MAFANIKIO YETU YATATEGEMEA UTAYARI KUKABILI MABADILIKO YA KIMFUMO: JAJI MAGHIMBI

Na Faustine Kapama-Mahakama

Jaji Mfawidhi Mahakama Kuu ya Tanzania, Kanda ya Dar es Salaam, Mhe. Salma Maghimbi amewaomba Majaji wenzake na watumishi wa Mahakama kwa ujumla kwenda na mabadiliko ya kimfumo na teknolojia ili kuleta mafaniko katika kazi ya utoaji haki kwa wananchi.

Mhe. Maghimbi ametoa ombi hilo leo tarehe 7 Julai, 2023 alipokuwa akiwakaribisha Majaji wa Mahakama Kuu ya Tanzania wanaounda kundi la tatu kushiriki kwenye mafunzo kuhusu mfumo mpya wa kielektoniki ulioboreshwa, ‘advanced e-case management system’ yanayofanyika katika Ukumbi wa Mikutano wa Benki Kuu ya Tanzania jijini Dar es Salaam.

“Mafanikio yetu kama Mahakama yatategemea sana utayari wetu katika kukabili mabadiliko ya kimfumo. Mfumo huu mpya wa kielekrioniki wa kuratibu mashauri utarahisisha kazi ya utoaji haki katika nchi yetu. Kwa hiyo, tusichukulia kwamba kitu kinachokuja kitafanya kazi iwe ngumu,” amesema.

Jaji Mfawidhi amesema kuwa kama Majaji watauelewa vizuri mfumo huo na kuutumia wataendelea kuwa mabalozi na vinara wa mabadiliko ya kiteknolojia, siyo tu kwa Mahakama ya Tanzania, bali pia kwa taasisi nyingine ndani na nje ya nchi.

Alielezea matumaini yake kuwa watakaporejea kwenye maeneo yao ya kazi, kila kituo kitakuwa na utaratibu maalum wa uhamasishaji wa namna nzuri ya kupokea mabadiliko hayo makubwa ili kuondoa uwezekano na mkwamo wowote katika safari kuelekea Mahakama Mtandao.

“Kila mmoja wetu atajibeba atakuwa balozi kwa walioko chini yake kuanzia karani na wote waliopo mahakamani kuhakikisha kwamba mfumo huu unafikia lengo ambalo limekusudiwa,” Mhe. Maghimbi amesema.

Jaji Mfawidhi amebainisha kuwa maboresho makubwa ya mfumo huo yamejikita katika kurahisisha usajili wa mashauri kwa njia ya mtandao kupitia nyaraka pepe za kimahakama, upangaji wa mashauri kwa Majaji na Mahakimu, usikilizaji wa mashauri kwa njia ya mtandao na kuruhusu mienendo ya mashauri kuandikwa moja kwa moja.

Amesema pia kuwa ujenzi wa mfumo huo umezingatia mchakato mzima wa shughuli za kimahakama kwa ngazi zote ili kuhakikisha kwamba hatua za usikilizaji wa mashauri zinachakatwa kimfumo na kuondokana na matumizi ya karatazi.

Mhe. Maghimbi amesema kukamilika kwa ujenzi huo ni moja ya mafanikio makubwa ambayo Mahakama ya Tanzania inapaswa kujivunia, hasa pale wanapopiga hatua kuelekea kwenye matumizi kamili ya Teknolojia ya Habari na Mawasiliano (TEHAMA) katika utoaji haki nchini.

“Mfumo huu utasaidia kutatua changamoto na mapungufu mbalimbali, ikiwemo kuelemewa na uzito wa nyaraka, kushindwa kuhifadhi kumbukumbu za mienendo ya mashauri na matatizo mengine mengi yaliyokuwa yanaonekana kwenye mifumo iliyokuwa inatumika hapo awali,” amesema.

Hivyo, Jaji Mfawidhi amewapongeza watalaam kutoka Kurugenzi za Teknolojia ya Habari na Mawasiliamno (TEHAMA) na Usimamizi wa Mashauri kwa kufanya kazi kubwa ya kujenga mfumo huo.

Awali akiwasilisha neno la utangulizi, Msajili Mkuu wa Mahakama ya Tanzania, Mhe. Wilbert Chuma alisema mafunzo hayo yanafanyika kwa Majaji wote wa Mahakama Kuu kuwapa uelewa wa mfumo huo wa advanced case management system, kwa vile wao ni miongoni mwa watumiaji wakubwa.

Alisema Majaji wamekuwa mstari wa mbele katika kusaidia kutoa maoni pale wanapokutana na hoja mbalimbali zinazohusu mifumo ambayo inaendelea, hivyo wanategemea wakati wa mafunzo kupata mrejesho kutoka kwao kwenye maeneo ya kufanyia maboresho.

Msajili Mkuu aliwaambia Majaji hao kuwa mfumo ambao watapitishwa umejengwa na wataalam wa ndani ya Mahakama ya Tanzania, hivyo alichukua fursa hiyo kuwapongeza kwa kazi hiyo nzuri.

