JAJI KIONGOZI AWATOA HOFU MAJAJI KUHUSU MFUMO MPYA WA KURATIBU MASHAURI

Na Faustine Kapama-Mahakama

Jaji Kiongozi wa Mahakama Kuu ya Tanzania, Mhe. Mustapher Mohamed Siyani amewatoa hofu Majaji kuhusu ujio wa mfumo mpya wa kielektroniki ulioboreshwa utakaoanza kutumika hivi karibuni kwani unaenda kuondoa changamoto mbalimbali zilizokuwa zinaikabili mifumo iliyopita katika kuratibu mashauri mahakamani.

Akizungumza kwenye awamu ya pili ya Majaji wa Mahakama Kuu wanaoshiriki kwenye mafunzo kuhusu mfumo huo wa ‘advanced e-case management system’ katika Ukumbi wa Benki Kuu ya Tanzania jijini Dar es Salaam leo tarehe 5 Julai, 2023, Mhe. Siyani amesema kila kitu kitaendelea kufanyika kama ilivyo siku zote.

“Tunapoanza kitu kipya huwa tunakuwa na hofu, hofu ni kitu cha kawaida wakati wowote ule unapoanza kitu kingine, hofu ni sehemu ya maisha yetu. Watalaam wetu wapo na mimi niwaombe muondoe hizo hofu ili mkiondoka kwenye chumba hiki muwe na amani kwamba kila kitu kitaendelea kama tulivyokuwa tunafanya siku zote,” amesema.

Jaji Kiongozi ameeleza matumaini yake kuwa mfumo huo watakapoanza kuutumia utakuwa na tija nyingi ambazo zinajaribu kujibu maswali au changamoto za mifumo iliyopita, ikiwemo JSDS1 na JSDS2 ambayo ilikuwa na changamoto mbalimbali na Majaji hawakuhusishwa kwa kiasi kikubwa.

“Kwa sasa tunatoka kwenye JSDS2 tunaenda kwenye ‘advanced case management system’ ambayo imetatua changamoto zilizokuwepo kwenye mifumo iliyopita, ikiwemo kuelemewa na uzito wa nyaraka, kushindwa kuhifadhi kumbukumbu za mienendo ya mashauri na kadhalika,” amesema.

Mhe. Siyani amebainisha kuwa mfumo huo wa sasa unaoanishwa na mifumo mingine utasaidia kuondoa tatizo kuhusu kumbukumbu za Mahakama na kuleta faida zingine nyingi, ikiwemo kurahisisha upandishaji wa moja kwa moja maamuzi kwenye kanzi data zingine kama TanzLii badala ya kupitia kwa wasaidizi wao.

Amewapongeza watalaam kutoka Kurugenzi za Teknolojia ya Habari na Mawasiliamno (TEHAMA) na Usimamizi wa Mashauri kwa kufanya kazi kubwa ya kujenga mfumo huo na kuwaomba Majaji kuwa vinara wa kuutumia utakapoanza kufanya kazi na wasirudi nyuma.

“Sisi ni viongozi, tukirudi nyuma hatutafanikiwa, hatutatoka hapa tulipo, lazima tuchukue nafasi zetu ili kuwafanya wale waliochini yetu nao wahame kutoka kwenye matumizi ya karatasi kwenda katika teknolojia. Tukifanikiwa tutakuwa tumeweka kumbukumbu sawa kwa wenzetu wengine kufuata, siyo tu hapa nchini lakini pia nje ya nchi yetu,” amesema.

Mhe. Siyani amesema Mahakama ya Tanzania inapaswa kujivunia kwa maboresho makubwa yaliyofanyika na yanayoendelea kufanyika, ikiwemo ujenzi wa mfumo huo mpya unaolega kurahisisha shughuli za utoaji haki mahakamani.

“Sisi tunaopata nafasi ya kukutana na wenzetu kwenye mataifa yaliyoendelea kujifunza wanafanyaje, utaona tunaweza kuwa maskini kwenye vitu vingine, lakini katika namna ambavyo tunakwenda na ukiwasikiliza utaona sisi tumepiga hatua zaidi kuliko wao na tunao uwezo wa kuonyesha njia, tunakoelekea ni kuzuri zaidi,” amesema.

Amewakumbusha Majaji kuwa ujenzi wa mfumo ni mchakato, hivyo wakikumbana na changamoto kadhaa wakati wa kuutumia wasisite kutoa maoni, kwani ndiyo yatakayosaidia kuufanya siku moja uwe mzuri unaoridhisha kwa kila mmoja.

“Huu mfumo wa kielektroniki utatuwezesha na kurahisisha kazi zetu za usikilizaji wa mashauri. Ujenzi wa mfumo ni hatua, haukamiliki siku moja. Mtakapokuwa mnapitishwa mtaendelea kuona changamoto,” Jaji Kiongozi amesema.

Ameeleza kuwa mfumo huo umeanza kujengwa tangu mwaka jana na kuna wengine walishatoa maoni mbalimbali, hivyo na wao watakapopitishwa wanaweza kuona maeneo ambayo yanaweza kuboreshwa. Mhe. Siyani amewaomba watalaamu waliopo kuendelea kupokea maoni kwa ajili ya kuboresha mfumo huo.

Awali akitoa neno la utangulizi, Msajili Mkuu wa Mahakama ya Tanzania, Mhe. Wilbert Chuma alisema mafunzo hayo yatafanyika kwa Majaji wote wa Mahakama Kuu katika makundi matatu, lengo ni kuwapa uelewa wa mfumo huo wa advanced case management system, kwa vile wao ni miongoni mwa watumiaji wakubwa.

