JAJI MKUU ATAKA MAWAKILI KUBADILIKA KIFIKRA

Na Faustine Kapama-Mahakama

Jaji Mkuu wa Tanzania, Mhe. Prof. Ibrahim Hamis Juma amewahimiza Mawakili wapya kubadilika kifikra, kimitazamo na mbinu za utoaji wa huduma ili kuziona fursa za ajira ambazo zinaibuliwa katika karne ya sasa.

Mhe. Prof. Juma ametoa wito huo leo tarehe 6 Julai, 2023 katika sherehe ya 68 ya kuwakubali na kuwapokea Mawakili wapya 195 iliyofanyika kwenye Viwanja vya Karimjee jijini Dar es Salaam. Tukio hilo linafanya kwa sasa Mawakili kufikia 11,637.

“Mkiganda katika zama iliyopita, zama inayotokana na aina ya masomo tunayopata Chuo Kikuu, aina ya masomo tunayopata kupitia Shule ya Sheria tutakosa hizo fursa na pengine tutabaki watu ambao tunalalamika mara kwa mara,” amesema.

Jaji Mkuu amesema kuwa umefika wakati Mawakili na Wanasheria Vijana kukubali ukweli kuwa Elimu ya Sheria waliyopata Vyuo Vikuu na Shule ya Sheria, haikuwatayarisha kukabiliana na changamoto ya kutafuta fursa zinazoibuliwa na mabadiliko katika Karne ya 21.

Amesema ni vizuri kwa Mawakili hao kujiweke katika hali ya kusoma fursa katika mabadiliko mbalimbali ambayo yanatokea katika jamii na wasipoelewa dunia ambayo inawazunguka hizo fursa hawataziona wala kuwafuata nyumbani kama ilivyokuwa zamani.

Mhe. Prof. Juma amesisitiza kuwa Mawakili wanatakiwa kuwa na miwani ambayo ni tofauti na miwani waliyoizoea, miwani ambayo itaweza kuona fursa ambazo watu wengine hawazioni.

“Mawakili wapya hamuwezi kuziona fursa mpya za karne ya 21, kama mitazamo yenu, tamaduni na uelewa wenu wa sheria ni kupitia miwani na maudhui ya dunia ya karne za 19 na 20,” amesema Jaji Mkuu.

Amesema huwa anafuatilia mijadala katika mitandao ya kijamii, kwa bahati mbaya amegundua bado Wanasheria na Mawakili wa Tanzania wanajenga hoja zao kwa kutumia uoni na miwani ya zamani isiyoweza kuona fursa zilizozalishwa na utandawazi na ukuaji mkubwa wa matumizi ya teknolojia.

Jaji Mkuu amebainisha pia kuwa Wanasheria na Mawakili bado hawajaweza kuona fursa kubwa tarajiwa kutoka kwenye miradi mikubwa ya kiuwekezaji, mfano Reli ya Kisasa ya Mwendokasi (SGR) na Bwawa la Kufua Umeme la Julius Nyerere, ambazo zinalenga kufungua fursa za ajira sio tu ndani ya Tanzania, bali pia nchi zingine katika Bara la Afrika.

“Juzi nilikuwa Namibia, nikaongea na Mawakili wa huko, wao ujenzi wa SGR ni fursa na wanaanza kuangalia ni namna gani watakuja kutoa huduma hapa Tanzania. Wanaposikia kuwa kuna bwawa kubwa la umeme ambalo litaibua viwanda, wao kama Mawakili wanasema kwao ni fursa ambayo itawaunganisha Tanzania na nchi zingine za kiafrika,” amesema.

Hivyo, amewaomba Mawakili hao kujibadilisha wao wenyewe na kujiendeleza kwa kuvaa miwani yenye uwezo wa kuona hizo fursa. Alitoa mfano wa Rais Mstaafu wa Awamu ya Tatu, Hayati Benjamin William Mkapa katika kitabu chake cha “My Life My Purpose’’ katika ukurasa 96.

Alimnukuu Rais Mstaafu akisema, “We Must Change Ourselves or We Will Be Changed,’’ maana yake ni kwamba, “Ni Lazima Wanasheria na Mawakili Tujibadilishe kifikra, kimtazamo na kinyakati, vinginevyo tutalazimishwa kubadilika.’’

