WADAU HAKI JINAI PWANI WAPALILIA UWEZESHAJI KUKAMILISHA HARAKA UPELELEZI

Na Eunice Lugiana-Mahakama, Kibaha 

Wadau wa haki jinai katika Mkoa wa Pwani wameomba kila ofisi kutenga fedha zitakazosaidia kuwezesha upelelezi kufanyika kwa haraka kwenye mashauri yanayofunguliwa mahakamani.

Maombi hayo yemetolewa na wadau hao kwenye kikao cha kusukuma mashauri katika Mahakama ya Hakimu Mkazi Pwani kilichofanyika leo tarehe 22 Juni, 2023.

Akizungumza katika kikao hicho, Hakimu Mkazi Mkuu Mfawidhi wa Mahakama ya Hakimu Mkazi Pwani, Mhe. Joyce Mkhoi alisisitiza kila ofisi ya mdau kutenga bajeti kwa ajili ya mashihidi ili kuepuka ucheleweshaji wa mashauri.

Naye Mkuu wa Upelelezi Mkoa, Mrakibu Mwandamizi wa Polisi Areiki Mkwaya, alisema upelelezi umekuwa ukichelewa kukamilika kwa haraka kutokana na umbali na upatikanaji wa mashahidi.

“Kumekuwa na changamoto kubwa ya mashihidi, ikiwemo kutopatikana kutokana na sababu mbalimbali kama kuhama, hali inayowalazimu kutumia pesa zao binafsi kufuatilia mashahidi hao kwa vile hakuna fungu linalotengwa kwa ajili hiyo,” alisema.

Akichangia katika kikao hicho, Mrakibu Msaidizi wa Magereza Mohamed Shegwando aliwapongeza wadau  wa haki jinai kwa kutekeleza majukumu yao kwa ufanisi, maana wafungwa na mahabusu wamepungua.

“Hii inaonyesha Mahakama ikishirikiana na wadau kazi nzuri inaweza kufanyika na kupunguza mlundikano katika Magereza,” alisema na kuomba Maafisa Ustawi wa Jamii kutembelea Magereza ili kutatua changamoto za mahabusu na wafungwa.

Kwa upande wake, Afisa Ustawi wa Jamii, Bi. Matrida Zakaria alisema ulinzi na usalama kwa mtoto iwe ajenda ya kila kikao cha kusukuma mashauri, kwani watoto wengi hufanyiwa ukatili na watu wa karibu katika familia.

Alimwomba kila mjumbe kuwa mlinzi wa mtoto, haijalishi kama ni wake au wa jirani. “Naomba wajumbe wa kikao hiki tuwe walezi na walinzi kwa watoto. Tukiongea na watoto wetu tuwafundishe tabia njema na kuwalinda, kwa kufanya hivyo tutaiokoa jamii yetu,” alisema.

Kabla ya kuahirishwa, kikao hicho kilitoka na maazimio kuwa upande wa mashtaka, wakishirikiana na wadau wote wa haki jinai kuchambua mashahidi kwa kina kabla ya kuleta kesi mahakamani ili kuokoa muda wa Mahakama pamoja na fedha za Serikali.

Mwenyekiti wa kikao cha kusukuma mashauri, Hakimu Mkazi Mkuu Mfawidhi Mahakama ya Hakimu Mkazi Pwani, Mhe. Joyce Mkhoi (kushoto) akiwa na Katibu wa kikao hicho ambaye ni Mwendesha Mashitaka Mwandamizi Bi. Gladness Mchami.

Sehemu ya wajumbe wa kikao cha kusukuma mashauri.

Waendesha Mashkata kutoka Ofisi ya Taifa ya Mashtaka Pwani wakiwa kwenye kikao hicho.

(Habari hii imehaririwa na FAUSTINE KAPAMA-Mahakama)