni Naibu Msajili wa Mahakama Kuu Kanda ya Msoma Mhe. Frank Moshi.

Naibu Msajili wa Mahakama Kuu, Kanda ya Musoma Mhe. Frank Moshi (aliyesimama) akielezea kwa ufupi namna mafunzo ya Mfumo mpya wa Usimamizi wa Mashauri kielektroniki (e-Case Management) ulivyopokelewa na watumishi pamoja na wadau Kanda ya Musoma, kushoto ni Mtendaji Mkuu wa Mahakama ya Tanzania Prof. Elisante Ole Gabriel.

Mtendaji Mkuu wa Mahakama ya Tanzania Prof. Elisante Ole Gabriel (katikati) akiongea na watumishi wa Mahakama Kuu Musoma (hawako pichani) alipotembelea Mahakama hiyo mapema jana.

Mtendaji Mkuu wa Mahakama ya Tanzania Prof. Elisante Ole Gabriel (aliyesimama) akiongea na watumishi wa Mahakama Kuu Kanda ya Musoma  waliokuwa wakiendelea na mafunzo ya Mfumo mpya wa Usimamizi wa Mashauri kielektroniki (e-Case Management)  alipotembelea Mahakama hiyo mapema jana.

Mtendaji Mkuu wa Mahakama ya Tanzania Prof. Elisante Ole Gabriel (katikati) akiwa katika picha ya pamoja na viongozi na watumishi wa Mahakama Kuu ya Tanzania, Kanda ya Musoma.

Madhari ya Jengo la Mahakama Kuu ya Tanzania, Kanda ya Musoma.

Madhari ya Jengo la Mahakama Kuu ya Tanzania, Kanda ya Musoma.