JAJI MLYAMBINA ATOA USHAURI MUHIMU KWA WATANZANIA

Na Faustine Kapama na Mwanaidi Msekwa-Mahakama

Jaji Mfawidhi wa Mahakama Kuu ya Tanzania, Divisheni ya Kazi, Mhe. Dkt Yose Mlyambina amewasihi Mawakili, Walimu wa Vyuo Vikuu, Wanafunzi na Watanzania kwa ujumla, hasa wale wanaotekeleza sheria kwa namna mbalimbali, kujenga utamaduni wa kuandika vitabu vinavyotokana na mambo wanayoyaona kwa vitendo.

Mhe. Dkt. Mlyambina ametoa rai hiyo leo tarehe 6 Juni, 2023 baada ya kupokea vitabu 450 vya rejea vyenye thamani ya zaidi ya millioni kumi za Kitanzania kutoka kwa Wakili wa Kujitegemea, Msomi Isaack Zake kwa ajili ya Mahakama Kuu na Mahakama ya Rufani kwenye hafla iliyofanyika katika Ukumbi wa Divisheni hiyo.

“Hatua hii itasaidia Taifa kutotegemea vitabu vya nje pekee ambavyo vingi viko kinadhalia zaidi na havijibu moja kwa moja changamoto za mazingira yetu,” alisema katika hafla hiyo iliyohudhuriwa na Majaji wa Divisheni hiyo, Mhe. Dkt. Modesta Opiyo na Mhe. Biswalo Mganga, Naibu Msajili Mfawidhi, Mhe. Saidi Ding’ohi, Naibu Msajili, Mhe. Cassian Matembele na watumishi wengine.

Vitabu hivyo ni nakala 150 vyenye jina, “Employers’ Common Mistakes under Labour Laws,” zingine 150 zenye jina, “How to terminate an employment agreement” na nakala nyingine 150 zenye jina, “Offences and Penalties under Labour Laws.” Jaji Mfawidhi amesema vitabu hivyo vitagawiwa kwa Majaji wote wa Mahakama Kuu na Mahakama ya Rufani.

Mhe. Dkt. Mlyambina amemshurukuru Msomi Zake na taasisi yake ya Tanzania Labour Guide kwa kuonyesha utayari wa kushirikiana na Mahakama katika mambo mengi, ikiwemo kutoa elimu ya mahaka pa kazi kuhusu sheria na pia kutekeleza ahadi aliyoitoa tarehe 3 Mei, 2023 alipokuja kujitambulisha ofisini kwake.

Alibainisha kuwa Mpango Mkakati wa Mahakama wa Miaka Mitano (2021-2025) hususani Nguzo ya Tatu inahusu Imani ya Wananchi na Ushirikishwaji Wadau unaitaka Mahakama kushirikiana na wadau kufanikisha utoaji wa haki, hivyo vitabu hivyo vina mchango mkubwa katika utekelezaji wa mpango huo, hasa Nguzo ya Pili ambayo inahimiza upatikanaji wa haki kwa wakati.

Mhe. Dkt. Mlyambina amesema Msomi Zake siyo Wakili wa kwanza kufanya jambo hilo jema, akikukumbuka mwaka 2021 akiwa Masjala ndogo ya Mahakama Kuu, Kanda ya Iringa, Wakili Audax Kahyendaguza alitoa msaada wa vitabu mbalimbali alivyoviandika mwenyewe na pia aliwahi kupokea kitabu kilichoandikwa na Wakili Nguli Ibrahim Bendera na kingine kutoka kwa Wakili na Mwalimu wa Chuo Kikuu, Dkt. Abdon Rwegasira.

“Niwaombe waendelee kuandika zaidi, kuhamasisha na wengine kuwa na utamaduni wa kuandika na kushirikiana na Mahakama ya Tanzania katika kuboresha huduma. Sisi kama Divisheni ya Kazi tupo tayari kuwapa ushirikiano katika kazi zao za utafiti na uandishi uliotukuka kwa maslahi mapana ya Taifa letu,” amesema.

Mhe. Dkt. Mlyambina amewasihi watumishi wenzake na Watanzania kwa ujumla kujenga tabia za kujisomea maandiko mbalimbali, hususani vitabu ili kuongeza maarifa zaidi ya kukabiliana na changamoto zilizopo.

Jaji Mfawidhi alimnukuu Mwana Falsafa Mzalendo wa Jamhuri ya Watu wa Uchina ajulikanaye kwa jina la Confucious ambaye aliwahi kusema, “No matter how busy you may think you are, you must find time for reading, or surrender yourself to self-chosen ignorance,” akimaanisha, “Haijalishi umetingwa na majukiumu kiasi gani, lazima utenge muda wa kujisomea, vinginevyo uchague kuwa mjinga.”

