JAJI MFAWIDHI AONGOZA BARAZA LA WAFANYAKAZI DIVISHENI YA KAZI

·Hoja tano zaafikiwa kupelekwa kwenye Baraza Kuu

·Kasi utoaji elimu Divisheni ya Kazi haipimiki

Na Faustine Kapama na Mwanaidi Msekwa-Mahakama Kazi

Jaji Mfawidhi wa Mahakama Kuu ya Tanzania, Divisheni ya Kazi, Mhe. Dkt. Yose Mlyambina jana tarehe 5 Mei, 2023 aliongoza Kikao cha Baraza la Wafanyakazi la Mahakama hiyo kujadili mambo mbalimbali ya kiutendaji na utumishi.

Kikao hicho kilichofanyika katika Kituo Jumuishi cha Utoaji Haki Kinondoni kilihudhuriwa pia na viongozi waandamizi wa Divisheni hiyo, Naibu Msajili Mfawidhi, Mhe. Said Ding’ohi, Naibu Msajili, Mhe. Enock Cassian na Mtendaji, Bw. Samson Mashalla.

Baada ya kufungua Kikao hicho, Mhe. Dkt. Mlyambina aliwakaribisha wajumbe kuimba wimbo maarufu wa wafanyakazi wa ‘solidarity forever’ na baadaye kufanya utambulisho kabla ya kumruhusu Katibu Msaidizi wa Baraza, Bw. Robert Mchocha kusoma agenda.

Akiwakaribisha wajumbe katika Kikao hicho, Jaji Mfawidhi aliwaomba kuwa huru kuchangia na kutoa maoni mazuri yatakayosaidia Baraza hilo kufikia maazimio yatakayowasaidia siyo tu watumishi wa Divisheni hiyo, bali pia wafanyakazi wa Mahakama ya Tanzania kwa ujumla.

“Niwashukuru wajumbe kwa kuhudhuria kwenye Kikao cha Baraza hili. Ushiriki wenu ni muhimu sana kwani michango ya mawazo mtakayotoa itasaidia kufikia maazimio yenye tija yatakayopelekwa kawenye Baraza Kuu siyo kwa manufaa yetu sisi bali pia watumishi wa Mahakama kwa ujumla,” alisema.

Katika Kikao hicho kilichohudhuriwa na Katibu wa TUGHE wa Wilaya za Kinondoni na Temeke, Bw.  Steven Wadi, hoja tano zilizochambuliwa kwa kina ziliazimiwa na wajumbe kuwasilishwa kwenye Baraza Kuu la Wafanyakazi wa Mahakama ya Tanzania.

Kadhalika, katika Kikao hicho, Karani Mkuu, Bw.  Mchocha, alitangazwa rasmi kuwa mfanyakazi bora wa Divisheni hiyo baada ya kukamilika kwa mchakato ulioanza wiki kadhaa zilizopita.

Mwishoni mwa mwezi Aprili, 2023, wafanyakazi wa Divisheni hiyo walipendekeza majina matano ambayo yalipelekwa katika Menejimenti kwa ajili ya uchambuzi wa kumpata mfanyakazi bora mmoja.

Jina la Bw. Mchocha lilichomoza miongoni mwa watumishi waliopendekezwa baada ya wajumbe wa Menejimenti ya Divisheni ya Kazi kuchambua sifa na vigezo vya kuwa mfanyakazi bora vilivyowekwa na TUGHE.

Jaji wa Mahakama Kuu ya Tanzania, Divisheni ya Kazi, Mhe. Dkt. Modesta Opiyo alipata nafasi ya kumtangaza mfanyakazi bora huyo kwenye tafrija fupi iliyofanyika mahakamani hapo.

Kabla ya tafrija hiyo, Mahakama Kuu Divisheni ya Kazi iliendeleza utamaduni wake wa utoaji wa elimu ya sheria kwa wadau na watumishi wake. Tarehe 3 Mei, 2023, mada mbili muhimu za mifumo ya Teknolojia ya Habari na Mawasiliano (TEHAMA) ziliwasilishwa.