Alieleza kuwa ujenzi wa mfumo huwa ni endelevu, kwa maana huhitaji kuboreshwa kila siku, hivyo wanategemea wakati wa mafunzo kupata mrejesho kutoka kwa Majaji kwenye maeneo ya kufanyia maboresho.

“Tunatambua kuwa kuna yale ambayo yataweza kufanyiwa kazi mara moja wakati hatujaanza kuutumia mfumo na mengine yatafanyiwa kazi wakati matumizi yake yakiendelea,” amesema, huku akibanisha kuwa ni jambo la kujivunia kwa vile mfumo huo umejengwa na watalaamu wa ndani ya Mahakama ya Tanzania.

Mahakama ya Tanzania inafanya maboresho ambayo yalianza siku nyingi hatua kwa hatua tangu mwaka 1980, lengo ni kuhakikisha huduma za utoaji haki zinapatikana kwa kutumia teknolojia kwa matumanini kwamba yatarahisisha zaidi kazi za utoaji haki kwa wananchi.

Kufanyika kwa mafunzo kuhusu mfumo huo mpya ni mwendelezo wa yale yaliyotolewa kwa Majaji wa Mahakama ya Rufani na kundi la kwanza la Majaji wa Mahakama Kuu ya Tanzania katika ukumbi huo hivi karibuni. Mafunzo hayo yalifunguliwa kwa mara ya kwanza na Jaji Mkuu wa Tanzania, Mhe. Prof. Ibrahim Hamis Juma.

Jaji Kiongozi wa Mahakama Kuu ya Tanzania, Mhe. Mustapher Mohamed Siyani (juu na chini) akiongea wakati anawakaribisha Majaji wa Mahakama Kuu awamu ya pili kushiriki kwenye mafunzo kuhusu mfumo  mpya wa ‘advanced e-case management system’ katika Ukumbi wa Benki Kuu ya Tanzania jijini Dar es Salaam leo tarehe 5 Julai, 2023.

Msajili Mkuu wa Mahakama ya Tanzania, Mhe. Wilbert Chuma akitoa maelezo ya utangulizi hukusu mafunzo hayo.

Msajili wa Mahakama Kuu ya Tanzania, Mhe. Sharmillah Sarwatt akieleza jambo kabla ya kuanza mafunzo hayo.

Sehemu ya Majaji wa Mahakama Kuu ya Tanzania (juu na chini) wakimsikiliza Jaji Kiongozi wakati akiwakaribisha kwenye mafunzo kuhusu mfumo huo.

Sehemu nyingine ya Majaji wa Mahakama Kuu ya Tanzania (mstari wa mbele na wawili kuanzia kulia mstari wa nyuma) wakiwa kwenye mafunzo hayo. Kwenye mstari wa pili, wa kwanza kushoto ni Msajili Mkuu wa Mahakama ya Tanzania, Mhe. Wilbert Chuma.

Watendaji wa Mahakama Kuu ya Tanzania, Mary Shirima (kushoto) na Leonard Magacha (kulia) wakiwa kwenye mafunzo hayo kuhakikisha kila kitu kinaenda sawa sawa.

Wakurugenzi, Naibu Wakurugenzi na viongozi wengine wakimsikiliza Jaji Kiongozi wakati akiwakaribisha Majaji kushiriki kwenye mafunzo hayo.

Meza Kuu ikiongozwa na Jaji Kiongozi wa Mahakama Kuu ya Tanzania, Mhe. Mustapher Mohamed Siyani (katikati) ikiwa katika picha ya pamoja na sehemu ya Majaji Wafawidhi wa Kanda mbalimbali za Mahakama Kuu ya Tanzania (waliosimama). Wengine waliokaa ni Mhe. Wilfred Ndyansobera (kushoto) na Mhe. Rose Ebrahim (kulia).

Meza Kuu ikiongozwa na Jaji Kiongozi wa Mahakama Kuu ya Tanzania, Mhe. Mustapher Mohamed Siyani (katikati) ikiwa katika picha ya pamoja na sehemu ya Majaji wa Mahakama Kuu (juu na picha mbili chini) wanaoshiriki mafunzo hayo.

Meza Kuu ikiongozwa na Jaji Kiongozi wa Mahakama Kuu ya Tanzania, Mhe. Mustapher Mohamed Siyani (katikati) ikiwa katika picha ya pamoja na viongozi waandamizi wa Mahakama ya Tanzania.

Meza Kuu ikiongozwa na Jaji Kiongozi wa Mahakama Kuu ya Tanzania, Mhe. Mustapher Mohamed Siyani (katikati) ikiwa katika picha ya pamoja na Naibu Wasajili, Wakurugenzi, Naibu wa Wakurugenzi na Watendaji wa Mahakama.

Meza Kuu ikiongozwa na Jaji Kiongozi wa Mahakama Kuu ya Tanzania, Mhe. Mustapher Mohamed Siyani (katikati) ikiwa katika picha ya pamoja na Mahakimu wanaoshiriki kwenye mafunzo hayo.

Meza Kuu ikiongozwa na Jaji Kiongozi wa Mahakama Kuu ya Tanzania, Mhe. Mustapher Mohamed Siyani (katikati) ikiwa katika picha ya pamoja na wataalam watakaohakikisha mfumo huo mpya upo tayari kwa matumizi kurahisisha shughuli za utoaji haki nchini.