“Tunayo nafasi sisi vijana ambao tuna muda mrefu zaidi wa kutoa huduma, usitegemee sana Mawakili ambao tayari wanazo ajira, hawatawazungumzia sana, nyinyi ndiyo mnatakiwa kuibua hizo fursa, kwa sababu wale ambao wanazo hawatakuwa na nia ya kuongelea changamoto ya ajira ambayo inawakumba Mawakili wanaoingia katika soko la ajira,” amesema.

Jaji Mkuu amebainisha pia kuwa katika miaka ya hivi karibuni, masuala yanayozungumziwa katika Mikutano ya Jukwaa ya Majaji Wakuu wa Nchi za Afrika Kusini na Mashariki ya Afrika ni kielelezo tosha kuwa Mahakama Barani Afrika zimeamua kubadilisha fikra na mitazamo.

Amesema hiyo inafanyika kukabiliana na changamoto zinazokabili nchi zetu katika Karne ya 21 ambazo ni tofauti na changamoto zilizokuwepo kuanzia miaka ya uhuru 1960 hadi ya Karne ya 21 iliyoanza tarehe 1 Januari, 2000.

Hivyo, amewasihi Mawakili wapya kwenda kupima miwani mipya ili waweze kuona fursa za kiushindani nje ya Jamhuri ya Muungano wa Tanzania na ndani ya Eneo Huru la Biashara la Bara la Afrika (African Free Trade Area (AfCFTA).

Jaji Mkuu wa Tanzania, Mhe. Prof. Ibrahim Hamis Juma akisisitiza jambo alipokuwa anazungumza kwenye sherehe ya 68 ya kuwakubali na kuwapokea Mawakili wapya 195 iliyofanyika kwenye Viwanja vya Karimjee jijini Dar es Salaam leo tarehe 6 Julai, 2023.

Sehemu ya Mawakili wapya (juu na chini) waliokubaliwa na kupokelewa wakimsikiliza Jaji Mkuu (hayupo katika picha).

Sehemu ya wananchi waliohudhuria sherehe hizo wakifuatilia matukio mbalimbali.

Majaji wakiongozwa na Jaji Mkuu wa Tanzania, Mhe. Prof. Ibrahim Hamis Juma (katikati) wakiina kama ishara ya kupokea heshima iliyokuwa inatolewa na  Mawakili wapya 195.

Sehemu ya Mawakili wapya 195 (juu na chini) wakitoa heshima kwa Jaji Mkuu baada ya kuwakubali na kuwapokea.

Msajili wa Mahakama Kuu ya Tanzania, Mhe. Sharmillah Sarwatt akiwaongoza Mawakili wapya  kula kiapo cha uaminifu. Kushoto ni Mtendaji wa Mahakama, Bw. Philbert Matutay.

Sehemu ya Mawakili wakila kiapo cha uaminifu mbele ya Jaji Mkuu wa Tanzania, Mhe. Prof. Ibrahim Hamis Juma (hayupo katika picha).

Jipo likiongozwa na Mwanasheria  Mkuu wa Serikali, Dkt. Eliezer Mbuki Feleshi (wa pili kulia) akiwa na Wakili Mkuu wa Serikali, Dkt. Boniphace Luhende (wa pili kushoto) likiwa tayari kupokea heshima kutoka kwa Mawakili wapya. 

Jaji Kiongozi Mstaafu, Mhe. Fakih Jundu (wa kwanza kushoto) akiwa na Majaji wengine wastaafu waliohudhuria sherehe hiyo.

Meza Kuu ikiongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) ikiwa katika picha ya pamoja na sehemu ya Majaji wa Mahakama ya Rufani.

Meza Kuu ikiongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) ikiwa katika picha ya pamoja na sehemu ya Majaji wa Mahakama Kuu ya Tanzania.

Meza Kuu ikiongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) ikiwa katika picha ya pamoja na sehemu ya Mawakili wapya.

Jaji Mkuu wa Tanzania, Mhe. Prof. Ibrahim Hamis Juma (kulia) na Jaji Kiongozi wa Mahakama Kuu ya Tanzania, Mhe. Mustapher Mohamed Siyani (kushoto) wakiwa katika picha ya pamoja na 'Jaji Mkuu mtarajiwa'.

Meza Kuu ikiongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) ikiwa katika picha ya pamoja na Mawakili wawili wenye mahitaji maalum pamoja na mtoto mmoja aliyegeuka kuwa mpiga picha kwenye sherehe hiyo.

(Picha na Innocent Kansha-Mahakama).