JAJI KIONGOZI: ATAKA WADAU NA MIFUKO YA HIFADHI YA JAMII KUTATUA CHANGAMOTO ZA MIRATHI

 

Na Stephen Kapiga-Mwanza

 

Jaji Kiongozi wa Mahakama Kuu ya Tanzania, Mhe. Mustapher Mohamed Siyani ametoa wito kwa Mifuko ya Hifadhi ya Jamii kushirikiana na Mahakama katika kupendekeza namna ambayo inaweza kusaidia kuondoa changamoto zinazojitokeza wakati wa kushughulikia masuala ya mirathi.

 

Ametoa kauli hiyo leo tarehe 9 Juni 2023, akiwa jijini Dodoma, kwa njia ya video (mtandao) wakati wa akifungua semina ya Majaji, Mahakimu kutoka Kanda ya Ziwa,Mikoa ya Kigoma, Tabora na  Manyara , wakiwemo  baadhi ya Mameneja wa Mfuko wa Taifa wa Hifadhi ya Jamii (NSSF) wa maeneo hayo.

 

Mhe. Siyani amesema ni umuhimu wa kuimarisha mifumo inayohusu ustawi wa hifadhi ya jamii ambayo inalenga kulinda utu na maisha ya mwanadamu kwa kuendeleza mifumo ya kisheria yenye uwezo kulinda haki za msingi.

 

“Ili hilo lifanikiwe ni lazima vyombo vyote vya utoaji haki na wadau wote washirikiane.Ni vema kila mmoja wetu akakumbuka kuwa maisha ya mwanadamu hayana thamani bila mifumo ya kisheria yenye uwezo wa kulinda haki za msingi,” anasema Mhe Siyani.

 

“Suala la Hifadhi ya Jamii  linalogusa maisha ya watu, kwa mfano malipo ya mafao yanapohusisha mirathi yamekuwa na changamoto ya mawasiiano kati ya Mahakama na mifuko ya hifadhi ya jamii. Ni muhimu kupitia semina hii kuweza kujadili, kuibua na kupendekeza namna ambavyo utoaji haki katika eneo hili unaweza kurahisishwa na kunufaisha jamii yetu,”  anasisitiza.

 

Mhe Jaji Kiongozi ameongeza kwamba uwepo wa matumizi ya fomu mbalimbali za mirathi ambazo zimekuwa zikitumika kutekeleza amri za Mahakama katika mashauri ya mirathi kwa upande wa Mahakama za Mwanzo ni  fomu namba 5 na 6 na Mahakama za Wilaya na Mahakama Kuu ya Tanzania ni matumizi ya fomu namba 80 na 81.

 

Hivyo uwepo wa fomu hizo umesababisha mifuko ya hifadhi ya jamii kutumia fomu za Mahakama za Mwanzo tu ambazo ni namba 5 na 6 na kushindwa kutumia fomu namba 80 na 81, kwa kuwa kanuni za mifuko hiyo zinatambua matumizi ya fomu namba 5 na 6.

 

“Ni vizuri basi kupitia semina hii mkajadili changamoto za namna hiyo kwani kwa baadhi ya Kanda zetu  za Mahakama Kuu zimelazimika kutumia fomu namba 5 na 6 ambazo kimsingi ziliandaliwa kwa ajili ya matumizi ya Mahakama za Mwanzo zinapotoa amri mbalimbali za utekelezaji wa mirathi,”anasema.

 

Pia ni vema wakapendekeza mbinu rahisi zaidi za kushughulikia mashauri ya hifadhi ya jamii kwa maslahi ya jamii kwa jumla. Kwani kwa upande wa NSSF peke yake ina jumla ya mashauri 350 ambayo bado yanaendelea katika Mahakama mbalimbali ambayo yamechukua muda mrefu kumalizika na hivvo Mhe. Jaji Kiongozi amewataka Wahe. Majaji na Mahakimu wote kuhakikisha kuwa wanayapa kipaumbele mashauri hayo yanayohusu hifadhi za jamii.