“Maeneo mengi, hata katika nchi zingine hawaamini mifumo hii imejengwa na watalaam wetu wa ndani. Baadhi ya maeneo ambayo tumeenda wameonyesha shauku ya aidha kuja kujifunza au kuomba wataalam wetu waende wakawape elimu wamefanyaje mpaka kuunda mifumo hii ambayo kwa sasa inafanya kazi kwa ufanisi,” alisema.

Kufanyika kwa mafunzo kuhusu mfumo huo mpya ni mwendelezo wa yale yaliyotolewa kwa Majaji wa Mahakama ya Rufani na makundi mawili ya Majaji wa Mahakama Kuu ya Tanzania katika ukumbi huo hivi karibuni. Mafunzo hayo yalifunguliwa kwa mara ya kwanza na Jaji Mkuu wa Tanzania, Mhe. Prof. Ibrahim Hamis Juma.

Jaji Mfawidhi Mahakama Kuu ya Tanzania, Kanda ya Dar es Salaam, Mhe. Salma Maghimbi akiongea wakati anawakaribisha Majaji wa Mahakama Kuu awamu ya pili kushiriki kwenye mafunzo kuhusu mfumo  mpya wa ‘advanced e-case management system’ katika Ukumbi wa Benki Kuu ya Tanzania jijini Dar es Salaam leo tarehe 7 Julai, 2023.

Msajili Mkuu wa Mahakama ya Tanzania, Mhe. Wilbert Chuma akisisitiza jambo alipokuwa anatoa maelezo ya utangulizi kuhusu mafunzo hayo.

Sehemu ya Majaji wa Mahakama Kuu ya Tanzania (juu na chini) ikimsikiliza Mhe. Maghimbi wakati akiwakaribisha kwenye mafunzo kuhusu mfumo huo.

.

Sehemu nyingine ya Majaji wa Mahakama Kuu ya Tanzania (juu na chini) ikimsikiliza Jaji Maghimbi.

Majaji wengine wa Mahakama Kuu ya Tanzania wakimsikiliza Jaji Maghimbi. Nyuma yao ni Watendaji wa Mahakama Kuu ya Tanzania, Mary Shirima (kushoto) na Leonard Magacha (kulia) wakiwa kwenye mafunzo hayo.

Viongozi wengine wa Mahakama wakimsikiliza Jaji Maghimbi wakati akiwakaribisha Majaji kushiriki kwenye mafunzo hayo.

Meza Kuu ikiongozwa na Jaji Mfawidhi Mahakama Kuu ya Tanzania, Kanda ya Dar es Salaam, Mhe. Salma Maghimbi (katikati) ikiwa katika picha ya pamoja na sehemu ya Majaji Wafawidhi wa Kanda na Divisheni mbalimbali za Mahakama Kuu ya Tanzania (waliosimama). Wengine waliokaa ni Mhe. Isaya Arufani (kushoto) na Mhe. Ilvin Mugeta (kulia).

Meza Kuu ikiongozwa na Jaji Mfawidhi Mahakama Kuu ya Tanzania, Kanda ya Dar es Salaam, Mhe. Salma Maghimbi (katikati) ikiwa katika picha ya pamoja na sehemu ya Majaji (juu na chini) wanaoshiriki mafunzo hayo.

Meza Kuu ikiongozwa na Jaji Mfawidhi Mahakama Kuu ya Tanzania, Kanda ya Dar es Salaam, Mhe. Salma Maghimbi (katikati) ikiwa katika picha ya pamoja na sehemu ya nyingine ya Majaji wanaoshiriki mafunzo hayo.

Meza Kuu ikiongozwa na Jaji Mfawidhi Mahakama Kuu ya Tanzania, Kanda ya Dar es Salaam, Mhe. Salma Maghimbi (katikati) ikiwa katika picha ya pamoja na viongozi waandamizi wa Mahakama ya Tanzania.

Meza Kuu ikiongozwa na Jaji Mfawidhi Mahakama Kuu ya Tanzania, Kanda ya Dar es Salaam, Mhe. Salma Maghimbi (katikati) ikiwa katika picha ya pamoja na Naibu Wasajili, Wakurugenzi, Naibu wa Wakurugenzi na Watendaji wa Mahakama.

Meza Kuu ikiongozwa na Jaji Mfawidhi Mahakama Kuu ya Tanzania, Kanda ya Dar es Salaam, Mhe. Salma Maghimbi (katikati) ikiwa katika picha ya pamoja na sehemu ya Mahakimu wanaoshiriki mafunzo hayo.

Meza Kuu ikiongozwa na Jaji Mfawidhi Mahakama Kuu ya Tanzania, Kanda ya Dar es Salaam, Mhe. Salma Maghimbi (katikati) ikiwa katika picha ya pamoja na wataalam waliofanikisha kujenga mfumo huo mpya.