JAJI MASAJU AAGWA DODOMA

Na Arapha Rusheke, Mahakama Kuu Dodoma 

Jaji Mfawidhi wa Mahakama Kuu ya Tanzania, Kanda ya Dodoma, Mhe. Gerson Mdemu hivi karibuni aliwaongoza watumishi wa Mahakama hiyo kumuaga Jaji wa Mahakama Kuu ya Tanzania katika Kanda hiyo, Mhe. George Masaju ambaye ameteuliwa kuwa mshauri wa Rais kwenye masuala ya kisheria. 

Hafla hiyo ilifanyika katika ukumbi wa Mahakama katika Kituo Jumuishi cha Utoaji Haki Dodoma na kuhudhuriwa na Majaji wa Mahakama Kuu kwenye Kanda hiyo, Mhe. Dkt. Adam Mambi, Mhe. Fatma Khalfan na Mhe. Suleiman Hassan.

Alkizungumza katika hafla hiyo, Jaji Mfawidhi alimweleza Mhe. Masaju kuwa Serikali inatambua umuhimu wake na kazi zake alizofanya zimekuwa chachu ya maboresho makubwa yanayoendelea kufanyika katika Mahakama ya Tanzania.

“Serikali inatambua umuhimu na mchango wako katika kuimarisha maboresho ambayo yanaendelea kufanyiwa kazi katika Mahakama ya Tanzania, tutaendelea kuyafanyia kazi yote ambayo umetushauri,” alisema Jaji Mdemu.

Kwa upande wake, Jaji Masaju ameushukuru uongozi wa Mahakama kwa ushirikiano aliopewa tangu alipoteuliwa kuhudumu katika Kanda ya Dodoma tarehe 01 Aprili, 2018 na amejifunza vitu vingi.

“Katika Mhimili huu watu wote tunategemeana, kila mtu ana nafasi yake wakati wa kutekeleza wajibu kazini awe Mlinzi, Dereva, Muhudumu, Karani na yoyote katika kada zote.

“Mathani, bila Mlinzi kuwepo na ofisi ikaungua au mafaili yote yakaibiwa, maana yake huduma hazitatolewa. Hivyo, nasisitiza upendo na heshima kwa kila mtu na kumtegemea Mungu ndio nguzo kubwa katika maisha,” alisema.

Nao baadhi ya Majaji na watumishi wa Mahakama Kanda ya Dodoma waliohudhuria hafla hiyo wamemwelezea Jaji Masaju kuwa ni mtu mwenye weledi na anayesimamia sheria. Wamesema Jaji Masaju ametoa mchango mkubwa katika maboresho yanayoendelea mahakamani.

Rais wa Jamhuri ya Muungano wa Tanzania, Mhe. Dkt. Samia Suluhu Hassan hivi karibuni alimteua Jaji Masaju kuwa mshauri wa Rais kwenye masuala ya kisheria.

Jaji Masaju alikuwa mshauri wa kisheria katika Ofisi ya Rais kabla ya kuwa Naibu Mwanasheria Mkuu wa Serikali mwaka 2009. Aliteuliwa kuwa Mwanasheria Mkuu wa Serikali tarehe Januari 2, 2015. Aliteuliwa kuwa Jaji wa Mahakama Kuu tarehe 1 Februari, 2018.

Jaji  wa Mahakama Kuu ya Tanzania, Mhe. George Masaju akiwa ukumbini akisikiliza jambo katika hafla ya kumuaga iliyofanyika hivi karibuni katika ukumbi wa Kituo Jumuishi cha Utoaji Haki Dodoma.

Jaji George Masaju akikata keki katika hafla hiyo.

Jaji Mfawidhi wa Mahakama Kuu ya Tanzania, Kanda ya Dodoma, Mhe. Gerson Mdemu (kushoto) akimweleza jambo Mhe. George Masaju katika hafla ya kumuaga.

Watumishi wa Mahakama Kuu Kanda ya Dodoma wakitoa zawadi kwa Jaji George Masaju.

Majaji wa Mahakama kuu kanda ya Dodoma wakiwa katika ukumbi wa Mahakama kwenye hafla ya kumuaga Jaji George Masaju (hayupo kwenye picha).

Watumishi wa Mahakama Kuu, Kanda ya Dodoma wakiwa ukumbini kufuatilia tukio hilo la kuagwa kwa Jaji Masaju.

Aliyekuwa Karani wa Jaji George Masaju, Bi. Leah Mganga akitoa neno la pongezi.

(Habari hii imehaririwa na FAUSTINE KAPAMA-Mahakama)