JESHI LA POLISI LATAKIWA KULINDA AMANI UTEKELEZAJI WA AMRI ZA MAHAKAMA

 Na Lydia Churi-Tume ya Utumishi wa Mahakama-Tabora

Jaji Kiongozi wa Mahakama Kuu ya Tanzania na Kamishna wa Tume ya Utumishi wa Mahakama Mhe. Mustapher Siyani ametoa wito kwa jeshi la Polisi nchini kuchukua nafasi yake ya kulinda amani kwa kuzuia uvunjifu wa amani wakati wa utekelezaji wa amri za Mahakama pale uhitaji huo unapojitokeza.

Akizungumza wakati wa Mkutano wa Tume na wadau wa utoaji haki mkoani Tabora, Jaji Kiongozi alisema kwa kawaida mchakato wa utoaji haki kwenye mashauri ya madai, hauishii kwenye hukumu kwa kuwa amri mbalimbali zinazotelewa na mahakama zinapaswa kutekelezwa ili walioshinda tuzo wafaidi matunda ya tuzo hizo.

“Katika utekelezaji wa amri zinazotolewa na Mahakama, zipo nyakati ambazo utekelezaji huo huwa na viashiria vya uvunjifu wa amani kutoka kwa wananchi wasiotaka utekelezaji huo ufanyike na hivyo Madalali wa Mahakama huitaji msaada wa ulinzi kutoka jeshi la Polisi”, alisema Jaji Siyani.

Jaji Kiongozi alisema katika baadhi ya maeneo ya nchi yetu uzoefu unaonesha kuwa jeshi la polisi limekuwa likisita kutoa ulinzi kwa sababu utekelezaji huo unahusisha haki ya madai. Alisema kutotoa ulinzi katika hali kama hiyo, husababisha uvunjifu wa amani au amri za Mahakama kutotekelezwa.

Kwa upande wa Viongozi wa Serikali, Jaji Kiongozi alisema zipo nyakati ambazo madalali huzuiliwa kutimiza majukumu yao na viongozi hao wa serikali licha ya kutambua kuwa kuna amri ya Mahakama inayopaswa kutekelezwa, hutoa amri nyIngine kinzani au huingia kwenye usuluhishi baina ya pande mbili.

“Tumeshuhudia kauli mbalimbali zenye kutweza au kudharau maamuzi ya Mahakama lakini bila kuchukua hatua za kisheria kupinga maamuzi haya. Kauli za aina hiyo zinapotoka kwa viongozi wa serikali, zinaleta dhana tofauti kabisa na utawala wa sheria”, alisema.

Alisema kumekuwa na matukio kadhaa ya viongozi kuishambulia Mahakama kuhusu uadilifu wa Maafisa Mahakama. Aliongeza kuwa wakuu wa Mikoa na Wilaya wanapofanya hivyo wakati wao ndio wenyeviti wa kamati za Maadili za Maafisa hawa, inashusha na kuvunja imani ya wananchi kwa Mahakama. 

‘Mahakama haiwezi kutoa haki kama wananchi hawaiamini na hivyo kuacha kuitumia. Utatuzi wa migogoro utageukia njia nyingine, na hizo zinaweza kuhatarisha usalama wa watu na Serikali itajikuta ina kazi kubwa zaidi ya kulinda amani na utulivu katika nchi” alisisitiza.

Jaji Kiongozi alisema viongozi wa serikali na hasa wakuu wa mikoa na wilaya ambao sheria imewapa nafasi za kusimamia maadili ya Maafisa wa Mahakama kwa kuwa ni wenyeviti wa kamati za wilaya na mkoa, wana wajibu mkubwa wa kusaidia Mahakama kutekeleza majukumu yake kwa kuijengea imani kwa wananchi.

“Mahakama inayoaminika ni msingi wa utulivu na amani katika nchi na amani na utulivu ni mtaji wa maendeleo ambao kila mwananchi anautaka kwa ajili yake na taifa lake”, alisema Mhe. Siyani.

Katika hatua nyingine Ofisi ya Taifa ya Mashtaka imetakiwa kuelekeza nguvu zake katika usikilizwaji wa mashauri mahakamani ili hatma za washtakiwa zijulikane mapema na hivyo kuondoa adha ya mashauri hayo kufutwa kwa kukosa ushahidi na kisha washtakiwa kukamatwa tena na kushtakiwa kwa shauri lile lile.

Jaji Kiongozi alisema suala la kuwakamata tena washtakiwa baada ya kufutiwa mashtaka, au kuyaondoa mashauri na kisha kuyarudisha tena, japo ni utaratibu wa kisheria lakini unaleta malalamiko na kuifanya Mahakama kuonekana haina nguvu ya kusimamia amri zake na hivyo kupunguza Imani ya wananchi kwa Mahakama.

Jaji Kiongozi wa Mahakama Kuu ya Tanzania na Kamishna wa Tume ya Utumishi wa Mahakama Mhe. Mustapher Siyani akizungumza na wadau wakati wa Mkutano wa Tume mkoani Tabora. 

Mkuu wa Magereza Mkoa wa Tabora, Kamishna Msaidizi wa Magereza Vendeline Raphael Tesha akizungumza wakati wa Mkutano wa Tume na wadau wa utoaji haki mkoani humo. Aliipongeza Mahakama kwa kuongeza kasi ya usikilizwaji wa mashauri iliyosaidia kupunguza msongamano wa Mahabusu na wafungwa katika gereza la Tabora.