JAJI MKUU, UJUMBE TAASISI YA KIMATAIFA YA SHERIA NA MAENDELEO WAKUTANA

Na Magreth Kinabo- Mahakama

Jaji Mkuu wa Tanzania, Prof. Ibrahim Hamis Juma leo tarehe 16 Mei, 2023 amekutana na ujumbe kutoka Taasisi ya   Kimataifa ya Sheria na Maendeleo ‘International Development Law Organization’ (IDLO) na kuahidi kuendelea kutoa ushirikiano kwa taasisi hiyo katika nyanja mbalimbali za masuala ya kisheria.

Ujumbe huo ulikutana na Jaji Mkuu katika ofisi yake iliyopo Mahakama ya Rufani Tanzania, Jijini Dar es Salaam, ambapo alisema Mahakama ya Tanzania imekuwa ikifanya maboresho katika mambo mbalimbali ya kisheria kuanzia mwaka 2011. Pia katika maboresho hayo imekuwa ikihusisha wadau wake, ambao ni Jeshi la Polisi, Jeshi la Magereza, Ofisi ya Taifa ya Mashitaka na Uhamiaji,

Alisema kuwa Mahakama imekuwa ikishirikiana na IDLO kupitia mkutano ulifanyika Maputo nchini Msumbiji, ambapo mada ilikuwa ni kuhusu ugaidi. Hivyo katika mazungumzo yao aliishauri taasisi hiyo kuangalia maeneo ambayo wataweza kushirikiana.

“Tuna maeneo mengi ambayo tunaweza kushirikiana na mimi nipo tayari kutoa ushirikiano mtakaoutaka, likiwemo eneo la Kamati ya Kanuni,” alisema Jaji Mkuu.

Mhe. Prof. Juma aliongeza kwamba kuna changamoto za ucheleweshaji wa upelelezi na uendeshaji wa mashtaka katika makosa ya ugaidi, usarifishaji wa binadamu na dawa za kulevya, uharamia wa majini kwa kuwa makosa hayo yanahitaji ushirikiano wa kimataifa.

Aidha, Jaji Mkuu alifafanua kuwa hivi sasa kuna makosa ya uhalifu wa kimtandao, hivyo taasisi hiyo inaweza kuangalia jinsi ya kuweza kushirikiana katika eneo hilo.

Kwa upande wake, Kiongozi wa Ujumbe huo, Romualdo   Mavedzenge ambaye ni Meneja IDLO Ukanda wa Afrika alisema lengo la ziara  hiyo ni kuangalia maeneo ya ushirikiano hasa katika kutekeleza mradi wa kuboresha upelelezi, uendeshaji wa mashtaka na ushughulikiaji wa mashauri ya makosa yanayofanywa kwa kupangwa na kuvuka mipaka kwa Ukanda Afrika Mashariki. Pia alisema mradi huo unatekelezwa katika nchi 17 za Afrika ili kuwawezesha watu kudai haki zao.

Meneja Mkazi kutoka Kenya, Tereza Mugazda, alisema katika kutekeleza mradi huo wanaangalia maeneo matatu ambayo kwa kuyajengea uwezo ambayo ni upelelezi, uendeshaji wa mashtaka ikiwemo kuwajengea uwezo maafisa wa Mahakama.

IDLO ni taasisi ya kimataifa isiyo ya kiserikali inayojishughulisha na kukuza utawala wa sheria na mwendeleo endelevu yenye makao yake makuu, Roma nchini Italia.

Jaji Mkuu wa Tanzania, Mhe. Prof. Ibrahim Hamis Juma akitoa ufafanuzi kuhusu masuala mbalimbali alipokutana na ujumbe wa Maafisa kutoka Taasisi ya Kimataifa ya Sheria na Maendeleo yenye makao makuu yake Roma nchini Itali na kwa upande wa Afrika ni Jijini Nairobi Kenya, “International Development Law Organisation” (IDLO) Maafisa hao hawapo pichani leo tarehe 16 Mei, 2023 Ofisini kwake Jijini Dar es Salaam.

Kiongozi wa ujumbe huo ambaye ni Meneja wa Taasisi hiyo Ukanda wa Afrika Bw. Romualdo Mavedzenge akilelezea kwa ufupi dhumuni la ziara yao ofisini kwa Jaji Mkuu, Jijini Dar es salaam.

Meneja Mkazi wa Shirika la IDLO kutoka Kenya, Ms. Teresa Mugadza akichangia jambo wakati wa ziara hiyo ofisini kwa Jaji Mkuu.

Jaji wa Mahakama ya Rufani ya Tanzania na Mkuu wa Chuo cha Uongozi wa Mahakama Lushoto (IJA) Mhe. Dkt. Paul Kihwelo (kulia), Jaji wa Mahakama Kuu ya Tanzania, Divisheni ya Makosa ya rushwa na uhujumu Uchumi, Mhe. Godfrey Isaya (katikati) na Kiongozi wa Programu kutoka IDLO nchini Kenya Ms. Lorraine Ochiel (wa kwanza kushoto) wakimsikiliza Jaji Mkuu wa Tanzania, Mhe. Prof. Ibrahim Hamis Juma walipomtembelea OfisinI kwake.

Jaji Mkuu wa Tanzania, Mhe. Prof. Ibrahim Hamis Juma akifafanua jambo alipokutana na ujumbe wa Maafisa kutoka Taasisi hiyo ya Kimataifa ya Sheria na Maendeleo “International Development Law Organisation” (IDLO). Ofisini kwake Jijini Dar es Salaam, wakiwa na ujumbe wa kuendelea kukuza utawala wa sheria na maendeleo endelevu.

Jaji Mkuu wa Tanzania, Mhe. Prof. Ibrahim Hamis Juma (wa tatu kushoto) akiwa kwenye picha ya pamoja na ujumbe wa Maafisa kutoka shirika la kimataifa lisilo la kiserikeli linalojihusisha na kukuza utawala wa sheria na maendeleo endelevu. Wengine ni Jaji wa Mahakama ya Rufani na Mkuu wa Chuo cha Uongozi wa Mahakama Lushoto (IJA) Mhe. Dkt. Paul Kihwelo (wa pili kulia) na Jaji wa Mahakama Kuu ya Tanzania, Divisheni ya Makosa ya rushwa na uhujumu Uchumi, Mhe. Godfrey Isaya (wa kwanza kushoto).

Meneja Mkazi wa Shirika la IDLO kutoka Kenya, Ms. Teresa Mugadza (aliyenyoosha mkono kulia) akichangia jambo wakati wa ziara hiyo ofisini kwa Jaji Mkuu.

Jaji Mkuu wa Tanzania, Mhe. Prof. Ibrahim Hamis Juma (katika) akibadilishana mawazo na sehemu ya ujumbe wa Maafisa kutoka shirika la kimataifa lisilo la kiserikeli linalojihusisha na kukuza utawala wa sheria na maendeleo endelevu (IDLO) mara baada ya kumtemebelea.

 (PICHA NA Innocent Kansha- Mahakama)