CHAMA CHA MAJAJI NA MAHAKIMU MTWARA CHAFANYA KIKAO

Na  Hilari Herman-Mahakama, Lindi

Chama cha Majaji na Mahakimu (JMAT) Kanda ya Kusini hivi karibuni kilifanya kikao kujadili mambo mbalimbali ya kiutendaji katika mustakabali mzima wa utoaji haki kwa wananchi.

Mada kadhaa ziliwasilishwa na wawezeshaji waliobobea katika maeneo mbalimbali wakati wa kikao hicho kilichohudhuriwa na Majaji watatu wa Mahakama Kuu ya Tanzania, Kanda ya Mtwara, Naibu Msajili na Mahakimu wote wa Mahakama kutoka Kanda hiyo.

Miongoni mwa mada zilizowasilishwa zilihusu nidhamu, kanuni zinazowaongozo Majaji na Mahakimu, madhara ya rushwa, matumizi ya fedha na jinsi ya kujiwekeza kiuchumi, faida na hasara za matumizi ya mitandao ya kijamii pamoja jinsi ya kukabili msongo wa mawazo.

Akizungumza wakati wa ufunguzi wa kikao hicho kilichofanyika katika ukumbi wa Sultan ulioko Wilaya ya Kilwa, Mkoa wa Lindi, Jaji Mfawidhi wa Mahakama Kuu ya Tanzania, Kanda ya Mtwara, Mhe. Rose Ebrahim aliwapongeza Mahakimu kwa kazi nzuri wanayoifanya.

Aliwakumbusha kuishi katika maadili kama miongozo, sheria na kanuni zinavyowataka. Kadhalika, Mhe. Ebrahim alisisitiza ushirikiano miongoni mwao ili kuendeleza jukumu muhimu la utoaji haki kwa wakati.

Miongoni mwa wawezeshaji waliowasilisha mada katika kikao hicho ni Jaji Mfawidhi Mahakama Kuu ya Tanzania, Divisheni ya Biashara, Mhe. Cyprian Phocas Mkeha na Jaji wa Mahakama Kuu Kanda ya Mtwara, Mhe. Dkt. Eliamini Laltaika.

Akiwasilisha mada kuhusu miongozo na kanuni zinazoongoza Majaji na Mahakimu, Mhe. Mkeha alisisitiza Mahakimu kutotumia vibaya madaraka waliyopewa kisheria, akilenga hasa kifungu kinachozungumzia kudharau Mahakama (Contempt of Court).

Alisema Mahakimu wengi wanatumia kifungu hicho vibaya na kuwaasa wajitahidi kuelekeza zaidi wananchi kuhusu taratibu wanapokuwa mahakamani badala ya kutumia kifungu hicho kama fimbo ya kuwaadhibu.

Vilevile, Jaji Mkeha alikemea suala la rushwa na kueleza hasara zake katika jamii.  Alimnukuu Jaji Mkuu mstaafu, Mhe. Barnaba Samatta akisema, “Rushwa ni uovu mbaya sana lakini uovu huo unakuwa mbaya zaidi pale wale ambao wanawajibu wa kushiriki katika vita dhidi yake wanashiriki katika uovu huo. Jaji au Hakimu anayepokea rushwa anafanya biashara haramu, anauza uhuru wa Mahakama......”

Naye Mhe. Dkt. Laltaika, akiwasilisha mada kuhusu matumizi ya mitandao ya kijamii, alieleza faida na hasara zake na kuwataka Mahakimu kuitumia zaidi katika kujijenga katika kazi zao na siyo kufanya mambo ambayo yanakinzana na maadili.

Mahakimu walioshiriki kikao hicho pia walipata darasa kuhusu uchumi kutoka kwa mwezeshaji ambapo aliwafundisha sababu mbalimbali za mtu au taasisi kushuka kiuchumi. Aligusia baadhi ya sababu, ikiwemo kutokuwa na elimu ya kutosha ya nanma ya utumiaji na utunzaji wa fedha.

Alisema watu wengi hawajui kujiwekea sehemu ya mishahara yao na kuweka kama amana kwa muda ili kuweza kujizalisha. Pia alipambanua kwa kina jinsi gani Mahakimu hao wanaweza kuweka asilimia kidogo ya mishahara kwa muda fulani ili kuwasaidia katika kujikuza kiuchumi na kimaendeleo.

Mada nyingine iliyowasilishwa ilihusu jinsi ya kukabili msongo wa mawazo ambapo mwezeshaji alielezea sababu mbalimbali zinazoweza kupelekea hali hiyo. Hata hivyo, aliwataka washiriki kukubaliana na hali halisi ya maisha na mitazamo yao na siyo kuiga maisha ya wengine ili wasijikute kwenye wimbi la msongo wa mawazo.

Jaji Mfawidhi wa Mahakama Kuu ya Tanzania, Kanda ya Mtwara, Mhe. Rose Ebrahim (katikati) akizungumza wakati akiwakaribisha Majaji na Mahakimu katika kikao cha Chama cha Majaji na Mahakimu Kanda ya Mtwara (hawapo kwenye picha). Kushoto ni Jaji Mfawidhi Mahakama Kuu ya Tanzania, Divisheni ya Biashara, Mhe. Cyprian Mkeha na kulia ni Jaji wa Mahakama Kuu Kanda ya Mtwara, Mhe. Dkt. Eliamini Laltaika.

Jaji Mfawidhi Mahakama Kuu ya Tanania, Divisheni ya Biashara, Mhe.Cyprian Mkeha akiwasilisha mada kwenye kikao hicho.

Jaji wa Mahakama Kuu ya Tanzania, Kanda ya Mtwara, Mhe. Dkt. Eliamini Laltaika akiwasilisha mada kuhusu matumizi ya mitandao ya kijamii.

Mwezeshaji mada ya jinsi ya kujikuza kiuchumi na uwekezaji akiwasilisha mada.

Mwezeshaji Mada ya jinsi ya kukabili Msongo wa Mawazo akiwasilisha mada.

Viongozi wa JMAT Kanda ya Mtwara wakifuatilia kwa makini mada zinazokuwa zinawasilishwa.

Maafisa wa Mahakama (juu na chini) wakifuatilia kwa makini mada zinazokuwa zinawasilishwa na wawezeshaji.

Maafisa wa Mahakama (juu na chini) wakiwa katika picha ya mamoja na Majaji.

(Habari hii imehaririwa na FAUSTINE KAPAMA-Mahakama).