WATUMISHI DIVISHENI YA MAKOSA YA RUSHWA NA UHUJUMU UCHUMI WAPIGWA MSASA

Na William Mogore-Divisheni ya Makosa ya Rushwa

Watumishi wa Mahakama Kuu ya Tanzania, Divisheni ya Makosa ya Rushwa na Uhujumu Uchumi wamepigwa msasa kwenye Mfumo wa Kuratibu Mashauri ulioboreshwa unaojulikana kama Advanced Case Management System (e-CMS).

Mafunzo hayo yaliendeshwa jana tarehe 13 Aprili, 2023 na Naibu Msajili wa Mahakama Kuu ya Tanzania Divisheni hiyo Mhe. Magdalena Ntandu akishirikiana na Afisa Teknolojia wa Habari na Mawasiliano (TEHAMA) Bw. William Mogore.

Mhe. Naibu Msajili alisema, "Mfumo wa Mashauri umeboreshwa sana na zile changamoto tulizokuwa tunakumbana nazo kwa kiasi kikubwa zimetatuliwa. Lakini pia Mfumo mpya umeunganishwa na wadau wetu ambao ni Ofisi ya Mashtaka, NIDA, BRELA na wengine."

Alisema mfumo huo unawaweka karibu na wadau waMahakama. Aliendelea kusema, "Mfumo pia unafanya kazi ya kupangia mashauri moja kwa moja (Automatic Assignment). Kadhalika, mfumo unaruhusu kubadili upangiaji huo kwa kuchagua Jaji, Naibu Msajili au Hakimu Mfawidhi kwa njia ya kawaida."

Aliwashukuru watumishi wote walioshiriki kwenye mafunzo hayo na kuwaasa waupokee mfumo huo.

Naibu Msajili wa Mahakama Kuu ya Tanzania Divisheni ya Makosa ya Rushwa na Uhujumu Uchumi, Mhe. Magdalena Ntandu akieleza jambo (picha na maktaba).