Mhe. Dkt. Mlyambina pia alimnukuu Mwana Falsafa mwingine Nguli Plato ambaye naye aliwahi kusema, “Books give a soul to the universe, wings to the mind, flight to the imagination and life to everything,” akimaanisha, “Vitabu vinaipa nafsi dunia, ni mbawa za akili, kukurusha kwenye fikra na ni njia ya maisha kwa kila jambo.”

Akizungumza katika hafla hiyo, Msomi Zake alisema suala la kukabidhi vitabu hivyo katika Mahakama Kuu Divisheni ya Kazi siyo la kwanza, kwani aliwahi kufanya hivyo mbele ya Jaji Mfawidhi kwa kipindi cha nyuma, Mhe. Salma Maghimbi kwa nakala chache za kitabu cha “Employers’ Common Mistakes under Labour Laws.

Wakili huyo ametoa shukrani zake kwa Mhe. Dkt. Mlyambina na Majaji ambao watakwenda kutumia vitabu hivyo katika shughuli zao. Ameomba kama wakipata nafasi waandike vitabu au kutoa elimu katika maeneo ambayo wanafanya kazi, hatua itakayosaidia kukuza taaluma na ufahamu zaidi wa kisheria ambao Watanzania wanahitaji kuupata.

“Majaji wapo katika nafasi nzuri zaidi ya kutoa miongozo sahihi kuwezesha wadau kuelewa zaidi na kuepusha migongano ya mara kwa mara. Nitoe rai kuwa vitabu hivi vinaweza kuwa na mapungufu au maneno ambayo hayajaangaziwa kwa kina, basi iwe fursa kwenu kukosoa, kuboresha au kuleta mapendekezo zaidi ya kuibua kazi nyingine nyingi zitakazoweza kuwasaidia vizazi vyetu kwenye taaluma hii adhimu,” amesema.

Jaji Mfawidhi wa Mahakama Kuu ya Tanzania, Divisheni ya Kazi, Mhe. Dkt. Yose Mlyambina (juu na chini) akizungumza baada ya kukabidhiwa vitabu 450 na Wakili Msomi Isaack Zake katika hafla iliyofanyika leo tarehe 6 Juni, 2023.

Naibu Msajili Mfawidhi wa Mahakama Kuu ya Tanzania, Divisheni ya Kazi, Mhe. Saidi Ding’ohi akitoa maelezo ya utangulizi katika hafla hiyo.

Wakili Msomi Isaack Zake (kulia) akisisitiza jambo wakati anazungumza kabla ya kukabidhi vitabu hivyo. Kushoto ni Naibu Msajili Mfawidhi wa Mahakama Kuu ya Tanzania, Divisheni ya Kazi, Mhe. Saidi Ding’ohi.

Jaji Mfawidhi wa Mahakama Kuu ya Tanzania, Divisheni ya Kazi, Mhe. Dkt. Yose Mlyambina (kulia picha moja juu na mbili chini) akikabidhiwa nakala tofauti tofauti za vitabu hivyo na Wakili Msomi Isaack Zake.

Wakili Msomi Isaack Zake (kushoto picha juu na chini) akikabidhi vitabu hivyo kwa Jaji wa Mahakama Kuu ya Tanzania, Divisheni ya Kazi, Mhe. Dkt. Modesta Opiyo (juu) na Mhe. Boswalo Mganga (chini).

Majaji pamoja na watumishi wengine (juu na chini) wakifuatilia matukio mbalimbali katika hafla ya makabidhiano ya vitabu 450.

Afisa Tawala wa Mahakama Kuu ya Tanzania, Divisheni ya Kazi , ambaye pia ni Kaimu Mtendaji, Bi. Edisa Makwinya akiwa karibu na kasha lililojaa vitabu mbalimbali.

Meza Kuu ikiongozwa na Jaji Mfawidhi wa Mahakama Kuu ya Tanzania, Divisheni ya Kazi, Mhe. Dkt Yose Mlyambina (katikati). Wengine ni Majaji wa Mahakama katika Divisheni hiyo, Mhe. Dkt. Modesta Opiyo (wa pili kushoto) na Mhe. Biswalo Mganga (wa pili kulia), Wakili Msomi Isaack Zake (kushoto) na Wakili Msomi Envas Nzowa (kulia).

Meza Kuu ikiongozwa na Jaji Mfawidhi wa Mahakama Kuu ya Tanzania, Divisheni ya Kazi, Mhe. Dkt Yose Mlyambina (katikati) ikiwa katika picha ya pamoja na Naibu Msajili Mfawidhi, Mhe. Saidi Ding’ohi (kushoto) na Naibu Msajili, Mhe. Cassian Matembele (kulia). 

Meza Kuu ikiongozwa na Jaji Mfawidhi wa Mahakama Kuu ya Tanzania, Divisheni ya Kazi, Mhe. Dkt Yose Mlyambina (katikati) ikiwa katika picha ya pamoja na watumishi wengine wa Mahakama (juu na mbili chini).