JUDICIARY OF TANZANIA: JAJI MFAWIDHI MANYARA ASISITIZA WATUMISHI KWENDA NA KASI YA MABADILIKO YA TEHAMA

Na Christopher Msagati-Mahakama, Manyara

Jaji Mfawidhi wa Mahakama Kuu ya Tanzania, Kanda ya Manyara, Mhe. John Kahyoza amesisitiza watumishi katika Kanda hiyo kwenda na kasi ya mabadiliko ya Teknolojia ya Habari na Mawasiliano (TEHAMA) katika ulimwengu uliopo sasa.

Mhe Kahyoza ametoa msisitizo huo leo tarehe 06 Julai, 2023 wakati wa mafunzo ya ndani yaliyokuwa yanatolewa kwa watumishi wa Mahakama Kuu, Mahakama ya Hakimu Mkazi Manyara, Mahakama ya Wilaya Babati na Mahakama za Mwanzo zilizopo Babati.

“Teknolojia inakwenda kwa kasi sana na kwa hakika hatujui huko mbeleni miaka ijayo kitu gani kitatokea, hivyo ni rai yangu kwenu watumishi kujitahidi kwenda na mabadiliko hayo kwa sababu hatuna namna ya kuyaepuka katika kazi zetu, ni lazima tutumie TEHAMA,” amesema.

Mafunzo hayo ya ndani yalihusu matumizi ya E-Office na matumizi mengine ya kimtandao katika shughuli za Mahakama, utunzaji wa kumbukumbu unaozingatia viwango pamoja na utunzaji wa nyaraka pamoja na kutunza siri. Bw. Damasi Axwesso, Fatina Haymale na Christopher Msagati ambao ni watumishi wa Mahakama ndiyo waliokuwa watoa mada katika mafunzo hayo.

Katika hatua nyingine, mtumishi Happyness Mungure alitumia nafasi hiyo kuwajulisha watumishi wengine masuala ambayo yalijiri kwenye Baraza la Wafanyakazi ambalo lilifanyika Dodoma mwezi Juni, 2023.

Mahakama Kuu Kanda ya Manyara imejizatiti katika kutoa mafunzo mbalimbali ya mara kwa mara kwa watumishi wake ili kuboresha utendaji wao wa kazi pamoja na ufanisi ambao utaleta tija katika utoaji huduma za kimahakama.

Jaji Mfawidhi wa Mahakama Kuu ya Tanzania, Kanda ya Manyara, Mhe. John Kahyoza (katikati) akitoa neno la ufunguzi katika mafunzo ya ndani ya watumishi. Kulia ni Naibu Msajili wa Mahakama Kuu, Kanda ya Manyara, Mhe. Bernard Mpepo na kushoto ni Mtendaji wa Mahakama katika Kanda hiyo, Bw. Jacob Swalle.