JAJI LUVANDA AKABIDHIWA MIKOBA MAHAKAMA YA ARDHI

Na Dillon John-Divisheni ya Ardhi

Jaji Mfawidhi mpya wa Mahakama Kuu ya Tanzania, Divisheni ya Ardhi, Mhe. Elinaza Luvanda amekabidhiwa rasmi ofisi na mtangulizi wake, Mhe. Agnes Mgeyekwa ambaye amekuwa Jaji wa Mahakama ya Rufani. 

Hafla ya makabidhiano hayo ilifanyika hivi karibuni katika Chemba ya Jaji Mfawidhi na kushuhudiwa na wajumbe wa Menejimenti wa Divisheni hiyo Jijini Dar es Salaam.

Akizungumza kwa niaba ya Menejimenti, Mtendaji wa Mahahakama katika Divisheni ya Ardhi, Bw. Anatory Kagaruki alieleza kuwa watumishi wanaishi kama familią moja na Majaji na wamekuwa wakitekeleza majukumu yao kikamilifu, ikiwemo kushiriki katika vikao kazi mbalimbali pamoja na wadau ili kuimarisha huduma za utoaji haki kwa wananchi.

Alitaja moja ya vikao kazi hivyo ni kikao kikubwa cha wadau kilichofanyika katika Ukumbi wa Kambarage Benki Kuu ya Tanzania. Alisema kikao hicho kilifunguliwa na Jaji Kiongozi wa Mahakama Kuu ya Tanzania, Mhe. Mustapher Mohamed Siyani na kuhudhuriwa na viongozi mbalimbali.

“Kuna mafanikio mengi yamepatikana ambayo yalikuwa yanasimamiwa na Mhe. Mgeyekwa. Amekuwa kiongozi mzuri na mama mlezi wetu kwa nafasi yake aliyokuwa nayo,” alisema.

Akizungumza wakati wa makabidhiano hayo, Mhe. Mgeyekwa aliainisha mafanikio yaliyopatikana katika Divisheni hiyo, ikiwemo kuondoa mlundikano wa mashauri, kujenga ushirikiano imara kwa watumishi, wadau na kuleta upendo na ushirikiano baina yao wote.

“Katika kipindi chote tumeweza kuelekeza fedha katika usikilizaji wa mashauri na kwa matumizi ya Teknolojia ya Habari na Mawasiliano (TEHAMA) kwa asilimia 100,” alisema Mhe. Mgeyekwa.

Naye Jaji Luvanda alishukuru kwa mapokezi mazuri kutoka kwa mtangulizi wake, huku akieleza kuwa yote aliyotekeleza atayazidisha na kufanya Divisheni hiyo iendelee kufanya vizuri zaidi ya hapo.

Jaji Mfawidhi Mahakama Kuu ya Tanzania, Divisheni ya Ardhi, Mhe. Elinaza Luvanda akiongea na Menejimenti katika Ofisi ya Jaji Mfawidhi, Mhe. Agnes Mgeyekwa.

Jaji wa Mahakama ya Rufani, Mhe. Agnes Mgeyekwa (katikati) akiwa na Jaji Mfawidhi wa Mahakama Kuu ya Tanzania Divisheni ya Ardhi, Mhe. Elinaza Luvanda pamoja na wajume wa Menejimenti.

Jaji wa Mahakama ya Rufani, Mhe. Agnes Mgeyekwa (katikati) akiwa na Mridhi wake, Mhe. Elinaza Luvanda (wa tatu kushoto) pamoja na Majaji wa Divisheni hiyo.

Jaji wa Mahakama ya Rufani, Mhe. Agnes Mgeyekwa (katikati) akiwa katika picha ya pamoja na Jaji Mfawidhi mpya wa Mahakama Kuu ya Divisheni ya Ardhi, Mhe. Elinaza Luvanda (kushoto) na Jaji wa Mahakama Kuu Divisheni ya Ardhi, Mhe. Isaya Arufani (kulia) pamoja na Majaji wengine wa Mahakama hiyo (waliosimama), Mhe. Kevin Mhina (kulia), Mhe. Dkt. Theodora Mwenegoha (katikati) na Mhe. Lusungu Hemed (kushoto).

Jaji wa Mahakama ya Rufani , Mhe. Agnes Mgeyekwa (katikati) akiwa katika picha ya pamoja na Jaji Mfawidhi mpya wa Mahakama Kuu Divisheni ya Ardhi, Mhe. Elinaza B. Luvanda (kushoto) na Jaji wa Mahakama Kuu Divisheni ya Ardhi, Mhe. Isaya Arufani (kulia) pamoja na Menejimenti ya Divisheni hiyo (juu) na watumishi wengine (chini).

(Habari hii imehaririwa na FAUSTINE KAPAMA-Mahakama)