MFUMO MPYA WA KURATIBU MASHAURI KUONDOA UCHELEWESHAJI: JAJI MKUU

Na Magreth Kinabo-Mahakama

Jaji Mkuu wa Tanzania, Mhe. Prof. Ibrahim Hamis Juma amesema mfumo mpya wa kielekrioniki wa kuratibu mashauri (e-Case Management) utaondoa ucheleweshaji wa usikilizaji wa mashauri, hivyo kusaidia wananchi kupata haki zao kwa wakati.

Mhe. Prof. Juma ameyasema hayo leo tarehe 27 Juni, 2023 katika Ukumbi wa mikutano wa Benki Kuu ya Tanzania jijini Dar es Salaam alipokuwa akifunga mafunzo ya siku mbili kuhusu mfumo huo mpya yaliyokuwa yanatolewa kwa Majaji wa Mahakama ya Rufani ya Tanzania.

“Mfumo huu tukiutekeleza utakuwa na manufaa makubwa ya utoaji haki, kwa kuwa utawezesha shauri kusikilizwa katika kipindi (kifupi), wananchi kuona haki inavyotolewa, kupunguza mlundikano wa mashauri mahakamani, kushirikiana na wadau na utaongeza tija kwenye usimamizi wa mashauri,” amesema Prof. Juma.

Jaji Mkuu ameongeza kwamba Mahakama inapohama kutoka mfumo wa analojia kwenda kidijitali ni vema taratibu zinazopoteza muda au kuchelewesha katika ushughulikiaji wa mashauri zikaondolewa, hivyo maeneo ya ucheleweshaji yanatakiwa kuainishwa ili kama sheria ifanyiwe marekebisho au kanuni zitungwe upya ikiwa ni hatua ya kuendelea kufanikisha jambo hilo.

“Hii kazi ni endelevu na sisi tutaendelea kutoa michango yetu ili kuifanya kazi iwe nzuri,” alisisitiza Jaji Mkuu.

Aidha, Mhe. Prof. Juma amefafanua kuwa hatua inayofanywa katika matumizi ya mfumo huo ni kujenga akili bandia, hivyo kila mmoja awe sehemu ya kuifundisha mashine hiyo ili iweze kutumika kwa ubora.

Jaji Mkuu amezipongeza Kurugenzi za Menejimenti ya Mashauri na Teknolojia ya Habari na Mawasiliano (TEHAMA) kwa kuonyesha mabadiliko ya dunia kwa kufanya kazi kwa pamoja. Amesema taaluma ya sheria bila kushirikiana na taaluma ya TEHAMA haiwezi kufika mbali.

Hata hivyo, Mhe. Prof. Juma alizishauri kurugenzi hizo kushirikisha watumishi wa masjala kwa kuwa wana uzoefu utakaosaidia kuendelea kuboresha mfumo huo.

Kwa upande wake, Mwakilishi wa Majaji waliopata mafunzo hayo, Jaji wa Mahakama ya Rufani, Mhe. Ferdinand Wambali, akizungumza baada ya kuhitimishwa mafunzo hayo amesema mfumo huo utasaidia kuimarisha utunzaji wa kumbukumbu na nyaraka ambazo zitakuwa zinapatikana kirahisi na utarahisisha jukumu la utoaji haki kwa wananchi.

“Mahakama imekuwa ikitumia mfumo wa analojia katika uendeshaji wa mashauri, lakini mfumo unaotarajiwa kufanya kazi hivi karibuni unalenga kwa sehemu kubwa katika matumizi ya kielektroniki kuendesha mashauri. Hivyo, tukiutekeleza ipasavyo utaleta manufaa makubwa sana katika utoaji haki, mashauri yatamalizika kwa haraka na utunzaji wa kumbukumbu utaimarika zaidi,” amesema.

Jaji Mkuu wa Tanzania, Mhe. Prof. Ibrahim Hamis Juma akisisitiza jambo alipokuwa anazungumza wakati wa kufunga mafunzo kuhusu mfumo mpya wa kuratibu mashauri yaliyokuwa yanatolewa kwa Majaji wa Mahakama ya Rufani ya Tanzania.

Sehemu ya Majaji wa Mahakama ya Rufani (juu na chini) wakiongozwa na Jaji Mkuu wa Tanzania, Mhe. Prof. Ibrahim Hamis Juma wakiwa katika mafunzo hayo.

Sehemu nyingine ya Majaji wa Mahakama ya Rufani (juu mstari wa mbele na mmoja wa kwanza kushoto mstari wa mbele) ikiwa katika mafunzo hayo.

Naibu Wasajili wa Mahakama ya Rufani (juu) wakiongozwa na Msajili wa Mahakama ya Rufani, Mhe. Sylvester Kainda (wa kwanza mstari wa pili picha chini) na Wakurungezi wa Mahakama (chini) wakiwa katika mafunzo hayo. Picha ya juu wa kwanza kushoto mstari wa mbele ni Jaji wa Mahakama ya Rufani, Mhe. Agnes Mgeyekwa.

(Habari hii imehaririwa na picha kupigwa na FAUSTINE KAPAMA-Mahakama).