 

Mhe. Siyani ameongeza kwamba katika kutoa haki kwenye eneo hilo, ni lazima watoa haki pamoja na wadau wajiepushe na kubanwa na mbinu za kiufundi badala yake wajikite kwenye haki zenyewe. 

 

Amefafanua kuwa matumizi ya mbinu za kiufundi katika kufanya maamuzi yamekuwa na athari mbalimbali, ikiwemo kuchelewesha haki lakini pia kuwanyima wananchi wengi haki zao. 

 

Mhe. Siyani amesema ni vema wakapendekeza mbinu rahisi zaidi za kushughulikia mashauri yanayohusu haki na hifadhi za jamii ambazo zitatumika kwa maslahi ya jamii nchini. 

 

“Mbinu hizo ningependa zizingatie usimamizi bora wa mashauri ili kuhakikisha muda unaotumika katika usikilizwaji wa mashauri unafupishwa na hivyo kupunguza gharama kwa wadau,” anasema.

 

Aidha Jaji Kiongozi amepongeza ushirikiano kati ya Mahakama ya Tanzania na wadau wake hususani Mfuko wa Taifa wa Hifadhi ya Jamii (NSSF) ikiwa ni utekelezaji wa Mpango Mkakati wa Miaka Mitano wa Mahakama utakaokamilika mwaka 2025. 

 

Semina hiyo ya siku mbili imeandaliwa na NSSF kwa kushrikiana na Chama cha Majaji na Mahakimu  (JMAT).

 Jaji Kiongozi wa Mahakama ya Tanzania Mhe. Mustepher  Mohamed Siyani akifungua semina ya siku mbili ya Wahe. Majaji na Mahakimu kwa njia ya Video (mtandao) kuhusu utoaji haki kwa wakati kwa ustawi wa hifadhi ya jamii, akiwa jijini Dodoma, iliyoandaliwa na Mfuko wa Taifa wa Hifadhi ya Jamii (NSSF) kwa kushirikiana na Chama cha Majaji na Mahakimu Tanzania (JMAT) inayoendelea jijini Mwanza leo tarehe 9 Juni 2023 katika ukumbi wa Malaika Beach. 

 Rais wa Chama cha M

ajaji na Mahakimu Tanzania (JMAT), Mhe. John Kahyoza akizungumza jambo  wakati wa uzinduzi wa semina inayoendelea juu ya utoaji haki kwa wakati kwa ustawi wa hifadhi ya jamii. 

Kaimu Mkurugenzi wa Mfuko wa Taifa wa Hifadhi ya Jamii(NSSF) Bw. Godfrey N.gonyani akiwasilisha hotuba yake ya ufunguzi wa semina hiyo.  

Jaji Mfawidhi Mahakama Kuu Kanda ya Mwanza, Mhe.Dkt Ntemi Kelekamajenga akiwakaribisha wajumbe wote wa semina hiyo.

 Sehemu ya washiriki wa semina juu ya utoaji haki kwa wakati kwa ustawi wa hifadhiya jamii inayowashirikisha wanachama wa JMAT kwa Mahakama za Mwanza,Shinyanga,Tabora,Kigoma,Musoma na Kagera wakifuatilia kwa makini hotuba ya ufunguzi wa semina hiyo iliyotolewa na Jaji Kiongozi wa Mahakama ya Tanzania Mhe Mustapher Mohamed Siyani(hayupo pichani). 

 Wahe. Majaji Wafawidhi wa Mahakama Kuu za Tanzania zilizohudhuria semina ya utoaji haki kwa wakati kwa ustawi wa hifadhi ya jamii. 

Meza kuu ikiongozwa na Rais wa JMAT ikiwa katika picha ya pamoja na baadhi ya washiriki wa semina hiyo.

(Picha na Stephen  Kapiga, Mwanza) 

(Habari hii imehaririwa na Magreth Kinabo)