MAJAJI WATANO, WATENDAJI WATEMBELEA BANDA LA MAHAKAMA SABASABA

Na Faustine Kapama-Mahakama

Majaji watano wa Mahakama Kuu ya Tanzania jana tarehe 6 Julai, 2023 wameungana na Watanzania kutembelea banda la Mahakama ya Tanzania kwenye Maonesho ya 47 ya Biashara ya Kimataifa (SabaSaba) yanayofanyika katika Viwanja vya Mwalimu Nyerere, Barabara ya Kilwa, Mkoa wa Dar es Salaam.

Majaji hao walifika katika banda hilo la Mahakama lililopo mkabala na Banda la Jeshi la Kujenga Taifa kwa nyakati tofauti tofauti na kukutana na watumishi kutoka kurugenzi, idara na vitengo mbalimbali wakiwa wanatoa huduma na elimu kwa wanannchi kuhusu mambo mbalimbali ya kisheria.

Aliyekuwa wa kwanza kuwasili katika banda hilo alikuwa Jaji Mfawidhi Mahakama Kuu ya Tanzania, Divisheni ya Ardhi, Mhe. Elinaza Luvanda aliyefuatiwa na Jaji Arafa Msafiri ambaye pia anatoka katika Divisheni hiyo.

Jaji mwingine ni Mhe. Lusungu Hemed, ambaye pia anatoka Mahakama Kuu ya Tanzania, Divisheni ya Ardhi na kufuatiwa na Jaji Mfawidhi Mahakama ya Biashara, Mhe. Cyprian Mkeha, kabla ya Mhe. Dkt. Zainab Mango kutoka Divisheni ya Ardhi kukamilisha ziara ya Majaji kutembelea Banda hilo.

Viongozi wengine waandamizi wa Mahakama walioungana na Majaji hao kutembelea banda la Mahakama ni Watendaji pacha wa Mahakama Kuu ya Tanzania, Bw. Leonard Magacha na Bi. Mary Shirima ambaye alifika katika maonesho hayo tarehe 5 Julai, 2023.

Mtendaji Mkuu wa Mahakama ya Tanzania, Prof. Elisante Ole Gabriel ndiye aliyefungua pazia la viongozi wa Mahakama kutembelea banda la Mahakama tarehe 4 Julai, 2023 na kufuatiwa na Jaji Mfawidhi wa Mahakama Kituo Jumuishi cha Masuala ya Familia, Mhe. Mwanabaraka Mnyukwa.

Jaji Mfawidhi wa Mahakama Kuu ya Tanzania, Divisheni ya Kazi, Mhe. Dkt. Yose Mlyambina alikuwa wa tatu kufika katika maonesho hayo ambapo alitembelea banda la Mahakama mapema tarehe 6 Julai, 2023.

Katika maonesho hayo, Mahakama ya Tanzania ipo katika banda moja na baadhi ya wadau wake muhimu, wakiwemo Chuo cha Uongozi wa Mahakama Lushoto (IJA) na Chama cha Wanasheria Tanganyika (TLS).

Wadau wengine ni Chama cha Majaji Wanawake Tanzania (TAWJA), Kituo cha Sheria na Haki za Binadamu (LHRC), Shule ya Sheria kwa Vitendo Tanzania na wengine, ambao wanatoa elimu ya sheria kwenye maeneo yao.

Huduma zinazotolewa na Mahakama katika maonesho hayo ni Mahakama Inayotembea kusikiliza mashauri mbalimbali, kutoa elimu kuhusu matumizi ya Teknolojia ya Habari na Mawasiliano (TEHAMA) mahakamani na safari kuelekea Mahakama Mtandao, e-Judiciary.

Kadhalika, kuna utoaji wa elimu kuhusu huduma na taratibu mbalimbali za ufunguaji wa mashauri, yakiwemo ya mirathi na utoaji wa elimu kuhusu masuala ya ndoa, talaka, wosia na mirathi.

Wataalamu wa Mahakama pia wanaelezea mfumo ulioboreshwa wa kusajili, kuratibu na kusimamia uendeshaji wa mashauri na kuelezea huduma zinazotolewa na ngazi mbalimbali za Mahakama, ikiwemo Divisheni zake.

Katika kipindi hicho cha maonesho, watalaam hao wanatoa elimu kwa wananchi kutambua umuhimu wa kutumia Kituo cha Huduma kwa Mteja, ‘Call Centre’ cha Mahakama ya Tanzania katika kutoa maoni na malalamiko na namna ya kupata mrejesho.

Mahakama pia, kupitia Chuo cha Uongozi wa Mahakama Lushoto, itatoa fumu za udahili na kuzipokea zile ambazo zimeshafanyiwa kazi, huku Chama cha Mawakili Tanyanyika kikiwa bega kwa bega kutoa msaada wa kisheri kwa wananchi.

Jaji Mfawidhi Mahakama Kuu ya Tanzania, Divisheni ya Ardhi, Mhe. Elinaza Luvanda akiwa katika banda la Ofisi ya Wakili Mkuu wa Serikali. Picha chini akiwa katika banda la Mahakama Kuu Divisheni ya Ardhi.

Jaji wa Mahakama Kuu ya Tanzania, Divisheni ya Ardhi, Mhe. Arafa Msafiri akitia saini kwenye kitabu cha wageni alipofika kwenye banda la Mahakama. Picha chini akiwa katika banda la Chama cha Majaji na Mahakimu Wanawake Tanzania (TAWJA).

Jaji wa Mahakama Kuu ya Tanzania, Divisheni ya Ardhi, Mhe. Arafa Msafiri akitia saini kwenye kitabu cha wageni alipofika kwenye banda la Mahakama. 

 Jaji Mfawidhi Mahakama ya Biashara, Mhe. Cyprian Mkeha akitia saini kwenye kitabu cha wageni baada ya kuwasili katika banda la Mahakama.

 Jaji wa Mahakama Kuu ya Tanzania, Divisheni ya Ardhi, Mhe. Dkt. Zainab Mango akiwa katika banda la usuluhishi. Picha chini akiangalia kumbukumbu za matukio mbalimbali katika picha.

Jaji Mfawidhi wa Mahakama Kituo Jumuishi cha Masuala ya Familia, Mhe. Mwanabaraka Mnyukwa akiweka saini kwenye kitabu cha wageni mapokezi baada ya kufika katika banda la Mahakama.

Mtendaji wa Mahakama Kuu ya Tanzania, Bw. Leonard Magacha  akiwa kwenye banda la Mahakama Kuu ya Tanzania, Kutuo Jumuishi cha Masuala ya Familia Temeke.

Mtendaji wa Mahakama Kuu ya Tanzania, Bi. Mary Shirima akiwa katika banda la Chuo cha Uongozi wa Mahakama Lushoto.