WATUMISHI MAHAKAMA SONGEA WAPIGWA MSASA KUHUSU SEMA NA MAHAKAMA

Na Hasani Haufi – Mahakama, Songea

Mahakama Kuu ya Tanzania, Kanda ya Songea, hivi karibuni iliendesha mafunzo kwa watumishi wake kuwajengea uelewa kuhusu Mfumo wa Sema na Mahakama unaohusu upokeaji na ushughulikiaji wa malalamiko kieletroniki (e-complaint) yanayotolewa na wananchi.

Akifungua mafunzo hayo yaliyofanyika katika Ukumbi wa Mahakama Kuu Songea, Kaimu Mtendaji wa Mahakama Kanda ya Songea, Bi. Paulina Kapinga alieleza matumaini yake baada ya mafunzo hayo, wao kama wapokeaji na washughulikiaji wa ndani wa malalamiko watakuwa tayari kutoa huduma bora zaidi na haraka kwa wananchi.

“Ni imani yangu kuwa baada ya mafunzo haya, watumishi watakuwa na uelewa wa pamoja wa namna ya kupokea na kushughulikia malalamiko kwa njia ya kielektroniki yanayotolewa na wananchi,” alisema.

Mafunzo hayo yalitolewa na Afisa Teknolojia Habari na Mawasiliano (TEHAMA) wa Mahakama Kuu ya Tanzania, Kanda ya Songea, Bi. Catherine Okumu. Alieleza kuwa Mahakama ipo katika utekelezaji wa mpango mkakati (2021/2022-2024/25), lengo ni kuhakikisha utoaji huduma ya haki unamlenga mwananchi.

Aliwaeleza washiriki wa mafunzo hayo kuwa katika kutekeleza malengo hayo ya kimkakati, Mahakama imeona ni vyema kuwekeza zaidi katika matumizi ya TEHAMA ikiwemo mfumo huo wa e-Complaints.

Alifafanua namna ya kupokea na kusajili malalamiko kutoka kwa wateja wa ndani pamoja na wateja wa nje, huku akielezea namna ya kushughulikia lalamiko lililowasilishwa na wateja kama linahusu taasisi au idara nyingine.

Bi. Catherine alisema kuwa ujio wa mfumo huo wa kielektroniki unawataka watumishi wa Mahakama kuyaishi mageuzi na matumizi ya TEHAMA wanapotekeleza majukumu yao ya kimahakama.

Mafunzo hayo yalifungwa na Naibu Msajili wa Mahakama Kuu ya Tanzania, Kanda ya Songea, Mhe. Elizabeth Nyembele, ambaye aliwasihi watumishi wawe na utayari chanya wa kutumia mfumo huo ili kufikia mwelekeo sahihi wa Mahakama Mtandao, ‘e-Judiciary.’

 

Kaimu Mtendaji wa Mahakama Kanda ya Songea, Bi. Paulina Kapinga akizungumza wakati anafungua mafunzo kwa watumishi wa Mahakama katika Kanda hiyo.

Afisa TEHAMA wa Mahakama Kuu Kanda ya Songea, Bi. Catherine Okumu akitoa mafunzo kwa washiriki.

Washiriki wa mafunzo hayo wakifatilia mada kwa ukaribu.

Washiriki wakijadiliana baada ya kushirikishwa na mwezeshaji kutoa michango yao.

Naibu Msajili wa Mahakama Kuu ya Tanzania, Kanda ya Songea, Mhe. Elizabeth Nyembele akitoa msisitizo juu ya mfumo huo.

(Habari hii imehaririwa na FAUSTINE KAPAMA-Mahakama)