Mada moja ya Mfumo wa Sema na Mahakama unaohusu uwasilishaji kwa njia ya kielektoniki wa malalamiko, mapendekezo, maoni na mrejesho kutoka kwa wananchi wa huduma zinazotolewa na Mahakama ilitolewa na Afisa TEHAMA kutoka Makao Makuu ya Mahakama ya Tanzania, Bw. Lazaro Sanga.

Baadaye tarehe 5 Mei, 2023 mfumo wa Tanzlii wa kuhifadhi uamuzi unaotolewa na Mahakama ya Rufani na Mahakama Kuu pamoja na sheria mbalimbali uliwasilishwa kwa viongozi na watumishi wa Divisheni hiyo na waanzilishi wa mfumo huo, Mhe. Kifungo Kariho na Bw. Salum Tawan.

Kamati ya Elimu ya Ndani ya Mahakama Kuu ya Tanzania, Divisheni ya Kazi, chini ya Mwenyekiti wake, Jaji wa Mahakama Kuu kutoka Divisheni hiyo, Mhe. Katarina Mteule imekuwa ikisisitiza matumizi ya TEHAMA kwa watumishi na wadau ili kuboresha utoaji wa huduma bora za kimahakama kwa wananchi.

Jaji Mfawidhi wa Mahakama Kuu ya Tanzania, Divisheni ya Kazi, Mhe. Dkt. Yose Mlyambina (juu na chini) akiongoza kikao cha Baraza la Wafanyakazi jana tarehe 5 Mei, 2023. Wengine katika picha ya chini ni Katibu Msaidizi wa Baraza, Bw. Robert Mchocha (kushoto) na Katibu wa TUGHE wa Wilaya za Kinondoni na Temeke, Bw.  Steven Wadi (kulia).

Wajumbe wa Baraza Kuu wakiimba wimbo wa 'solidarity forever' kabla ya kuendelea na kikao.

Wajumbe wa Baraza Kuu (chini na chini) wakishiriki kwenye kikao kikamilifu.

Mtendaji wa Mahakama Kuu Divisheni ya Kazi, Bw. Samson Mashalla akieleza zawadi atakayozawadiwa mfanyakazi bora.

Afisa Teknolojia ya Habari na Mawasiliano (TEHAMA) wa Mahakama Kuu Divisheni ya Kazi, Bi. Mwanaidi Msekwa akiwa tayari kuweka mitambo sawa kwa ajili ya kufanikisha kikao hicho.

 Mfanayakazi bora, Bw. Robert Mchocha akitabasamu.

Jaji Mfawidhi wa Mahakama Kuu ya Tanzania, Divisheni ya Kazi, Mhe. Dkt. Yose Mlyambina (kulia) akimpongeza Bw. Robert Mchocha kwa kuchaguliwa kuwa mfanyakazi bora wa Divisheni hiyo. 

Meza Kuu ikiongozwa na Jaji Mfawidhi wa Mahakama Kuu ya Tanzania, Divisheni ya Kazi, Mhe. Dkt. Yose Mlyambina (katikati waliokaa) ikiwa katika picha ya pamoja na viongozi waandamizi wa Mahakama hiyo. Wengine waliokaa ni Katibu Msaidizi wa Baraza, Bw. Robert Mchocha (kushoto) na Katibu wa TUGHE wa Wilaya za Kinondoni na Temeke, Bw.  Steven Wadi (kulia).

Meza Kuu ikiongozwa na Jaji Mfawidhi wa Mahakama Kuu ya Tanzania, Divisheni ya Kazi, Mhe. Dkt. Yose Mlyambina (katikati waliokaa) ikiwa katika picha ya pamoja na wajumbe wa Baraza la Wafanyakazi. Wengine waliokaa ni Katibu Msaidizi wa Baraza, Bw. Robert Mchocha (kushoto) na Katibu wa TUGHE wa Wilaya za Kinondoni na Temeke, Bw.  Steven Wadi (kulia).

Afisa TEHAMA kutoka Makao Makuu ya Mahakama ya Tanzania, Bw. Lazaro Sanga akifundisha mfumo wa Sema na Mahakama kwa watumishi na wadau (hawapo kwenye picha).

Waanzilishi wa mfumo wa Tanzlii, Mhe. Kifungo Kariho (juu) na Bw. Salum Tawan (chini) wakielezea namna unavyofanya kazi.