KAMATI MAALUMU MWANZA YAUNDWA KUPUNGUZA MAKOSA YA JINAI MAHAKAMANI

Na Stephen Kapiga-Mahakama Mwanza

Mahakama Kanda ya Mwanza hivi karibuni ilifanya kikao cha kusukuma mashauri ya jinai kwa Mikoa ya Mwanza na Geita na kuondoka na azimio la kuunda Kamati maalumu ya kutoa elimu kuhusu masuala mbalimbali yanayohusu jinai ili kupambana na angozeko la makosa ya aina hiyo.

Kikao hicho kiliongozwa na Jaji Mfawidhi Mahakama Kuu ya Tanzania, Kanda ya Mwanza, Mhe. Dkt Ntemi Kilekamajenga na kuhudhuriwa na wadau mbalimbali. Wakati wa kikao hicho, Mhe. Kilekamajenga alimteua Mkuu wa Upelelezi wa Jeshi la Polisi (RCO) Mkoa wa Mwanza, Mrakimu Mwandamizi wa Polisi (SSP) Yesayua Sudi kuwa Mwenyekiti wa Kamati hiyo.

RCO Sudi atasaidiwa na Naibu Msajili wa Mahakama Kuu ya Tanzania, Kanda ya Mwanza, Mhe Chiganga Tengwa pamoja na wajumbe wengine kutoka taasisi za dini, ofisi ya Ustawi wa Jamii na ofisi ya Mashtaka Mkoa wa Mwanza.

“Ndugu zangu, Kamati hii itasaidia kutoa elimu kuhusu masuala mbalimbali yanayohusiana na makosa ya jinai ili kusaidia kupata ushirikiano kutoka kwa jamii na kuondoa dhana kuwa Mahakama imekuwa ikikosea inapomwachiwa huru mshitakiwa kutokana na ushahidi kutojitosheleza,” alisema wakati anazungumza na wajumbe wa kikao hicho.

Jaji Mfawidhi alibainisha kuwa Kamati hiyo inayojumuisha viongozi wa dini inategemea kutoka elimu kila eneo kwenye mikusanyiko ya watu, kuwaeleza madhara ya kutenda vitendo vya jinai na umuhimu wa jamii kushirikiana na vyombo vya upepelezi ili kuwezesha haki kupatikana kwa wakati.

Jaji Mfawidhi ameshauri kuwa ni vizuri zikatumika njia mbalimbali ili kuzuia mauaji katika Kanda ya Mwanza kwani gharama za kuendesha mashauri ya aina hiyo ni kubwa na mzigo kwa Serikali.

“Mpaka kufikia tarehe 16 Juni, 2023 kuna mashauri 175 ya mauaji, hivyo kuyaendesha yote ni gharama kubwa kwa Serikali. Mbali na kuunda Kamati hii ni vizuri kutumia njia zingine kuzuia makosa ya mauaji ili kuokoa gharama za kuendesha mashauri ya aina hiyo,” alisema Mhe. Dkt Kilekamajenga.

Mapendekezo ya kuunda Kamati hiyo yalitolewa na wajumbe wa kikao hicho baada ya kubaini kuwa makosa mengi yamekuwa yakitendeka kutokana na baadhi ya watu kukosa elimu ya uelewa pamoja na hofu ya Mungu.

Awali, akisoma taarifa ya mashauri kwa wajumbe wa kikao hicho, Kaimu Naibu Msajili wa Mahakama Kuu ya Tanzania, Kanda ya Mwanza, Mhe. Monica Ndyekobora alieleza kuwa kasi ya umalizaji wa mashauri imeongezeka kutoka 382 tarehe 13 Oktoba 2022 hadi kufikia mashauri 252 kwa tarehe 16 Juni 2023.

Alisema jumla ya mashauri 163 yalisajiliwa kwa kipindi cha kuanzia Januari hadi Juni 15, 2023 na yaliyoamuliwa yalikuwa 236, hivyo kuifanya Mahakama hiyo kuwa na kiwango bora cha kasi ya umalizaji wa mashauri kwa asilimia 150.

Kaimu Naibu Msajili alieleza kuwa mlundikano wa mashauri kwa upande wa Mahakama Kuu katika Kanda hiyo umepungua kutoka asilimia 12 hadi kufikia asilimia 5.15 kwa tarehe 15 Juni, 2023.

Alisema kuna jumla ya mashauri mlundikano 33 kwa Mahakama zote za Kanda ya Mwanza na wameweka mikakati ya kuyamaliza ifikapo mwezi Septemba 2023.

Kuhusu matumizi ya Teknolojia ya Habari na Mawasiliano (TEHAMA), Mhe. Ndyekobora alisema Mahakama za Kanda ya Mwanza zimeendesha jumla ya mashauri 117 kwa njia ya “video conference” kwa kipindi cha kuanzia Januari hadi Juni 2023, hatua inayoonesha kuwa matumizi ya teknolojia hiyo yanaendelea vizuri.

Katibu wa kikao cha kusukuma mashauri ya jinai kwa Mahakama, Kanda ya Mwanza, ambaye ni Mkuu wa Ofisi ya Taifa ya Mashtaka Mwanza, Bi. Bibiana Kileo (kushoto) akisoma muhtasari wa kikao kilichopita kwa wajumbe. Katikati ni Mwenyekiti wa kikao hicho, ambaye pia ni Jaji Mfawidhi wa Mahakama Kuu ya Tanzania, Kanda ya Mwanza, Mhe. Dkt Ntemi Kilekamajenga.

 

Sehemu ya wajumbe (juu na chini) wakiwa katika kikao cha kusukuma mashauri ya jinai kilichofanyika kwenye ukumbi wa mikutano wa jengo la Kituo Jumuishi cha Utoaji Haki Mwanza.

Katibu wa kikao cha kusukuma mashauri ya jinai, Bi. Bibiana Kileo kutoka Ofisi ya Taifa ya Mashtaka Mkoa wa Mwanza akifafanua jambo.

Mkuu wa Gereza la Butimba Mwanza, Mrakimu Mwandamizi wa Magereza (SSP) Deogratias Maguza akichangia jambo wakati wa kikao cha kusumuma mashauri ya jinai.

Mkuu wa Upelelezi wa Polisi Mkoa wa Mwanza, Mrakimu Mwandamizi wa Polisi (SSP) Yesaya Sudi (aliyesimama) akichangia na kufafanua jambo wakati wa uwasilishaji wa maoni mbalimbali kutoka kwa wajumbe wa kikao cha kusukuma mashauri ya jinai.

(Habari hii imehaririwa na FAUSTINE KAPAMA-Mahakama)