MAHAKAMA YAANZA KUTOA HUDUMA MAONESHO SABASABA

Na Faustine Kapama-Mahakama

Mahakama ya Tanzania inashiriki Maonesho ya 47 ya Biashara ya Kimataifa (SabaSaba) ili kutoa huduma na elimu kwa umma kuhusu mambo mbalimbali ya kisheria, ikiwemo taratibu za kimahakama zinazolenga kuboresha utoaji wa haki kwa wananchi.

Ujenzi wa banda la Mahakama ambalo lipo mkabala na lile la Jeshi la Kujenga Taifa katika Viwanja vya Mwalimu Nyerere, Barabara ya Kilwa, Mkoa wa Dar es Salaam umeshakamilika na watumshi kutoka kurugenzi, idara na vitengo mbalimbali wapo tayari kuanza kuwahudumia wananchi.

Katika maonesho hayo, Mahakama ya Tanzania ipo katika banda moja na baadhi ya wadau wake muhimu, wakiwemo Chuo cha Uongozi wa Mahakama Lushoto (IJA) na Chama cha Wanasheria Tanganyika (TLS).

Wadau wengine ni Chama cha Majaji Wanawake Tanzania (TAWJA), Kituo cha Sheria na Haki za Binadamu (LHRC), Shule ya Sheria kwa Vitendo Tanzania na wengine, ambao wanatoa elimu ya sheria kwenye maeneo yao.

Tayari wananchi ambao wamefika katika banda hilo wameanza kupatiwa huduma za kimahakama tangu jana, ikiwemo Mahakama Inayotembea kusikiliza mashauri mbalimbali. Baadhi ya wananchi waliosikilizwa wamepongeza Mahakama kwa kuanzisha huduma hiyo ambayo ni ya mfano wa kuigwa katika Bara la Afrika na Dunia nzima.

“Bado sijaamini kama kesi yetu imesikilizwa, maana tumechukua muda mfupi na sasa tunaenda kufanya mambo mengine. Huduma ya Mahakama hii ni nzuri sana, kwani haki inapatikana kwa haraka na kwa wakati, ingependeza kama itasambaa nchi nzima, ni mfano mzuri kwa Bara la Afrika na duniani kote,” alizungumza mwananchi mmoja jana.

Huduma zingine zitakazotolewa na Mahakama katika kipindi chote cha maonesho hayo ni kutoa elimu kuhusu matumizi ya Teknolojia ya Habari na Mawasiliano (TEHAMA) mahakamani na safari kuelekea Mahakama Mtandao, 'e-Judiciary'.

Kadhalika, kuna utoaji wa elimu kuhusu huduma na taratibu mbalimbali za ufunguaji wa mashauri, yakiwemo ya mirathi na utoaji wa elimu kuhusu masuala ya ndoa, talaka, wosia na mirathi.

Wataalamu wa Mahakama pia wataelezea mfumo ulioboreshwa wa kusajili, kuratibu na kusimamia uendeshaji wa mashauri na kuelezea huduma zinazotolewa na ngazi mbalimbali za Mahakama, ikiwemo Divisheni zake.

Katika kipindi hicho cha maonesho, kutakuwepo na utoaji wa elimu kwa wananchi kutambua umuhimu wa kutumia Kituo cha Huduma kwa Mteja, ‘Call Centre’ cha Mahakama ya Tanzania katika kutoa maoni na malalamiko na namna ya kupata mrejesho.

Mahakama pia, kupitia Chuo cha Uongozi wa Mahakama Lushoto, itatoa fumu za udahili na kuzipokea zile ambazo zimeshafanyiwa kazi, huku Chama cha Mawakili Tanyanyika kikiwa bega kwa bega kutoa msaada wa kisheri kwa wananchi.

Mwonekano kwa nje (juu na chini) wa banda la Mahakama ya Tanzania inayoshiriki kwenye Maonesho ya 47 ya Biashara ya Kimataifa (SabaSaba).

Mahakama Inayotembea ambayo huduma zake ni mfano wa kuigwa Afrika na Dunia nzima.

Zoezi la kutoa elimu masuala mbalimbali limeshaanza.

Kazi inaendelea, njoo banda la Mahakama tukuhudumie chap chap.

Kama kawaida, tunaboresha huduma.

Tupo tayari kuwahudumia, karibuni.

TEHAMA, Kurugenzi ya mashauri wapo tayari.

Huduma tunatoa saa 24, siku saba kwa wiki, siku 30 kwa mwezi, siku 365 kwa mwaka. 

Mwananchi, changamkia fursa, Chuo cha Uongozi wa Mahakama Lushoto nao wapo.

Karibu ujifunze namna Mahakama ya Rushwa na Uhujumu Uchumi inavyotoa haki.

Chama cha Majaji Wanawake Tanzania (TAWJA) wadau muhimu kweli kweli.

Njoo Sabasaba ujifunze mchango wa Mahakama ya Biashara katika uchumi nchini.

Unajua historia ya Mahakama? Karibu Sabasaba kwenye banda la Mahakama ujifunze.

Mambo yote ni usuluhishi bwana! Asikwambie mtu.

Mtoto hafungwi, karibu kwenye banda la Mahakama ujifunze jinsi mashauri ya watoto yanavyoendeshwa. 

Mahakamani ni haki tu, hakuna jingine.